استانا. 5 اقپان. قىتايدىڭ گۋانچجوۋ قالاسىندا ءوتىپ جاتقان تەننيستەن فەدەراتسيا كۋبوگى جارىسىندا قازاقستان ەكىنشى ويىنىندا قىتايلىق تايپەيدى 3:0 ەسەبىمەن جەڭدى. بۇل تۋرالى egemen.kz حابارلادى.
بۇل سايىستا ەلىمىز ازيا جانە مۇحيت ايماعى ەلدەرىنىڭ ءى توبىندا سىنعا تۇسۋدە. تايپەيمەن بولعان تارتىس ەلىمىزدىڭ 1-راكەتكاسى زارينا دياس پەن قارسىلاسى سي سۋ-ۆەي اراسىنداعى ويىنمەن باستالدى. العاشقى سەتتە WTA رەيتينگىندە 33-ساتىدا تۇرعان زارينا 6:4 ەسەبىمەن باسىم تۇسسە, كەلەسى كەزەڭدە تايپەيلىك تەننيسشى ءبىزدىڭ قىزعا قوس گەيمدە عانا ەسە جىبەرىپ, 2:6 ەسەبىمەن جەڭىسكە جەتتى. ءۇشىنشى شەشۋشى سەتتە زارينا قارسىلاسىنا ەش مۇمكىندىك بەرمەدى. ناتيجەسىندە, 6:1 ەسەبىمەن ايقىن باسىمدىق تانىتتى.
كەلەسى ويىندا كورتقا قازاقستاندىق ياروسلاۆا شۆەدوۆا مەن تايپەي ەلىنىڭ تەننيسشىسى يا سۋن-لي شىقتى. بۇل كەزدەسۋدە سلاۆا 6:1, 6:1 ەسەبىمەن قارسىلاسىن وڭاي تىزە بۇكتىرىپ, كوماندامىزعا جارىس بارىسىنداعى مەرزىمىنەن بۇرىن ەكىنشى جەڭىستى سىيلادى. ەستەرىڭىزگە سالا كەتەيىك, العاشقى ويىندا قازاقستان قىتاي قىزدارىنان 2:1 ەسەبىمەن ايلاسىن اسىرعان ەدى.
قوس كوماندا اراسىنداعى سوڭعى جۇپتىق كەزدەسۋدە دە ءبىزدىڭ قىزدار باسىم بولدى. ۇلتتىق قۇرامانىڭ كاپيتانى بۇل جولى دا كاميلا كەرىمباەۆا مەن يۋليا پۋتينتسەۆاعا سەنىم ارتتى. يۋڭ-ياڭ چان مەن حاو-چيڭ چان جۇبىنا قارسى ويناعان قىزدارىمىز ەكى سەتتە 6:0, 6:1 ەسەبىمەن قارسىلاستارىن تاس-تالقان ەتىپ جەڭدى. وتاندىق تەننيسشىلەر ءوز توبىنداعى كەلەسى سوڭعى ويىندارىن 6 اقپاندا تايلاند قىزدارىنا قارسى وتكىزەدى.
ازيا جانە مۇحيت ايماعى ەلدەرىنىڭ ءىى توبىندا 8 مەملەكەت سايىسقا تۇسۋدە. قازاقستان ازىرگە «ۆ» توبىندا كوش باستاپ تۇر. ال «ا» توبىندا جاپونيا تەننيسشىلەرى الدا كەلەدى. ءار توپتان ءبىرىنشى ورىن العان كوماندا تۋرنير جەڭىمپازى اتانۋ ءۇشىن ءوزارا شەبەرلىك بايقاسادى. سوڭىندا ۇزدىك كوماندا فەدەراتسيا كۋبوگىنىڭ ەكىنشى الەمدىك توبىندا جەڭىلىسكە ۇشىراعان كوماندامەن سايىسادى. جەڭگەنى اتالعان توپتىڭ جولداماسىنا يە بولادى.
ەلامان قوڭىر.
دەرەك: egemen.kz.
سۋرەت: facebook.com.