اتىراۋ وبلىسىندا جاستار اراسىنداعى تەرىس ارەكەتتەردىڭ الدىن الۋ, ولاردى بولدىرماۋ جانە ءتيىمدى كۇرەسۋ جولدارى تالقىلانعان «كەمەلدەنۋ جولىنداعى 5 قادام» فورۋمى ءوتتى, دەپ حابارلايدى Egemen.kz.
جيىندا ءماجىلىس دەپۋتاتى جۇلدىز سۇلەيمەنوۆا, ء«بىلىم-يننوۆاتسيا» حالىقارالىق قوعامدىق قورىنىڭ ۆيتسە-پرەزيدەنتى ەرجان اۋباكىروۆ جانە اتىراۋ وبلىسىنىڭ پروكۋرورى باۋىرجان جۇماقانوۆ پەن پسيحولوگتار مەن سالاعا قاتىستى ماماندار بولدى.
فورۋم بارىسىندا قاتىسۋشىلار قازىرگى قوعامدا وزەكتى بولىپ وتىرعان ماسەلەلەرگە توقتالىپ, ولاردى شەشۋ ءۇشىن ءبىلىم مەن تاربيەنىڭ ءرولىن ەرەكشە اتاپ ءوتتى.
ءماجىلىس دەپۋتاتى جۇلدىز سۇلەيمەنوۆا قوعامعا قاۋىپ توندىرەتىن وزەكتى ماسەلەلەرگە توقتالىپ, ولاردى بولدىرماۋ جانە الدىن الۋ شارالارى جونىندە پىكىر ءبىلدىردى.
– پرەزيدەنت قاسىم-جومارت توقاەۆ اتاپ وتكەن «بەس كەسەل» – ناشاقورلىق, لۋدومانيا, تۇرمىستىق زورلىق-زومبىلىق, ۆانداليزم جانە ىسىراپشىلدىق – قازىرگى قوعامنىڭ ەڭ ۇلكەن سىناقتارىنىڭ ءبىرى. بۇل ماسەلەلەردى شەشۋ ءۇشىن قۇقىقتىق تەتىكتەرىمەن قاتار, وتباسى ينستيتۋتىنىڭ ءرولىن كۇشەيتۋ, بالالاردىڭ تسيفرلىق ساۋاتتىلىعىن ارتتىرۋ جانە جالپى قوعامنىڭ جاۋاپكەرشىلىگىن نىعايتۋ ماڭىزدى. جاستاردىڭ ساناسىنا سالاۋاتتى ءومىر سالتىن, رۋحاني قۇندىلىقتاردى جانە پاراساتتىلىق قاعيداتتارىن ءسىڭىرۋ ارقىلى عانا ءبىز بۇل قاۋىپتەردىڭ الدىن الا الامىز, – دەدى دەپۋتات.
ول سونداي-اق, قابىلدانعان زاڭداردىڭ ءتيىمدى جۇزەگە اسىرىلۋى ءۇشىن بارلىق مۇددەلى تاراپتاردىڭ بىرلەسكەن جۇمىسى قاجەت ەكەنىن اتاپ ءوتتى.
فورۋم بارىسىندا ء«بىلىم-يننوۆاتسيا» حالىقارالىق قوعامدىق قورىنىڭ ۆيتسە-پرەزيدەنتى ەرجان اۋباكىروۆ وسىنداي جيىنداردىڭ ماڭىزدىلىعىنا توقتالىپ, ءبىلىم بەرۋ سالاسىنداعى جەتىستىكتەر مەن ۇرپاقتى تاربيەلەۋ جولىندا كەزدەسەتىن تەرىس ادەتتەر مەن زياندى زاتتاردىڭ الدىن الۋ ماسەلەسىن كوتەردى.
جالپى فورۋمنىڭ نەگىزگى ماقساتى – قوعامدا ماڭىزدى ورىن الاتىن وسى بەس كەسەلدىڭ الدىن الۋ جانە ولارمەن كۇرەسۋ جولدارىن قاراستىرۋ. سونىمەن قاتار تسيفرلىق تەحنولوگيالاردى پايدالانۋ ارقىلى جاستاردىڭ ساناسىن جاڭعىرتۋ مەن ادال ازاماتتىق ۇستانىمىن قالىپتاستىرۋ دا فورۋمنىڭ باستى مىندەتتەرىنىڭ ءبىرى. بۇل جيىن ءبىلىم بەرۋ مەكەمەلەرىندەگى تاربيە جۇمىسىن جاقسارتۋعا, تسيفرلىق الەمدە ازاماتتىق جاۋاپكەرشىلىكتى ارتتىرۋعا جانە جاستاردى زياندى ادەتتەردەن ساقتاۋعا ىقپال ەتەتىن ماڭىزدى شەشىمدەر قابىلداۋعا مۇمكىندىك بەرەدى.
ەرجان اۋباكىروۆتىڭ ايتۋىنشا, جاس ۇرپاقتى زياندى ارەكەتتەردەن قورعاۋ ءۇشىن وتباسى مەن مەكتەپ اراسىنداعى ىنتىماقتاستىقتى نىعايتىپ, سانالى ازامات تاربيەلەۋگە باسىمدىق بەرۋ ماڭىزدى.
جيىن اتىراۋ وبلىسىنىڭ ءبىلىم بەرۋ باسقارماسى, اتىراۋ قالاسىنداعى ء«بىلىم-يننوۆاتسيا» ليتسەيلەرى جانە «SilkWay مەكتەپ-ليتسەيى» جشس بىرلەسىپ ۇيىمداستىرىلدى.