الماتى قالاسىندا وتكەن 5-ءشى «ەو-ورتالىق ازيا ازاماتتىق قوعام فورۋمى» بىرىككەن ۇلتتار ۇيىمى اگەنتتىكتەرى مەن ازاماتتىق قوعام ۇيىمدارىنىڭ 150-دەن استام وكىلىنىڭ باسىن قوستى, دەپ حابارلايدى Egemen.kz.
ەلىمىزدەگى ازاماتتىق اليانستىڭ پرەزيدەنتى بانۋ نۇرعازيەۆا قوعامدىق كەڭەستەرگە قاتىستى ويىن ءبىلدىرىپ, ونىڭ ساياسي الاڭداعى ماڭىزىنا توقتالدى.
«بۇل بىزگە كەرەك فورۋم. ءىس-شارادا ايتىلىپ, تالقىلانىپ جاتقان ماسەلەلەر وتە وزەكتى. ورتالىق ازيادا ازاماتتىق قوعام داميتىن بولسا, وندا مەملەكەتتەرى دە مىقتى بولماق. سونىمەن قاتار ەۋروپالىق وداق پەن ورتالىق ازيانىڭ ەلدەرى جاقسى قارىم-قاتىناستا بولا بەرمەك», دەدى ول.
سونىمەن قاتار ساراپشى ەلىمىزدە قابىلدانعان جاڭا زاڭداردىڭ ازاماتتىق قوعامنىڭ دامۋ قارقىنىنا وڭ اسەر بەرەتىنىن اتاپ ءوتتى.
ء«بىزدىڭ ەلىمىزدە «قوعامدىق باقىلاۋ تۋرالى» زاڭ قابىلداندى. سونىڭ ناتيجەسىندە بۇل باعىتتاعى جۇمىس جاقسى ءجۇرىپ جاتىر. الىس-جاقىن شەتەلدەردىڭ وكىلدەرى ءبىزدىڭ قوعامدىق ۇيىمداردىڭ جۇمىسىنا قىزىعۋشىلىق تانىتادى. ايتا كەتەر جايت قوعامدىق كەڭەس دۇرىس جۇمىس ىستەۋ ءۇشىن ونىڭ قۇرامى 100% قوعام وكىلدەرىنەن قۇرالۋى كەرەك. الايدا, ءالى كۇنگە دەيىن بىزدە 70%-ى قوعام وكىلدەرى, ال قالعاندارى مەملەكەتتىك ورگاندار نەمەسە باسقا سالادان كەلگەندەر. بولاشاقتا وسى ماسەلەنى دە جولعا قويۋ كەرەك», دەدى ازاماتتىق اليانستىڭ پرەزيدەنتى بانۋ نۇرعازيەۆا.