قازاق كىلەمى – الەمدىك نارىقتا

«بال تەكستيل» فابريكاسى 2013 جىلى جۇمىسىن باستاپ, قىسقا ۋاقىت ىشىندە وتاندىق كىلەم ءوندىرىسىنىڭ كوشباسشىسىنا اينالىپ ۇلگەردى. العاشقى كىلەمدەر سول جىلدىڭ قازان ايى­نان باستاپ شىعارىلا باستا­عان. كومپانيا ەندى اياققا تۇر­عان كەزەڭدە فابريكادا نەبارى ءتورت-اق ستانوك جۇمىس ىستەپ تۇرعان. بۇگىندە ولاردىڭ سانى 17-گە جەتتى. ارادا ەكى جىل وتكەن سوڭ 2015 جىلى پوليپروپيلەن جىپتەرىن وندىرەتىن تسەح ىسكە قوسىلدى. 2023 جىلدىڭ ناتيجەسى بويىنشا فابريكادا ءجىپ ءوندىرىسى ەكى ەسە ارتتى. وسى كۇندە كىلەم توقۋ كاسىپورنىنىڭ وندىرىستىك قۋاتى جىلىنا 6 ملن شارشى مەتر كىلەم مەن 7 500 توننا پوليپروپيلەن ءجىبىن قۇرايدى. «بال تەكستيل» كىلەمدەرى بەلگيالىق «Van de Wiele» كومپانياسىنىڭ زاماناۋي جابدىقتارىندا توقىلادى. كىلەم تىعىزدىعى 1 شارشى مەتر­گە 300 مىڭنان 3,6 ملن-عا دەيىنگى تۇيىندەردەن تۇرادى.

فابريكانىڭ ونىمدەرى تمد ەلدەرىنە, سونداي-اق باسقا دا الىس-جاقىن شەتەل­دەر­گە ەكسپورتتالادى. الداعى ۋاقىتتا كومپانيا ەكسپورت­تىق الەۋەتىن ارتتىرىپ, كىلەم­دەر­دى دۇنيەجۇزىنىڭ ۇلكەن نارىق­تارىندا ساتۋدى كوزدەپ وتىر.

«بال تەكستيل» «CFE 2025 Carpet and Flooring Expo» كورمەسىنە قاتىسۋ ارقىلى الدىنا بىرقاتار ماقسات قويدى. اتاپ ايتقاندا, ساتىلىم اياسىن كەڭەيتۋ, الەمدىك كىلەم ءوندىرىسى كوشباسشىلارىنا وتاندىق كىلەم­دەر­دى تانىستىرۋ, الەمدىك نارىقتا قازاق كىلەمى مەن جوعارى ساپانىڭ ءرامىزى رەتىندە «Bal Carpet» برەندىن قالىپتاستىرۋ. وسى كورمە بارىسىندا B2B كەزدەسۋلەر وتكىزىلىپ, فابريكانىڭ جاڭا كىلەم ۇلگىلەرى تانىستىرىلدى. ودان بولەك, قوناقتارعا كىلەمنىڭ «Millenium», «Estate», «The MOD» سياقتى پرەميۋم ساناتتاعى ۇلگىلەرى ۇسىنىلدى.

سونداي-اق كەلۋشىلەر «Bomonti», «Graf», «Grant», «Tron», «Viano», «Venus», «Aura», «Eva», «Oscar», «Flora» سەكىلدى كىلەم تۇر­لەرىن تاماشالاۋعا مۇمكىندىك الدى.

«ىستانبۇل قالاسىندا وت­كەن حا­لىق­­ارالىق كورمەدە ءبىز قازاق كى­لە­مىن توقۋدان شەبەر­لىك قابى­لەتى­مىزدى كورسەتىپ قانا قويماي, ولاردى شەتەلگە ەكسپورتتاۋ بويىنشا دا ماڭىزدى قادام­ جاساپ قايتتىق. سونىڭ ىشىن­دە وزبەكستان, بەلارۋس, ازەربايجان ەلىنەن كەلگەن كليەنتتەرمەن بەرىك ىسكەرلىك بايلانىس ورناتتىق. رەسەي­لىك سەرىكتەستەرمەن دە كەلىسىم­شارت جاساسۋ تۋرالى ماڭىزدى مامىلەگە قول جەتكىزدىك. وسىلاردىڭ ناتيجەسىندە كومپانيا ونىمىنە حالىقارالىق سۇرانىس ارتىپ, جاڭا نارىققا شىعۋعا مۇمكىندىك اشىلادى دەپ سەنەمىز. ءبىز شەتەل نارىعىندا ۇلكەن سۇرانىسقا يە بولاتىن برەندتىك ونىمدەردى كوبىرەك شىعارۋىمىز كەرەك. وتاندىق كىلەم ونىمدەرى سول ماقساتقا جەتۋدىڭ العاشقى قادامدارى بولادى دەگەن ۇمىتتەمىز», دەيدى «بال تەكستيل» باسشىسى ت.ىسقاقوۆ.

وتاندىق توقىما فابريكاسى بىلتىر استانادا وتكەن شانحاي ىنتىماقتاستىق ۇيى­مى­نىڭ ماڭىز­دى جيىنىن­دا جوعارى مارتەبەلى قوناق­تاردى قابىل­دايتىن ورىندار مەن زالداردىڭ بارلىعىنا ءوزى­نىڭ كىلەمدەرىن بىرەگەي ۇلگىدە ءارى ەرەكشە سانمەن توقىپ بەردى. ەل مارتەبەسىن اسىرۋ جولىندا جاساعان وسى ەڭبەگى ءۇشىن كومپانيا مەملەكەت اتىنان العىس پەن ۇلكەن قۇرمەتكە بولەندى.

2025 جىلى قىتاي نارىعىنا جول اشىپ, ساۋدا-ساتتىق بايلانىستى كۇشەيتۋدى نەگىزگى جوسپار مەن ماقسات رەتىندە قاراستىرىپ وتىر.

سونىمەن بىرگە كاسىپورىن «جۇ­مىس­شى ماماندىقتار جىلىنا» وراي قاراپايىم ەڭبەككەر­لەردى الەۋمەتتىك تۇرعىدان قامتا­ما­سىز ەتۋ جۇمىسىن كۇشەيتە تۇسپەك.

شىمكەنت