استانا. 5 اقپان. قۇرلىقتىق حوككەي ليگاسىنداعى كەزەكتى ويىنىندا استانالىق «بارىس» قوناقتا «سوچي» كومانداسىن 2:4 ەسەبىمەن جەڭدى. بۇل تۋرالى egemen.kz حابارلادى.
ويىننىڭ نەبارى 24-سەكۋندىندا «بارىس» ساپىنان مايك لاندين ەكى مينۋتقا ايدىننان قۋىلىپ, جەرگىلىكتى كوماندا ويىنشى باسىمدىعىنا يە بولدى. بىردەن شايباعا يەلىك ەتكەن ايدىن يەلەرى ءبىزدىڭ قاقپانى تورۋىلعا الدى. ءتورت ويىنشىمەن قالعان «بارىستىڭ» قورعانىسى ايىپ ۋاقىتىنىڭ اياقتالۋىنا 3 سەكۋند قالعان كەزدە عانا سىر بەرىپ, سوچيلىكتەر ەسەپ اشتى. ميحايل انيسيننەن پاس العان ماكس ۆيارن ءوز جانكۇيەرلەرىن قۋانىشقا بولەدى.
شايبا جىبەرىپ العانىنا قاراماستان, قوناقتاردىڭ قارقىنى باسەڭدەگەن جوق. قايتا «سوچي» حوككەيشىلەرى ءجيى قاتەلىككە بويى الدىرىپ, بىرىنەن سوڭ ءبىرى ءتارتىپ بۇزدى. ناتيجەسىندە, 13 جانە 14-مينۋتتاردا يگور يگناتۋشكين مەن العاشقى شايبانىڭ اۆتورى م.ۆيارن ايدىننان قۋىلىپ, «بارىس» ەكى بىردەي ويىنشى باسىمدىعىنا يە بولدى. قازاقستاندىق كوماندا وزدەرىنە بەرىلگەن مۇمكىندىكتى ءمۇلت جىبەرمەي, ەسەپتى تەڭەستىرىپ كەتتى. رومان ستارچەنكودان پاس العان م.لاندين قاقپاعا سوققى جاساماي, شايبانى قارسى قاپتالداعى كەۆين داللمەنگە اسىردى. ءوز كەزەگىندە «بارىستىڭ» ەكس-كاپيتانى بىردەن قاقپانى نىساناعا الىپ, «سوچي» قاقپاشىسى اندرەي گاۆريلوۆتان ايلاسىن اسىردى.
ەكىنشى كەزەڭ تولىعىمەن ءبىزدىڭ كوماندانىڭ باسىمدىعىمەن ءوتتى. ۇزىلىستەن كەيىن دە ءوز ويىن ورنەگىن تابا الماعان ۆياچەسلاۆ بۋتساەۆ شاكىرتتەرى 22-مينۋتتا «بارىسقا» تاعى ءبىر مۇمكىندىك سىيلادى. ياعني, جەرگىلىكتى كوماندا ساپىنان قورعاۋشى دميتري شۆيدەنكو ەكى مينۋتتىق ايىپ ۋاقىتىمەن جازالاندى. استانالىقتار بىردەن ويىن تىزگىنىن قولدارىنا الىپ, شابۋىلعا كوشتى. رومان ستارچەنكو مەن كونستانتين رۋدەنكو ۇيىتقى بولعان شابۋىلعا ماكسيم سەمەنوۆ نۇكتە قويىپ, ەسەپتى 1:2-گە جەتكىزدى.
ەكى بىردەي شايبانىڭ سوعىلۋىنا ۇلەس قوسقان ر.ستارچەنكو 30-مينۋتتا ءوزى دە مەرگەندىگىمەن كوزگە ءتۇستى. كوك جولاقتىڭ بويىنان شايباعا يەلىك ەتكەن رومان ءبىر ءوزى «ءسوچيدىڭ» بار قورعانىسىن بۇزىپ ءوتىپ, كومانداسىنىڭ ءۇشىنشى شايباسىن سوقتى. ال ەكىنشى ۇزىلىسكە 3 مينۋت قالعان كەزدە نايدجەل دوۋس قاقپا الدىنداعى قاربالاستى پايدالانىپ, تابلوداعى كورسەتكىشتى «بارىستىڭ» پايداسىنا 1:4 قىلىپ تۇزەدى. دوۋسقا ناتيجەلى پاس بەرگەن كوماندا كاپيتانى برەندون بوچەنسكي.
سوڭعى كەزەڭدە «ءسوچيدىڭ» ءبىر عانا شايبا سوعۋعا شاماسى جەتتى. تارتىستىڭ اياقتالۋىنا 3 مينۋت قالعاندا م.انيسين پاۆەل پولۋەكتوۆ قورعاعان قاقپانى ءدال كوزدەدى. بۇل ساتتە ايدىن يەلەرىنىڭ ءبىر ويىنشىسى ارتىق بولعانىن ايتا كەتكەن ءجون.
ويىننىڭ قالعان ۋاقىتىندا ەسەپ وزگەرمەي, «بارىس» ماۋسىمداعى 25-جەڭىسىنە قول جەتكىزدى. ونىڭ 19-ى نەگىزگى ۋاقىتتا تىركەلسە, قالعان 6 كەزدەسۋدە استانالىقتار قوسىمشا ۋاقىتقا نەمەسە ويىن سوڭىنداعى بۋلليتكە جۇگىندى. تاعى ءبىر ايتا كەتەر جايت, «بارىس» بيىلعى ماۋسىمدا «سوچيدەن» وسىمەن ەكىنشى رەت باسىم ءتۇستى. استانادا وتكەن العاشقى ويىندا جەڭىمپاز بۋلليت ارقىلى انىقتالىپ, «بارىس» 5:4 ەسەبىمەن جەڭىسكە جەتكەن ەدى.
بۇگىندە اندرەي نازاروۆ جاتتىقتىراتىن كوماندا 77 ۇپايمەن شىعىس كونفەرەنتسياسىندا 6-ورىندا تۇر. كونفەرەنتسياداعى باستى قارسىلاسىمىز ۋفالىق «سالاۆات يۋلاەۆ» ازىرگە 5-ساتىعا جايعاسقان. ولاردىڭ دا قورجىندارىندا 77 ۇپاي بار. دەگەنمەن, «بارىستىڭ» كەيىنگە شەگەرىلگەن ەكى ويىنى بارىن ەسكەرسەك, قحل-دىڭ تۇراقتى چەمپيوناتىن 5-ورىنمەن اياقتاۋعا مۇمكىندىك بار. ءبىزدىڭ كوماندا ليگا اياسىنداعى كەلەسى ويىنىن 6 اقپان كۇنى نيجني نوۆگورودتا جەرگىلىكتى «تورپەدوعا» قارسى وتكىزەدى. باتىس كونفەرەنتسياسىندا وينايتىن «تورپەدو» بۇگىندە 70 ۇپايمەن 9-ساتىدا كەلەدى.
ەلامان قوڭىر.
دەرەك: egemen.kz.
سۋرەت: hcsochi.ru.