مەملەكەت باسشىسى قاسىم-جومارت توقاەۆ بۇگىن ۇكىمەتتىڭ كەڭەيتىلگەن وتىرىسىندا قورىتىندى ءسوز سويلەدى. وسى ورايدا استاناداعى «مەملەكەت تاريحى» ينستيتۋتىنىڭ عىلىمي-اقپارات ءبولىمىنىڭ باسشىسى ەركەبۇلان امانعوسوۆتان پىكىر ءبىلدىرۋىن سۇراعان ەدىك.
ەركەبۇلان رۋسلانبەك ۇلىنىڭ ايتۋىنشا, پرەزيدەنتتىڭ سويلەگەن ءسوزى –اعىمداعى ەكونوميكالىق-الەۋمەتتىك ماسەلەلەرگە عانا قاتىستى ەمەس, بۇنى – مەملەكەت, بيزنەس جانە قوعام اراسىنداعى «جاڭا قوعامدىق كەلىسىم-شارتتى قالىپتاستىرۋ باعىتىنداعى ماڭىزدى ءبىر قادام», دەپ باعامداۋعا بولادى.
«پرەزيدەنت ءوز سوزىندە جاقىن مەرزىمدەگى باسىمدىقتار مەن الەۋمەتتىك ماسەلەلەرگە كوپ كوڭىل ءبولدى. ونىڭ ىشىندە قارجىلىق تۇراقتىلىقتى قامتاماسىز ەتۋ, ينفراقۇرىلىمدى دامىتۋ, ءبىلىم ماسەلەسى جان-جاقتى ايتىلدى. وسى تۇستا «جاڭا قوعامدىق كەلىسىم-شارت» دەگەن ماعىنا تۇرعىسىندا ايتا كەتسەم, قازىرگى تاڭدا مەملەكەتتىڭ بارلىق كىرىس-شىعىسىنا دەيىن ادىلەتتىلىكتى قامتاماسىز ەتۋ, ينۆەستيتسيالىق تارتىمدىلىقتى كۇشەيتۋ بويىنشا بىرنەشە باسىمدىقتار مەن باستامالارعا كۋا بولدىق. مىسالى, بىلتىرعى رەفەرەندۋم تۇرعىسىندا سالىنۋعا ءتيىستى ءبىر اتوم ەلەكتر ستانتسياسىنان كەيىن الداعى ۋاقىتتا ەكىنشى جانە ءۇشىنشى اەس سالىناتىنى جانە سول ارقىلى ەلدىڭ ەنەرگەتيكالىق قاۋىپسىزدىگى مەن مەملەكەت پەن ۇلت مۇددەسىنە تيەسىلى باسىمدىقتارعا كوڭىل ءبولىنىپ وتىرعانىن كوردىك. وسى باستامالاردىڭ ار جاعىندا سلانتس مۇناي كەن ورىندارىنىڭ يگەرىلۋى سەكىلدى جوسپارلار ۇكىمەت تاراپىنان اتالىپ, ستراتەگيالىق شەشىمدەردىڭ قابىلدانۋىنا باسىمدىق قوسىلدى», دەدى ەركەبۇلان امانعوسوۆ.
سونداي-اق, ونىڭ پىكىرىنشە تەحنيكالىق-كاسىپتىك ءبىلىم بەرۋ جۇيەسىن رەفورمالاۋ ماڭىزدى, ويتكەنى بۇل – جاڭا سالالار بويىنشا بىلىكتى كادرلاردى دايارلاۋعا دەگەن قاجەتتىلىكتەن تۋىنداپ وتىر. سونىمەن قوسا مەملەكەت باسشىسىنىڭ باستاماسىمەن «جايلى مەكتەپ» ۇلتتىق جوباسى شەڭبەرىندە جاڭا مەكتەپتەردىڭ كوپتەپ سالىنۋى – ءۇش اۋىسىمدى مەكتەپتەردى ازايتۋعا باعىتتالعان ۇلكەن ستراتەگيالىق ءىس-شارا.
«بۇنىڭ بارلىعى – مول قارجىنى تالاپ ەتەدى. سوندىقتان سول باستامالاردىڭ شەڭبەرىندە «جاڭا قوعامدىق كەلىسىم-شارتتىڭ» جاتقاندىعىن بايقايمىز, ارينە, بۇل بەلگىلى ءبىر دەڭگەيدە بيۋدجەتتىك شىعىنداردىڭ اشىق بولۋىن تالاپ ەتەدى جانە بيزنەس تاراپىنىڭ مەملەكەت پەن قوعام الدىنداعى جاۋاپكەرشىلىگىن ارتتىرۋدى كوزدەيدى», دەپ تۇيىندەدى الەۋمەتتانۋشى ەركەبۇلان امانعوسوۆ.