استانا قالاسىنىڭ قىلمىستىق ىستەر جونىندەگى اسكەري مامانداندىرىلعان اۋدانارالىق سوتىندا مەرزىمدى قىزمەتتەگى سارباز مارات بارقۇلوۆتى اتىپ ولتىرگەن وفيتسەرگە ۇكىم وقىلدى, دەپ حابارلايدى Egemen.kz.
«دامير دوسانوۆ قازاقستان رەسپۋبليكاسىنىڭ قىلمىستىق كودەكسىنىڭ 99-بابى (1-بولىگى) بويىنشا قىلمىستىق قۇقىق بۇزۋشىلىق جاساعانى ءۇشىن كىنالى دەپ تانىلدى. وعان 13 جىل باس بوستاندىعىنان ايىرۋ جازاسى كەسىلدى. ول جازاسىن قاۋىپسىزدىگى ورتاشا مەكەمەدە وتەيدى», دەدى سۋديا.
سونىمەن قاتار دامير دوسانوۆ لەيتەنانت شەنىنەن ايىرىلدى.
مارقۇمنىڭ اناسى ءاسيا بارقۇلوۆا مورالدىق شىعىن رەتىندە 50 ملن تەڭگە تالاپ ەتكەن. سوت تالاپتى ءىشىنارا قاناعاتتاندىردى. جابىرلەنۋشى 20 ملن تەڭگە الادى.