بۇگىن قر پرەزيدەنتى جانىنداعى قازاقستاننىڭ ستراتەگيالىق زەرتتەۋ ينستيتۋتىنىڭ (قزسي) ساراپشىلارى مەملەكەت باسشىسىنىڭ كەيىنگى 3 جىلداعى رەفورمالارىنىڭ ناتيجەلەرىن تالقىلادى, دەپ جازادى Egemen.kz.
2022 جىلى سىبايلاس جەمقورلىققا قارسى كۇرەستى كۇشەيتىپ, الەۋمەتتىك ادىلەتتىلىكتى قالپىنا كەلتىرۋ ماقساتىندا قازاقستان زاڭسىز شىعارىلعان اكتيۆتەردى قايتارا باستادى.
2023 جىلى «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭ قابىلداندى. قازىر وسى زاڭ اياسىندا جۇمىستار قارقىندى ءجۇرىپ جاتىر. اكتيۆتەردى قايتارۋ ماسەلەلەرى جونىندەگى كوميسسيانىڭ مالىمەتىنشە, بىلتىر مەملەكەت كىرىسىنە قوسىمشا 900 ملرد. تەڭگەدەن استام قاراجات تارتىلعان.
«2022 جىلدان باستاپ مەملەكەتكە شەتەلدەن قايتارىلعان 750 ملن دوللاردان استام سومانى قوسا العاندا, جالپى سوماسى شامامەن 1,7 ترلن تەڭگەگە اكتيۆ قايتارىلدى. بۇل قاراجات الەۋمەتتىك نىسانداردى سالۋعا, سۋ تاسقىنى سالدارىن جويۋعا جانە وزگە دە وزەكتى ماسەلەلەردى شەشۋگە جۇمسالادى», دەلىنگەن قزسي حابارلاماسىندا.
حالىقارالىق ساراپشىلار زاڭسىز شەتەل اسقان اكتيۆتەردى قايتارۋ ءىسى 1 جىلدان استام ۋاقىتتى تالاپ ەتسە دە الەۋمەتتىك ادىلەتتىلىكتى قالپىنا كەلتىرىپ, ەكونوميكالىق جاعدايدى جاقسارتۋدا ماڭىزدى قادام دەپ باعالايدى.