2021 جىلدىڭ جازىندا جوعالىپ كەتكەن قىز بالا امان-ەسەن تابىلدى, دەپ حابارلايدى Egemen.kz. Polisia.kz سايتىنا سىلتەمە جاساپ.
ىشكى ىستەر مينيسترلىگى ءباسپاسوز قىزمەتىنىڭ حابارلاۋىنشا, وسىدان ءتورت جىل بۇرىن تۇركىستان وبلىسى تولەبي اۋدانىنىڭ تۇرعىنى پوليتسياعا 16 جاسار قىزىنىڭ جوعالىپ كەتكەنى تۋرالى ارىزبەن حابارلاسقان. اقپاراتتى العان ءتارتىپ ساقشىلارى بارلىق قاجەتتى جەدەل-ىزدەستىرۋ شارالارىن جۇرگىزدى. ارادا بىرنەشە جىل وتسە دە, اۋدان تۇرعىنىنىڭ ارىزى بويىنشا ىزدەۋ جۇمىستارى جالعاسىپ, ناتيجەسىندە 2025 جىلدىڭ قاڭتارىندا ءبىر-بىرىنەن ايىرىلعان اناسى مەن قىزى قايتا قاۋىشتى.
بۇل قىزىن ساعىنعان انا ءۇشىن قۋانىشتى جاعداي بولدى.
«قىزىمنان حابارسىز قالىپ, نەندەي جاعدايدا ەكەنىن بىلە الماي جۇرگەن كۇندەر ارتتا قالدى. كوپ راقمەت سىزدەرگە. اراسىندا وزدەرىڭىزگە دە سەنىمسىزدىك بىلدىرگەن ەدىم, بۇگىن مىنە ءۇمىتىم اقتالىپ وتىر. سىزدەرگە العىسىم شەكسىز», دەگەن اناسى كوڭىلدەگى شىنايى ريزاشىلىعىن جەتكىزدى.
بەلگىلى بولعانداي, پوليتسەيلەر قىزدى الماتىداعى قوعامدىق تاماقتانۋ ورىندارىنىڭ بىرىندە جۇمىس ىستەپ جۇرگەن جەرىنەن تاپقان. بۇگىندە قىزدىڭ وسىنشا ۋاقىت قايدا, نە سەبەپپەن حابارسىز كەتكەنىن انىقتاۋ شارالارى جۇرگىزىلىپ جاتىر. پوليتسەيلەر وسى جايت بويىنشا مۇقيات تەرگەۋ جۇرگىزىپ, وقيعانىڭ تولىق ءمان-جايىن انىقتايتىن بولادى.