وسكەمەن. 5 اقپان. بيىل ەلىمىزدە قازاقستان حالقى اسسامبلەياسىنىڭ 20 جىلدىعى, ۇلى جەڭىستىڭ 70 جىلدىعى, قازاق حاندىعىنىڭ 550 جىلدىعى جانە ۇلى ابايدىڭ 170 جىلدىعى مەرەكەلەنەدى. اتالعان مەرەيتويلار شەڭبەرىندە شىعىس وڭىرىندە 4500-دەن استام ءىس-شارا وتەتىن بولادى. وعان 500 مىڭنان استام ادام قاتىسادى دەپ كۇتىلۋدە. بۇل تۋرالى egemen.kz ءتىلشىسى حابارلادى.
وبلىستىق اقپارات ورتالىعىندا ءباسپاسوز وكىلدەرىمەن وتكىزگەن بريفينگ بارىسىندا وبلىس اكىمىنىڭ ورىنباسارى جاقسىلىق ومار اتالعان مەرەيتويلاردىڭ وڭىردە كەڭىنەن اتالىپ وتەتىنىن جەتكىزدى.
«اۋقىمدى مەرەيتويلىق شارالاردى وتكىزۋدىڭ ۇلتتىق جوسپارى ازىرلەنىپ, بەكىتىلدى. وسى كەستەگە سايكەس, وبلىس دەڭگەيىندەگى شارالار جوسپارى دا ءوڭىر باسشىسى دانيال احمەتوۆتىڭ ماقۇلداۋىمەن بەكىتىلدى. بۇل شارالار جىل بويى بارلىق قالالار مەن اۋدانداردا وتەتىن بولادى», – دەدى جاقسىلىق ومار.
ەرتەڭ بۇكىل قازاقستاندىقتاردىڭ قاتىسۋىمەن اشىلاتىن «قازاقستان حالقى اسسامبلەياسىنىڭ جىلى» سينحرون-اكتسياسى وسكەمەندەگى كومسومول ارالىندا اشىق اسپان استىندا وتەدى. اسسامبلەيا جىلىنىڭ اشىلۋى اياسىندا «قازاقستان حالقى اسسامبلەياسىنىڭ 20 جىلدىعىنا – 20 قايىرىمدى ءىس!» اتتى ەستافەتا ۇيىمداستىرىلادى. وعان وڭىردەگى بارلىق ەتنومادەني بىرلەستىكتەردىڭ وكىلدەرى قاتىسادى. سونداي-اق وبلىستا 9 دوستىق ءۇيى جۇمىس ىستەۋدە. «مەرەيتوي جىلى ءبىز وسى دوستىق ۇيلەرى مەن ەتنومادەني ۇيىمدار اراسىندا «كۇشىمىز – بىرلىكتە!» اتتى سپارتاكيادا وتكىزۋدى ۇيعارىپ وتىرمىز», – دەدى وبلىس اكىمىنىڭ ورىنباسارى.
ۇلتارالىق تاتۋلىقتى ساقتاۋدا شىعىس قازاقستان وبلىسىنىڭ ۇنەمى تىڭ يدەيالارىمەن كوش باستاپ كەلە جاتقانى بەلگىلى. وسى ورايدا وبلىس بويىنشا اسسامبلەيا جىلىنا ارنالعان 100-دەن اسا ءىس-شارا وتەتىنىن ايتا كەتكەن ءلازىم.
دۋمان اناش.
دەرەك: egemen.kz.
سۋرەت: شىعىس قازاقستان اقپاراتتىق ورتالىعى.