ەلىمىزدە ەرەكشە قاجەتتىلىكتەرى بار ازاماتتاردىڭ قۇقى مەن قوعاممەن ارالاسۋىنا بارىنشا جاعداي جاسالعان. وسىنداي يگى قامقورلىقتىڭ ارقاسىندا قازاقستاننىڭ بوچچا فەدەراتسياسى مۇگەدەكتىگى بار جاندارعا جان-جاقتى قىزمەت كورسەتىپ كەلەدى.
ءاۋ باستا ەلىمىزدەگى بوچچا فەدەراتسياسى وسىدان ءتورت جىلعا جۋىق ۋاقىت بۇرىن مۇگەدەكتىگى بار بالالاردى تاربيەلەپ وتىرعان اتا-انالار مەن «تەڭ مۇمكىندىكتەر الەمى» قوعامدىق قورى جاتتىقتىرۋشىلارىنىڭ باستاماسىمەن ىرگەسىن قالادى. فەدەراتسيانىڭ قازاقستان اۋماعىندا 10 فيليالى جۇمىس ىستەيدى. ولاردىڭ ارقايسىسى ءوز وڭىرىندە قىرۋار شارۋانى قولعا الىپ وتىر دەسەك, قاتەلەسپەيمىز.
جالپى, فەدەراتسيا دارىندى سپورتشىلاردىڭ كاسىبي بىلىكتىلىگىن ارتتىرۋ جانە ولاردى حالىقارالىق بوچكا جارىستارىنا, سونىڭ ىشىندە پاراليمپيادا ويىندارىنا ودان ءارى شىعارۋ ماقساتىندا قۇرىلعان. ۇجىم وسى ماقساتقا جەتۋ جولىندا ۇلكەن جەتىستىكتەرگە جەتتى. نەبارى ءتورت جىلعا جەتەر-جەتپەس ۋاقىت ىشىندە قاۋىمداستىق قازاقستان رەسپۋبليكاسى ۇلتتىق پاراليمپيادالىق كوميتەتىنىڭ قۇرمەتىنە يە بولدى, اككرەديتاتسيا الدى, بوچچانى قازاقستان رەسپۋبليكاسى سپورت تۇرلەرىنىڭ تىزىلىمىنە ەنگىزۋگە قول جەتكىزدى. سونىمەن بىرگە, ۇلتتىق قۇراما جاساقتالدى, ءبىرىنشى رەسپۋبليكالىق اشىق ءتۋرنيردى دە ۇيىمداستىرىپ ۇلگەردى. قازاقستان چەمپيوناتىن دا وتكىزدى.
قازاقستاندىق بوچچا فەدەراتسياسى رەسمي تۇردە حالىقارالىق بوچچا فەدەراتسياسىنا – Boccia International Sports Federation (BISFed) مۇشەسى بولدى. مۇنىڭ ۇلكەن جەتىستىككە بالاۋ كەرەك, ويتكەنى بۇل فەدەراتسياعا مۇشە بولۋ ەرەكشە قازاقستاندىق سپورتشىلار ءۇشىن جاڭا مۇمكىندىكتەر اشادى.
سونداي باياندى باستامالاردىڭ ءبىرى رەتىندە فەدەراتسيانىڭ قايىرىمدىلىقپەن اينالىساتىن ىسكەر ازاماتتاردى بىرىكتىرەتىن الەۋمەتتىك ماڭىزى بار جوبانى – مەتسەناتتار كلۋبىن قۇرۋدى قولعا العانىن اتاپ وتۋگە بولادى. بۇل كلۋب فەدەراتسياعا ينكليۋزيۆتى بوچچا ويىنىن دامىتۋعا كومەكتەسۋدى جانە مۇگەدەكتىگى بار سپورتشىلارعا قولداۋ كورسەتۋدى ماقسات تۇتادى. جالپى, دەنساۋلىق ساقتاۋ مينيسترلىگىنىڭ رەسمي مالىمەتى بويىنشا, قازاقستاندا 700 مىڭعا جۋىق مۇگەدەكتىگى بار ادام بولسا, ونىڭ 98,3 مىڭى بالالار. ال ولاردىڭ الەۋمەتتىك ومىرگە قوسىلعانىن جانە قابىلدانعانىن سەزىنۋىن قامتاماسىز ەتۋ ءۇشىن بۇكىل الەمدە ينكليۋزيۆتىلىك قاعيداتتارى ساقتالادى. وسى ۇدەرىستەن ءبىز دە قالىس قالماۋعا ءتيىسپىز.
وسى ورايدا, اتالعان كلۋب رەزيدەنتتەرى فەدەراتسياعا ستراتەگيالىق مىندەتتەردى جۇزەگە اسىرۋعا كومەكتەسىپ, بوچچا بويىنشا قازاقستان رەسپۋبليكاسىنىڭ چەمپيوناتتارىن وتكىزەدى, سپورتشىلاردى جوعارى ساپالى كاسىبي سپورتتىق قۇرال-جابدىقتارمەن قامتاماسىز ەتەدى. سونداي-اق, وقۋ-جاتتىعۋ جيىندارىن ۇيىمداستىرادى, سپورتتىق-ساۋىقتىرۋ كەشەندەرىن تۇرعىزىپ, حالىقارالىق رەيتينگتىك جارىستارعا قاتىسۋعا ىقپال ەتەدى. سونىمەن قاتار حالىقارالىق ساراپشىلاردى تارتا وتىرىپ, جاتتىقتىرۋشىلاردىڭ بىلىكتىلىگىن ارتتىرۋ جۇمىستارىندا جۇيەلى قارجىلىق قولداۋ كورسەتەدى.
سونداي مەتسەناتتاردىڭ ءبىرى – VIII شاقىرىلىمداعى الماتى قالاسى ءماسليحاتىنىڭ دەپۋتاتى نۇرىمبەك تاۋ. ول 2004 جىلى ق.ي.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىن «تاۋ-كەن ينجەنەرى-مۇنايشى» ماماندىعى بويىنشا بىتىرگەن. ەڭبەك جولىن 2004 جىلى وسى وقۋ ورنىنىڭ «مۇناي ءىسى» كافەدراسىنىڭ وقىتۋشىسى بولىپ باستادى. 2008 جىلدان قازىرگى ۋاقىتقا دەيىن «Daco motors KZ» كومپانياسىنىڭ نەگىزىن قالاۋشى.
نۇرلىبەك تاۋ – تابىستى كاسىپكەر, بەس بالا تاربيەلەپ وتىرعان ۇلگىلى اكە. ول سونداي-اق قايىرىمدىلىق شارالارىنا بەلسەندى تۇردە اتسالىسادى, ناعىز اتىمتاي جومارت ازامات. نۇرلىبەك الەۋمەتتىك جوبالاردى قولداۋ ءاربىر تابىستى ادامنىڭ ومىرىندە ەرەكشە ورىن الۋى كەرەك دەپ سانايدى.