بۇگىن الماتىداعى ن.ساتس اتىنداعى بالالار مەن جاسوسپىرىمدەرگە ارنالعان مەملەكەتتىك اكادەميالىق ورىس تەاترىنىڭ باس رەجيسسەرى يرينا سيمونوۆا 80-ءشى جىلدارى سالىنعان, مادەنيەت پەن ونەردىڭ ورتالىعى بولعان ونەر ورداسىنىڭ عيماراتى قيراۋ الدىندا تۇرعانىن, ەشقاشان كۇردەلى جوندەۋ كورمەگەنىن ايتتى, دەپ جازادى Egemen.kz.
«بۇگىندە عيمارات قىزمەتكەرلەر مەن سۋرەتشىلەر ءۇشىن دە, كورەرمەندەر ءۇشىن دە قاۋىپتى ورىنعا اينالدى. قاپتالعان پليتالاردىڭ قۇلاپ قالۋى دا عاجاپ ەمەس, ال بۇل ءوتىپ بارا جاتقان ادامداردىڭ ومىرىنە قاۋىپ توندىرەدى. ءىشى دە جەتىسىپ تۇرعان جوق. جاڭبىر جاۋسا تەاتر ىشىندەگى كورىنىستەردى, اۋديتوريا, كيىم اۋىستىراتىن بولمەلەر مەن قوسالقى بولمەلەردى سۋ باسىپ قالادى. كورەرمەندەر زالىنىڭ ەدەنى الدەقاشان توزعان, اعاش پالۋبا دا جۇكتەمەگە توتەپ بەرە المايدى», دەدى.
باس رەجيسسەردىڭ ايتۋىنشا, كۇردەلى جوندەۋ جۇرگىزۋ قاجەتتىلىگى تۋرالى ماسەلە بىرنەشە جىلدان بەرى كوتەرىلىپ كەلەدى. عيماراتتا سونىمەن قاتار تەاتر شەبەرحانالارى مەن تسەحتارىن, دەكوراتسيالاردى ساقتاۋعا ارنالعان قويمالاردى ورنالاستىرۋعا بولاتىن قوسالقى بولمەلەر جەتىسپەيدى.
ء«بىز قالا اكىمدىگى مەن الماتى اكىمى ەربولات دوساەۆتىڭ تىكەلەي قولداعانىنا ريزامىز. تەاتردا بارلىق جابدىقتى اۋىستىرىپ, كۇردەلى جوندەۋ جۇرگىزىپ قانا قويماي, سونىمەن قاتار ادەمى گالەرەيانى بۇرىننان بار عيماراتپەن قوساتىن جاڭا عيمارات سالادى دەپ كۇتكەن جوقپىز. ەندى جاڭا عيمارات سالىنسا, وعان 200 كورەرمەن ورنى بار كامەرالىق ساحنا ورنالاسادى. زاماناۋي تەحنولوگيالىق شەشىمدەرمەن جابدىقتالعان ەكى جاڭا ساحنا ءبىزدىڭ تەاترعا جوعارى دەڭگەيلى تەاتر ورتالىعى بولۋعا مۇمكىندىك بەرەدى. بۇل زاماناۋي تەاتر قويىلىمدارىن جۇزەگە اسىرۋعا, ءىرى تەاتر كومپانيالارىنىڭ گاسترولدەرىن وتكىزۋگە, كورمەلەر, دارىستەر مەن كونتسەرتتەر ۇيىمداستىرۋعا مۇمكىندىكتەر اشادى. تەاتر بالالاردى, جاسوسپىرىمدەردى جانە ەرەسەكتەردى تارتا وتىرىپ, بۇكىل وتباسى ءۇشىن مادەني ورىنعا اينالادى. ءبىز كورەرمەندەردىڭ كوڭىلىن كوتەرىپ قانا قويماي, ءالى دە جوعارى ميسسيانى لايىقتى اتقارىپ كەلەمىز», دەدى يرينا سيمونوۆا.