مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي سينگاپۋردە وتكەن مەملەكەتتىك باسقارۋ كوشباسشىلارىنىڭ جاھاندىق فورۋمىنا جانە جاھاندىق ۇكىمەتتىك سامميتكە قاتىستى. ءىس-شارا سينگاپۋر, كانادا, ۇلىبريتانيا, مولدوۆا, ەستونيا, موڭعوليا ەلدەرىنىڭ مەملەكەتتىك قىزمەت سالاسىنداعى ءتۇرلى قۇرىلىم باسشىلارى جانە جوعارى لاۋازىمدى وكىلدەرىنىڭ قاتىسۋىمەن ءوتتى.
فورۋمدا مەملەكەتتىك قىزمەتتە جاساندى ينتەللەكت مۇمكىندىكتەرىن پايدالانۋ مەن تسيفرلىق ترانسفورماتسيانى جۇزەگە اسىرۋ, تالانتتاردى ىرىكتەۋ, مەملەكەتتىك قىزمەتشىلەر اراسىندا جوعارى ادەپ ستاندارتتارىن قالىپتاستىرۋ, ادامي رەسۋرستاردى باسقارۋ ماسەلەلەرى تالقىلاندى.
پانەلدىك سەسسيادا ءسوز سويلەگەن مقىا توراعاسى دارحان جازىقباي اگەنتتىكتى تولىققاندى ستراتەگيالىق HR ينستيتۋتقا اينالدىرۋ بويىنشا مەملەكەت باسشىسى قاسىم-جومارت توقاەۆ العا قويعان مىندەتتى جۇزەگە اسىرۋ اياسىندا اتقارىلىپ جاتقان جۇمىستارعا توقتالىپ, مەملەكەتتىك قىزمەتتە رەكرۋتينگ ادىستەرىن قولدانۋ, كادرلىق الەۋەتتى ارتتىرۋ جانە تالانتتاردى تارتۋ, ىرىكتەۋدىڭ تسيفرلىق جۇيەسىن ەنگىزۋ, بىلىكتى مامانداردى مەملەكەتتىك قىزمەتكە كونكۋرستىق ىرىكتەۋسىز قابىلداۋ, مەملەكەتتىك قىزمەتتىڭ گيبريدتىك مودەلىن قالىپتاستىرۋ بويىنشا ەلىمىزدىڭ تاجىريبەسىمەن ءبولىستى.
قاتىسۋشىلار مەملەكەتتىك قىزمەتتە ادام رەسۋرستارىن باسقارۋ, جاساندى ينتەللەكت مۇمكىندىكتەرىن پايدالانۋعا قاتىستى تاجىريبەلەردى ورتاعا سالىپ, جاساندى ينتەللەكت سالاسىنداعى يننوۆاتسيالار ءۇشىن «قولايلى ورتا» قۇرۋ, ونى دۇرىس قولدانۋدى قامتاماسىز ەتۋ ماسەلەلەرىنە نازار اۋداردى.
شەتەلدىك ساراپشىلار قازاقستاننىڭ تالانتتى جاستاردى, بىلىكتى مامانداردى مەملەكەتتىك قىزمەتكە تارتۋ جانە ولاردى تۇراقتاندىرۋ, مەملەكەتتىك قىزمەتكە قابىلداۋدى تسيفرلاندىرۋ, مەملەكەتتىك قىزمەتتىڭ گيبريدتىك مودەلىن قالىپتاستىرۋ تاجىريبەسىنە قىزىعۋشىلىق تانىتتى.
ءىسساپار اياسىندا مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي سينگاپۋردىڭ مەملەكەتتىك قىزمەت باسشىسى لەو يپپەن ەكى جاقتى كەزدەسۋ وتكىزدى. كەزدەسۋدە سينگاپۋر مەملەكەتتىك قىزمەت كوللەدجى مەن قر پرەزيدەنتى جانىنداعى مەملەكەت باسقارۋ اكادەمياسى اراسىنداعى ءوزارا تۇسىنىستىك مەموراندۋمى اياسىندا مەملەكەتتىك قىزمەتشىلەردىڭ الەۋەتىن ارتتىرۋ بويىنشا 2025 جىلى جۇزەگە اسىرىلاتىن ءىس-شارالار تالقىلاندى.
سونداي-اق اگەنتتىك توراعاسى سينگاپۋر ۇلتتىق ۋنيۆەرسيتەتى جانە نانيانگ تەحنولوگيالىق ۋنيۆەرسيتەتىنىڭ باسشىلىعىمەن مەملەكەتتىك قىزمەتشىلەردىڭ قۇزىرەتتىلىگى جانە كاسىبي داعدىلارىن ارتتىرۋعا قاتىستى ءوزارا ىنتىماقتاستىق كەزدەسۋلەرىن وتكىزدى. ناتيجەسىندە قازاقستان مەملەكەتتىك قىزمەت ىستەرى اگەنتتىگى مەن سينگاپۋر ۇلتتىق ۋنيۆەرسيتەتى اراسىندا ءوزارا تۇسىنىستىك تۋرالى مەموراندۋمعا قول قويىلدى. مەموراندۋم اياسىندا مەملەكەتتىك باسقارۋ مەن قىزمەتتە وزىق تاجىريبە الماسۋ, باسشىلىق لاۋازىمداعى مەملەكەتتىك قىزمەتشىلەردىڭ بىلىكتىلىگىن ارتتىرۋ بويىنشا قىسقا مەرزىمدى وقىتۋ كۋرستارى مەن سەمينارلارىن ۇيىمداستىرۋ, لي كۋان يۋ مەملەكەتتىك ساياسات مەكتەبىنىڭ وقۋ باعدارلامالارى بويىنشا وقىتۋ كوزدەلىپ وتىر.
سونىمەن قاتار فورۋم اياسىندا مقىا توراعاسى دارحان جازىقباي مەملەكەتتىك قىزمەتتى دامىتۋ جانە ونى تسيفرلاندىرۋ ماسەلەلەرى بويىنشا ۇلىبريتانيا مەملەكەتتىك قىزمەتىنىڭ باس ديرەكتورى جانە مينيسترلەر كابينەتىنىڭ تۇراقتى حاتشىسى كەترين ليتتلمەن, ەستونيانىڭ ۇكىمەت كەڭسەسىنىڭ مەملەكەتتىك حاتشىسى تايمار پەتەركوپپەن, موڭعوليانىڭ مەملەكەتتىك قىزمەت كەڭسەسىنىڭ ءتورايىمى تسەدەۆسۋرەن لحاگۆامەن ىنتىماقتاستىق كەزدەسۋلەرىن وتكىزىپ, ءوزارا تاجىريبە الماسۋ بويىنشا كەلىسىمگە كەلدى.