كۇنى كەشە وتكەن ۇكىمەتتىڭ كەڭەيتىلگەن وتىرىسىندا 2024 جىلعى اتقارىلعان جۇمىستار قورىتىندىلانىپ, الداعى كەزەڭنىڭ باستى مىندەتتەرى ايقىندالدى. وسى ورايدا قر پرەزيدەنتى جانىنداعى قسزي ستراتەگيالىق تالداۋ ءبولىمىنىڭ باسشىسى ەلنار بەرىكباەۆ جيىندا تالقىلانعان ماسەلەلەرگە قاتىستى ءوز پىكىرىن ءبىلدىردى, دەپ جازادى Egemen.kz.
ەلنار بەرىكباەۆتىڭ ايتۋىنشا, ازاماتتاردى الەۋمەتتىك قولداۋعا باعىتتالعان مەملەكەتتىك باستامالار مەن الەۋمەتتىك تولەمدەردىڭ ۇلعايۋى ءوزىن-ءوزى قامتاماسىز ەتە الاتىن كەيبىر ادامداردىڭ وسى قاراجاتتى الۋعا ۇمتىلۋىنا ەرىكسىز اكەلەدى.
«قاسىم-جومارت كەمەل ۇلى كومەك شىن مۇقتاج جاندارعا عانا كورسەتىلۋى كەرەك ەكەندىگىن اتاپ ءوتتى. مەملەكەت باسشىسى قازاقستانعا اقشا تابۋ ءۇشىن كەلەتىن ەڭبەك ميگرانتتارىن مىسالعا كەلتىرىپ, ماسىلدىقتى ارتتىرماۋعا شاقىردى. پرەزيدەنت جاستاردى ەڭبەكسۇيگىشتىككە, زەيىندىلىككە, وتانسۇيگىشتىككە تاربيەلەۋدىڭ ماڭىزدىلىعىن بىرنەشە رەت اتاپ ءوتتى», دەدى ساراپشى.
وسى جىلدى مەملەكەت باسشىسى «جۇمىسشى ماماندىقتارى جىلى» دەپ جاريالاعىنى بارىمىزگە ءمالىم. جۇمىسشى ماماندىقتارىنىڭ بەدەلىن ارتتىرۋ, تەحنيكالىق جانە كاسىپتىك ءبىلىم بەرۋدى رەفورمالاۋ ماقساتىندا ۇكىمەت «جۇمىسشى ماماندىقتارى جىلىن» وتكىزۋ بويىنشا رەسپۋبليكالىق جوسپاردى بەكىتتى.
وسى رەتتە ساراپشى ەلىمىزدىڭ بارلىق وڭىرلەرىندە جۇمىسشى ماماندىقتارى جىلىنا ارنالعان جوسپارلار ازىرلەنىپ, ونىڭ ىشىندە جۇمىسشى ماماندىقتاردىڭ بەدەلىن ارتتىرۋ, كادرلاردى دايارلاۋ ساپاسىن ارتتىرۋ, جۇمىس بەرۋشىلەرمەن ءوزارا ءىس-قيمىلدى كەڭەيتۋ شارالارى قاراستىرىلعانىن تىلگە تيەك ەتتى.
«بۇل جۇمىسقا بيزنەستى كەڭىنەن تارتۋدى قامتاماسىز ەتۋ ءۇشىن بارلىق تەحنيكالىق جانە كاسىپتىك ءبىلىم بەرۋ ۇيىمدارى ءۇشىن مەملەكەتتىك تاپسىرىس كولەمى ۇلعايتىلىپ, تەڭەستىرىلەدى. ءوز كەزەگىندە اكىمدەر كاسىپكەرلەرمەن بىرلەسە وتىرىپ, وڭىرلەر ءۇشىن باسىم ماماندىقتاردى انىقتاپ, سۇرانىسقا يە كادرلاردى دايارلاۋ ءۇشىن كوللەدجدەرگە باعىت-باعدار بەرە الادى», دەدى ە.بەرىكباەۆ.
سونىمەن قاتار ساراپشى جيىندا تالقىلانعان قوعامدىق سانادا قۇقىق ءتارتىبىن ساقتاۋ جانە قۇقىق بۇزۋشىلىقتارعا «مۇلدەم توزبەۋشىلىك» قاعيداتىن قالىپتاستىرۋ ماڭىزدىلىعىنا توقتالدى.
«مەملەكەت باسشىسىنىڭ ايتۋىنشا, شەكتەۋلەر نەمەسە ايىپپۇلدار ەنگىزۋ كەزىندە پاراساتتىلىقتى باسشىلىققا الۋ كەرەك. ايىپپۇل – اكىمشىلىك قۇقىقتا ەڭ كوپ قولدانىلاتىن ماجبۇرلەۋ ىقپال ەتۋ شاراسى. ايىپپۇلدىڭ نەگىزگى ماقساتى – زاڭسىز ارەكەتتەردىڭ جولىن كەسۋ جانە الدىن الۋ. سونىمەن قاتار, ايىپپۇلدار دا شامادان تىس بولماۋى كەرەك», دەدى قسزي ستراتەگيالىق تالداۋ ءبولىمىنىڭ باسشىسى.