قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا پرەزيدەنتكە قارجى نارىعىن دامىتۋ سالاسىنىڭ بىلتىرعى قورىتىندىلارى تۋرالى ەسەپ بەردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆقا بانك سەكتورىندا تۇراقتىلىق ساقتالىپ تۇرعانى جونىندە باياندالدى. 2024 جىلدىڭ باسىنان بەرى بانكتەردىڭ اكتيۆتەرى 19,7 پايىزعا, ياعني 61,6 تريلليون تەڭگەگە دەيىن ءوستى. ەكونوميكانى كرەديتتەۋ 20,9 پايىزعا نەمەسە 33,8 تريلليون تەڭگەگە دەيىن ۇلعايدى. بانكتەردىڭ جۇمىس ىستەمەيتىن اكتيۆتەرى – 3,1 پايىزدان تومەن دەڭگەيدە.
اگەنتتىك 21 بانككە جىل سايىنعى قاداعالاۋ-باعالاۋ جۇمىستارىن اياقتادى. سونداي-اق 11 بانكتىڭ اكتيۆى ساپالىق تۇرعىدان باعالانىپ, سترەسس-تەستىلەۋ جۇرگىزىلدى. اتالعان شارا بانك جۇيەسى اكتيۆتەرىنىڭ 85 پايىزىن قامتىدى. بۇعان قوسا, 400 ميلليارد تەڭگە كولەمىندە مەملەكەتتىڭ قولداۋ قاراجاتى مەرزىمىنەن بۇرىن قايتارىلدى.
ءمادينا ابىلقاسىموۆا سترەستىك اكتيۆتەر نارىعىن دامىتۋدى كوزدەيتىن زاڭنامالىق تۇزەتۋلەر قابىلدانىپ, وسى تەكتەس اكتيۆتەردى ساتۋعا ارنالعان العاشقى تسيفرلىق پلاتفورما ىسكە قوسىلعانىن ايتتى.
باسەكەلەستىكتى كۇشەيتۋ ءۇشىن بانك سەكتورىنا وڭتۇستىك كورەيادان, قاتار مەملەكەتىنەن جانە بىرىككەن اراب امىرلىكتەرىنەن شەتەلدىك بانكتەر تارتىلدى.
مەملەكەت باسشىسىنا ناقتى سەكتور مەن بيزنەس سۋبەكتىلەرىن نەسيەلەۋ تۋرالى مالىمەت بەرىلدى. 2024 جىلى بيزنەسكە بەرىلگەن كرەديتتەر 16,3 پايىزعا نەمەسە 13,1 تريلليون تەڭگەگە دەيىن ۇلعايعان. بۇل رەتتە بيزنەسكە 18,2 تريلليون تەڭگە سوماسىنا جاڭا زايمدار بەرىلگەن.
قاسىم-جومارت توقاەۆتىڭ حالىقتىڭ شامادان تىس كرەديت الۋىن تومەندەتۋ جونىندە بەرگەن تاپسىرماسىنا سايكەس, 2024 جىلعى ماۋسىمدا كرەديت بەرۋ كەزىندە تاۋەكەلدەردى بارىنشا ازايتۋ جانە قارىز الۋشىلاردىڭ قۇقىقتارىن قورعاۋ باعىتىندا زاڭ قابىلداندى. سونىمەن قاتار 614 مىڭ ازاماتتىڭ 210 ميلليارد تەڭگە سوماسىنداعى پروبلەمالىق بەرەشەگى قايتا قۇرىلىمدالدى, ءىشىنارا نەمەسە تولىق كەشىرىلدى.
اگەنتتىك توراعاسى ازاماتتاردى قارجىلىق الاياقتىقتان قورعاۋ ماقساتىندا زاڭنامالىق تۇزەتۋلەردىڭ جاڭا توپتاماسى ازىرلەنگەنىن جەتكىزدى.
بۇدان بولەك, مەملەكەت باسشىسىنا ساقتاندىرۋ نارىعىن تسيفرلاندىرۋ ناتيجەسى تانىستىرىلدى. ازاماتتاردىڭ تۇرعىن ۇيلەرىن اپات تاۋەكەلدەرىنەن مىندەتتى ساقتاندىرۋ مودەلى ازىرلەندى. كرەديتتىك رەيتينگ اگەنتتىكتەرى تۋرالى, ينۆەستيتسيالىق جانە ۆەنچۋرلىق قورلار تۋرالى زاڭ جوبالارى دايىندالدى.
كەزدەسۋ سوڭىندا قاسىم-جومارت توقاەۆ اگەنتتىككە قارجىلىق تۇراقتىلىقتى قامتاماسىز ەتۋ, ناقتى سەكتوردى كرەديتتەۋ اياسىن ودان ءارى كەڭەيتۋ, قارجىلىق قىزمەتتەردە تۇتىنۋشىلاردىڭ قۇقىقتارىن قورعاۋ تەتىكتەرىن كۇشەيتۋ جونىندە بىرقاتار مىندەت جۇكتەدى.