تۋريزم جانە سپورت ءمينيسترىنىڭ ورىنباسارى ەرجان ەركىنباەۆ 2024 جىلدىڭ 9 ايىنىڭ قورىتىندىسى بويىنشا تۋريزم سالاسىنىڭ نەگىزگى كورسەتكىشتەرى وسكەنىن مالىمدەدى, دەپ جازادى Egemen.kz.
قوناقۇيلەردە تۇراتىن ىشكى تۋريستەر سانى شامامەن 6 ملن ادامدى قۇراعان. بۇل كورسەتكىش 2023 جىلدىڭ سايكەس كەزەڭىمەن سالىستىرعاندا 600 مىڭعا ارتىق.
«جالپى, جۇمىسقا نەمەسە تۇراقتى تۇرۋعا كەلگەندەردى ەسەپكە الماعاندا, ءارتۇرلى تۋريستىك ماقساتتارمەن ەلگە 15,3 ميلليون شەتەلدىك قوناق كەلدى. ونىڭ ىشىندە 10,4 ملن ادام بىزدە 1 كۇننەن استام ۋاقىت وتكىزدى, ءبىز ولاردى شەتەلدىك تۋريستەر رەتىندە قاراستىرامىز», دەدى ەرجان ەركىنباەۆ.
شەتەلدىك تۋريستەردى تارتۋ ەكونوميكانى دامىتۋدا شەشۋشى ءرول اتقارادى. شەتەلدىك تۋريستەر 2024 جىلى ەلىمىزدىڭ اۋماعىندا 1,2 ترلن تەڭگەدەن استام قاراجات جۇمساعان.
«تۋريستەر ەڭ كوپ كەلەتىن وڭىرلەر قاتارىندا الماتى (+146%), قىزىلوردا (+101%) جانە جەتىسۋ (+62,1%) وبلىستارى بار. شەتەلدىك تۋريستەردى تارتۋ بويىنشا ايماقتار بولىنىسىندە كەيبىر ايماقتاردا وتكەن جىلمەن سالىستىرعاندا تەرىس ديناميكا بار», تۋريزم جانە سپورت ءمينيسترىنىڭ ورىنباسارى.
2024 جىلدىڭ قورىتىندىسى بويىنشا تۋريزم سالاسىنداعى نەگىزگى كاپيتالعا سالىنعان ينۆەستيتسيا مولشەرىندە وڭ سەرپىن بايقالعان.
«ەڭ ۇلكەن ءوسىم باتىس قازاقستان وبلىسىنا تيەسىلى – 196,2%, ۇلىتاۋ وبلىسىندا – 84,2%, قىزىلوردا وبلىسىندا –63% تىركەلدى. 5 ايماق وتكەن جىلدىڭ سايكەس كەزەڭىمەن سالىستىرعاندا تەرىس ءوسۋ قارقىنىن كورسەتىپ وتىر. سونىمەن قاتار 2024 جىلى جوسپارلى كورسەتكىشتى 9 وبلىس ورىنداماعان», دەدى ەرجان ەركىنباەۆ.