اتىراۋدا پوشتا بولىمشەسى جاڭعىرتىلدى

اتىراۋ. 5 اقپان. اتىراۋ قالاسىنداعى «قازپوشتا» بولىمشەسى جاڭعىرتىلىپ, حالىققا قىزمەت كورسەتۋ اياسىن كەڭىتتى. بۇل تۋرالى egemen.kz ءتىلشىسى حابارلادى. ەندى «اۆانگارد-3» شاعىن اۋدانىنداعى №9 پوشتا بولىمشەسىنىڭ اۋماعى ەكى, حالىققا قىزمەت كورسەتەتىن وپەراتورلار سانى ءۇش ەسەگە ارتىپ وتىر. «قازپوشتا» اكتسيونەرلىك قوعامى اتىراۋ وبلىستىق فيليالىنىڭ ديرەكتورى ەرجان وماروۆتىڭ ايتۋىنشا, مۇندا ابونەنتتىك جاشىكتەر دە ورناتىلدى. ونىڭ جالعا الۋ اقىسى –1 مىڭ تەڭگەدەن 3 مىڭ تەڭگە ارالىعىندا بەلگىلەنىپتى. سونىمەن بىرگە, تاۋلىك بويى جۇمىس ىستەيتىن «24/7» جەلىسى دە ىسكە قوسىلدى. مۇنداعى تاعى ءبىر ەرەكشەلىك – ەلەكتروندى كەزەك ءادىسى قولدانىلادى. بولىمشەدەگى جۇمىس ءتارتىبى بەينەكامەرا ارقىلى باقىلانادى. «بۇگىنگى تاڭدا اتىراۋ وبلىسىندا حالىققا 98 بولىمشە قىزمەت كورسەتەدى. سونىمەن بىرگە, 6 جىلجىمالى بەكەتىمىز بار. بۇل – بروندالعان كولىك. وندا نوۋتبۋك, پرينتەر, GSM-مودەم سەكىلدى وسى زامانعى تەحنولوگيامەن جۇمىس جاساۋ ءۇشىن دەربەس ەلەكترمەن قامتۋ جۇيەسى ورناتىلعان. قازىر جىلجىمالى بەكەتتەرىمىز قۇرمانعازى, يساتاي, ماحامبەت, يندەر جانە قىزىلقوعا اۋداندارىنىڭ ەلدى مەكەندەرىندە قىزمەت كورسەتىپ كەلەدى. وسىنداي ءبىر بەكەتتىڭ قىزمەتىن اتىراۋ قالاسىنىڭ ماڭىنداعى ەلدى مەكەندەر ءۇشىن پايدالانىپ وتىرمىز», دەيدى فيليال ديرەكتورى ەرجان وماروۆ. جولداسبەك شوپەعۇل. دەرەك: egemen.kz. سۋرەت: راحىم قويلىباەۆ.