تاجىكستان كورمەگە قاتىساتىنىن قۋاتتادى

جاقىندا سىرتقى ىستەر ءمينيسترىنىڭ ءبىرىنشى ورىنباسارى – ەكسپو -2017-ءنىڭ كوميسسارى ءراپىل جوشىباەۆ باستاعان قازاقستان دەلەگاتسياسى تاجىكستان رەسپۋبليكاسىندا جۇمىس ساپارىمەن بولدى. تاجىكستان رەسپۋبليكاسى پرە­مەر-ءمينيسترىنىڭ ءبىرىنشى ورىنباسارى د.سايدپەن, ەكو­نومي­كالىق دامۋ جانە ساۋدا مي­نيس­ترى ن.حەكماتۋللوزودامەن جانە سىرتقى ىستەر ءمينيسترىنىڭ ورىنباسارى پ.داۆلاتزودامەن وتكەن كەزدەسۋدە تاراپتار ەكى ەلدىڭ قارىم-قاتىناس ماسەلەلەرىن تالقىلادى. ەكسپو-2017-ءنىڭ كوميسسارى استانا قالاسىندا وتكىزىلەتىن حالىقارالىق كورمەگە دايىندىق بارىسى تۋرالى اڭگىمەلەپ, قا­زاقستان رەسپۋبليكاسىنىڭ پرە­زيدەنتى نۇرسۇلتان نازارباەۆتىڭ «جاسىل كوپىر» ىنتىماقتاستىق باعدارلاماسى تۋرالى تىلگە تيەك ەتتى. ءوز كەزەگىندە تاجىكستان پرە­مەر-ءمينيسترىنىڭ ءبىرىنشى ورىنباسارى د.سايد ەكى ەل اراسىندا قالىپتاسقان جوعارى تۇسىنىستىك پەن باۋىرلاستىق قارىم-قاتىناستارعا جان-جاقتى توقتالدى. سونىمەن بىرگە, سايد مىرزا تاجىكستان رەسپۋبليكاسى ۇكىمەتى اتىنان ءوز ەلىنىڭ «استانا ەكسپو-2017» حالىقارالىق كورمەسىنە بەلسەنە قاتىساتىنىن اتاپ كورسەتتى. ول تاۋەلسىز قازاق­ستاننىڭ ەلورداسىندا وتە­تىن بۇل جاھاندىق شارا بارى­سىندا دۋشانبە لايىقتى ورىن الاتىندىعىن ايتتى. ەكو­نو­مي­كالىق دامۋ جانە ساۋدا ءمينيسترى ن.حەكماتۋللوزودا استانا قالا­سىنداعى حالىقارالىق كورمەگە تاجىكستان رەسپۋبليكاسىنىڭ قاتىسۋ ماسەلەلەرىن تىلگە تيەك ەتە كەلىپ, كورمەگە قاتىسۋ شارتتارىمەن تانىسۋ قاجەتتىگىن اتاپ كورسەتتى. ەكسپو-2017 كو­ميسسارى ر.جوشىباەۆ ەكىجاقتى ءجۇز­دەسۋلەر بارىسىندا ەلىمىزدە وتەتىن بۇكىلالەمدىك جەتىستىكتەر كورمەسى تاقىرىبىنىڭ ماڭىز­دىلىعىنا توقتالىپ, ونىڭ ءوڭىر­دەگى بالاما قۋات كوزدەرىنىڭ دامۋىنا سەرپىندى ىقپال ەتەتىندىگىن ناقتى مىسالدارمەن اشىپ كور­سەتتى. سونىمەن بىرگە, تاراپتار تاۋ-كەن مەتاللۋرگيا ونەر­كاسىبىندە, كولىك جانە ەنەرگەتيكا سالاسىندا بەلگىلەنگەن بىرىككەن جوبالاردىڭ ءىس جۇزىنە اسىرىلۋ ماسەلەلەرىن تالقىلادى. الەمدىك ەكونوميكاداعى كەلەڭسىز جاعدايلارعا قاراماستان, ەكى ەل اراسىنداعى ساۋدا-ەكونوميكالىق بايلانىستىڭ جان-جاقتى دامىپ وتىرعاندىعىن اتاپ كورسەتتى. سىرتقى ىستەر ءمينيسترىنىڭ ورىنباسارى پ.داۆلەتزودامەن بولعان كەزدەسۋدە تاجىكستاندا قازاقستاننىڭ مادەني كۇندەرىن وتكىزۋ ماسەلەلەرى تىلگە تيەك ەتىلدى. ازىرلەگەن جىلقىباي جاعىپار ۇلى, «ەگەمەن قازاقستان».