الماتى وبلىسىنىڭ تابيعات قورعاۋ پروكۋراتۋراسى سۋ رەسۋرستارىن باسقارۋ سالاسىندا مەملەكەتتىڭ مۇددەلەرىن قورعاۋ بويىنشا اۋقىمدى جۇمىس جۇرگىزدى. ناتيجەسىندە 8 سۋ قويماسى مەملەكەتتىڭ مەنشىگىنە قايتارىلدى, دەپ حابارلايدى Egemen.kz.
باس پروكۋراتۋرانىڭ حابارلاۋىنشا, قاداعالاۋ قىزمەتى بارىسىندا سەنىمگەرلىكپەن باسقارۋشىلار تاراپىنان بۇزۋشىلىقتار انىقتالعان. ولار 8 سۋ قويماسىنىڭ ءتيىستى تەحنيكالىق جاي-كۇيىن ساقتاۋ جونىندەگى شارتتىق مىندەتتەمەلەردى ەلەمەي, سۋ شارۋاشىلىعى جۇيەلەرى مەن قۇرىلىستارىنا تەكسەرۋ جۇرگىزبەگەن.
«بۇل جاعدايلار حالىقتىڭ ءومىرى مەن دەنساۋلىعىنا, قورشاعان ورتاعا دا كەرى اسەر ەتۋى مۇمكىن. قابىلدانعان شارالاردىڭ ارقاسىندا جوسىقسىز باسقارۋشىلارمەن 8 شارت بۇزىلدى, ال 20 ملرد تەڭگەدەن استام سومانىڭ مۇلكى مەملەكەت مەنشىگىنە قايتارىلدى», دەلىنگەن حابارلامادا.
قازىرگى تاڭدا پروكۋرورلىق قاداعالاۋ اكتىسى بويىنشا ۋاكىلەتتى ورگاندار سۋ وبەكتىلەرىن كوپ فاكتورلى تەحنيكالىق تەكسەرۋ بويىنشا جۇمىس جۇرگىزىپ جاتىر.