كسرو جانە قازاقستاننىڭ حالىق ءارتىسى ءاسانالى ءاشىموۆ قىزدار ۋنيۆەرسيتەتىندە قوناقتا بولىپ, ستۋدەنت جاستارمەن كەزدەستى. «قىز جىبەكتەر» ورتاسىنان تابىلعان تانىمال اكتەرمەن كەزدەسۋ اتالمىش وقۋ ورنىنىڭ انالارعا ارنالعان «اقتۇمار» مۇراجايىن ارالاۋدان جانە «قازاقتىڭ ءاسانالىسى» اتتى ارنايى ۇيىمداستىرىلعان فوتو جانە كىتاپ كورمەسىنەن باستاۋ الدى.
ايگىلى اكتەر شىعارماشىل جاستار كوپ جينالعان كەزدەسۋ بارىسىندا جاستارعا ونەر مەكتەبىمەن قاتار, ءومىر مەكتەبىنەن بىلگەن, تۇيگەندەرىمەن, العان ساباقتارىمەن, حوببيلەرىمەن, اكتەر ەڭبەگىمەن, ونەر جولىنداعى قىزىقتى وقيعالارىمەن, جەتىستىك, اتاق, ابىرويعا جەتۋدىڭ, جاستىقتى ساقتاۋدىڭ قىر-سىرىمەن ءبولىسىپ, عيبراتتى دا ونەگەلى عۇمىرىنان جاستارعا ەستەلىكتەر ايتىپ بەردى.
ءوزى دە ونەر اكادەمياسىندا شاكىرت تاربيەلەپ جۇرگەن تۇلعا ۇستازداردىڭ ءرولىن, قىزدار ۋنيۆەرسيتەتىنىڭ بۇگىنگى قوعامدا الاتىن ءرولىن تىلگە تيەك ەتىپ, قاراكوز قارىنداستارىنا «قازاق قىزى قانداي بولۋى كەرەك؟» دەگەن سۇراققا وسيەت-ونەگەسىن ايتتى. كوزى تىرىسىندە اڭىزعا اينالعان تۇلعا ستۋدەنتتەر تاراپىنان قويىلعان تولاسسىز سۇراقتارعا جالىقپاستان, تۇششىمدى جاۋاپ بەردى. ءوز كەزەگىندە كەزدەسۋگە ءدان ريزا بولعان اقىنجاندى ارۋ قىزدار مازمۇندى كەزدەسۋدەن تۋعان ارناۋ ولەڭدەرىن وقىپ بەردى.
– مەن ءۇشىن بۇگىن تاريحي كۇن. كۇندەلىگىمە ەنەتىن كۇن. بۇگىنگى كەزدەسۋ ماعان شابىت بەردى, قاناتتاندىردى. قاراپ وتىرسام, قىزدار ۋنيۆەرسيتەتىنە وسىدان 45 جىل بۇرىن كەلىپپىن. قاراكوز قىزدارىما تەك باقىت تىلەيمىن! قازاق قىزدارى قاشاندا يناباتتى, ءتارتىپتى, يبالى بولسا دەيمىن. ويتكەنى, ەلدىڭ, ۇلتىمىزدىڭ نامىسى ءبىزدىڭ قىزدارىمىز, قىزدارىنا قاراپ, ەلىن تانيدى. قازاق قىزى قاشاندا ارلى, نامىستى بولۋى كەرەك», دەگەن ا.ءاشىموۆ كەزدەسۋ سوڭىندا سوڭعى شىققان 7 تومدىق تاڭداۋلى كىتابىن قىزدار ۋنيۆەرسيتەتىنە سىيعا تارتتى.
شارا بارىسىندا وقۋ ورنىنىڭ باسشىسى دينار نوكەتاەۆا جارتى عاسىردان استام ۋاقىت بويى ونەرىمەن قالىڭ جۇرتىنا قالتقىسىز قىزمەت ەتىپ كەلە جاتقان كورنەكتى اكتەر, رەجيسسەر, ونەر جانە قوعام قايراتكەرى ءاسانالى ءاشىموۆتىڭ يىعىنا قازاقى سالت-داستۇرمەن شاپان جاپتى. مارتەبەلى قوناقپەن كەلگەن قوساعى باعداتقا دا قوشەمەت كورسەتىلدى. قازاق ساحنا ونەرىنىڭ مايتالمانى ءاسانالى ءاشىموۆ, سونىمەن قاتار, وقۋ ورنىنىڭ ەڭ ۇلكەن ماراپاتى – «ۇلاعات» التىن مەدالىمەن ماراپاتتالدى.
تاعىلىمدى كەش «جان سارايى» دراما تەاترىنىڭ «قىز جىبەك» قويىلىمىمەن اياقتالدى.
ايناش ەسالي,
«ەگەمەن قازاقستان».
الماتى.