سەنات سپيكەرى ماۋلەن اشىمباەۆتىڭ قاتىسۋىمەن وتكەن پالاتا بيۋروسىندا دەپۋتاتتار وسى اپتادا وتەتىن ءىس-شارالاردى پىسىقتاپ, 30 قاڭتارداعى سەنات وتىرىسىنىڭ كۇن ءتارتىبىن بەلگىلەدى.
الداعى بەيسەنبىدە دەپۋتاتتار «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا ەۋرازيالىق ەكونوميكالىق وداققا مۇشە مەملەكەتتەردىڭ اراسىندا كەدەندىك اكەلىم باجدارىنىڭ سوماسىن اۋدارۋعا قاتىستى بولىكتە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭدى قارايدى. بۇل قۇجاتتىڭ نورمالارى سانكتسيالىق شەكتەۋلەر جاعدايىندا ەۋرازيالىق ەكونوميكالىق وداق اياسىندا كەدەندىك باجداردى اكىمشىلەندىرۋدى جۇزەگە اسىرۋ كەزىندەگى كەدەرگىلەردى جويۋعا باعىتتالعان.
سونداي-اق سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بايلانىس قىزمەتتەرىن كورسەتۋ, مەملەكەتتىك ساتىپ الۋ, كولىك جانە پوشتا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ءبىرىنشى وقىلىمدا قارايدى. اتالعان زاڭ ءتيىستى سالالارداعى زاڭنامانى ودان ءارى جەتىلدىرۋدى جانە مەملەكەتتىڭ اقپاراتتىق قاۋىپسىزدىگىن ارتتىرۋدى كوزدەيدى. زاڭ نورمالارىنا سايكەس پوشتا وپەراتورلارى ءۇشىن مىناداي مۇمكىندىكتەر بەلگىلەنەدى: ءپارولدى (پين-كودتى) ەنگىزىپ, قۇقىقتى راستاۋ ارقىلى ادرەساتتىڭ كەلىسىمىن الا وتىرىپ, پوشتا جونەلتىلىمىن ءۇشىنشى تۇلعالارعا تاپسىرۋ, پوچتوماتتاردى ورنالاستىرۋ ءتارتىبىن ناقتىلاۋ, ۇلتتىق پوشتا وپەراتورىنا زاڭ تالاپتارىنا سايكەس دارىلىك زاتتار مەن مەديتسينالىق بۇيىمداردى تاسىمالداۋ جانە ساقتاۋ قۇقىعىن بەرۋ.
سونىمەن قاتار وسى اپتادا سەناتتا كوكتەمگى سۋ تاسقىنىنا دايىندىق ماسەلەلەرى جونىندە ۇكىمەت ساعاتى وتەدى. وندا دەپۋتاتتار مينيسترلىكتەردىڭ, جەرگىلىكتى اتقارۋشى ورگانداردىڭ جانە مۇددەلى تاراپتاردىڭ وكىلدەرىمەن بىرلەسىپ, بىلتىرعى تاسقىننىڭ سەبەپتەرى مەن سالدارىن, الداعى كوكتەمدە ەلدى مەكەندەردى, ونىڭ ىشىندە وزەندەر مەن سۋ قويمالارىنىڭ جانىندا ورنالاسقان اۋىل-ايماقتى سۋ باسۋدىڭ الدىن الۋ ماسەلەلەرىن جانە حالىق پەن ءۇي شارۋاشىلىقتارىن قولداۋ شارالارىن تالقىلايدى.
بۇعان قوسا پالاتانىڭ بۇل اپتاداعى جوسپارىندا ەكونوميكانى دامىتۋ, ەكسپورتتىق-كرەديتتىك اگەنتتىكتىڭ قىزمەتى جانە باسقا دا ماڭىزدى ماسەلەلەر بويىنشا مۇددەلى مەملەكەتتىك ورگانداردىڭ وكىلدەرىمەن كەزدەسۋلەر قاراستىرىلعان. مەملەكەت باسشىسىنىڭ جولداۋدا بەرگەن تاپسىرمالارىن ورىنداۋ جانە پارلامەنتتىك تىڭداۋعا دايىندىق اياسىندا سەناتتىڭ سالالىق كوميتەتتەرى «ەڭبەك ادامى – ۇلتتىق ەكونوميكانىڭ ءوسۋى جانە ۇلت وركەندەۋىنىڭ نەگىزى», سونداي-اق «قازاقستان رەسپۋبليكاسىنداعى ورمانداردى مولىقتىرۋ جانە ورمان شارۋاشىلىعىن دامىتۋ» تاقىرىپتارىنا ارنالعان وتىرىستار وتكىزەدى.
ودان بولەك, بيۋرودا بۇعان دەيىن ماجىلىستەن كەلىپ تۇسكەن زاڭدار جۇمىس ءۇشىن سەناتتىڭ تۇراقتى كوميتەتتەرىنە ءبولىنىپ بەرىلدى.