شاعىن تسەحتان باستالعان بيزنەس

«يۋتاريانىڭ» جەزقازعان, قارا­عاندى قالالارىنداعى اۆتومات­تان­دىرىلعان جابدىقتارمەن جاراق­تان­دىرىلعان 2 زاماناۋي تىگىن فابريكاسى مەن استانا قالاسىنداعى توقۋ ءوندىرىسى نارىققا كەڭىنەن تانىمال. جەزقازعان, ساتباەۆ, قاراعاندى, بالقاش, استانا قالالارىندا جالپى اۋماعى 3 مىڭ شارشى مەتردى قامتيتىن ورتالىق قويمالارىنىڭ بولۋى كومپانيانىڭ زور قۋاتى مەن مول مۇمكىندىگىن اي­عاقتايدى. كومپانيا جىلىنا 1 800 مىڭنان اسا تىگىن بۇيىمىن شىعارادى. بۇل وزىق تەحنولوگيانى وندىرىسكە ەنگىزىپ, قولدانۋدىڭ ارقاسىندا مۇمكىن بولىپ وتىر.

مەتاللۋرگيا, تاۋ-كەن, مۇناي-گاز, حيميا, تەمىرجول, ەنەرگەتيكا سا­لا­­لارىنىڭ قىزمەتكەرلەرى ءۇشىن ارنايى كيىمدەر, ەر, ايەل مەن بالالار كيىمدەرى, كۇندەلىكتى قولدانىسقا ارنال­عان توقىما بۇيىمدارى, بار­لىعى 500-دەن استام كيىم ۇلگىسىن ۇسى­­نادى. گەرمانيانىڭ Durkopp Adler, Pfaff, Amf Reece, جاپونيانىڭ Shima Seiko, Epson, Mimaki, Juki, Tajima, تۇركيانىڭ Abitech, Tesan, قىتايدىڭ ZOJE ءتارىزدى زاماناۋي وزىق تىگىن تەحنولوگيالارى كومپانيا ونىمدەرىنىڭ «ساپا بارىنەن دە جوعارى» دەيتىن ۇرانىنا سايكەس بولۋىن قامتاماسىز ەتۋدە. ارينە, سول تەحنولوگيانىڭ ءتىلىن تاۋىپ جۇرگەن كىمدەر؟ ءوزىمىزدىڭ قىز-جىگىتتەر. ساۋلە باقىتجانقىزى مامانداردى كومپانيا ەسەبىنەن وقىتىپ, تاربيەلەۋگە باسا كوڭىل بولەدى.

ءوندىرىستى باسقارۋدىڭ اۆتو­مات­تان­دىرىلعان جۇيەسى شيكىزات تۇس­كەن ساتتەن باستاپ دايىن ءونىمدى سا­تۋعا دەيىنگى, ياعني جۇمىستى وڭتاي­لان­دىرۋ, باقىلاۋ, ەسەپ جۇرگىزۋدى تولىق باقىلاۋعا مۇمكىندىك بەرەدى. كومپانيا كاسىپورىندارىندا ەنگى­زىل­گەن تسيفرلىق تەحنولوگيالاردىڭ ءبىرىن «يۋتاريا» ماماندارىنىڭ وزدەرى ازىرلەگەن. «Yutariya Smart Technologies» دەپ اتالاتىن بۇل اۆتو­مات­تاندىرىلعان باعدارلاما جەكە قور­­عانىس قۇرالدارىن بەرۋدى جوسپارلاۋ مەن ەسەپكە الۋعا ارنالعان.

اياعىنان نىق تۇرعان كومپانيا بىرنەشە ينۆەستيتسيالىق جوبانى جۇزەگە اسىردى. 2012 جىلى جەز­قاز­عان قالاسىنداعى تىگىن ءوندىرىسى كەڭەي­تىل­دى. زاماناۋي تىگىن, ءپىشۋ, كەستەلەۋگە ارنالعان اۆتوماتتاندىرىلعان جاب­­دىق­تار ورناتىلدى. جاڭا ينۆەستي­تسيا­نىڭ ناتيجەسىندە 250 جۇمىس ورنى اشىلدى. سول جىلى كومپانيا تاعى ءبىر ينۆەستيتسيالىق جوبانى جۇزەگە اسىردى. مونوقالالاردى دامىتۋ باع­دارلاماسى شەڭبەرىندە شىعىس قازاقستان وبلىسىندا, قاراعاندى, بالقاش, ساتباەۆ قالالارىندا «يندۋس­تريا­لىق قىزمەت كومبيناتى» دەپ اتا­لاتىن كەشەن قۇ­رىل­دى. سونىڭ اياسىندا تاپسىرىس بەرۋ­شىلەرگە, قاراپايىم تۇرعىندارعا تازا­لاۋ, قىزمەت كورسەتۋ سەرۆيسىنىڭ وندىرىستىك تسيكلى ۇسىنىلدى. بۇل جوبانى جۇزەگە اسىرۋعا 180 ملن تەڭگە جۇم­سالىپ, جا­ڭادان 350 جۇمىس ورنى اشىلدى.

2011–2013 جىلدارى «استانا – جاڭا قالا» ەركىن ەكونوميكالىق ايماعىندا «KazTexExpo» اۆتوماتتاندىرىلعان وندىرىستىك كەشەنىنىڭ قۇرىلىسى جۇرگىزىلدى. «يندۋستريالاندىرۋ كارتاسى» مەملەكەتتىك باعدارلاماسىنا ەنگىزىل­گەن بۇل جوبانى جۇزەگە اسىر­عان «يۋتاريا» كومپانياسى بولا­تىن. سونىڭ ناتيجەسىندە, 350 جۇمىس ورنى اشىلىپ, بۇل جوباعا 560 ملن تەڭگە كولەمىندە ينۆەستيتسيا قۇيىل­دى. مۇندا تىگىنشىلىك, توقىما, ەكس­پە­ري­مەنتتىك تسەحتار جۇمىس ىستەپ, كوم­پيۋتەرلىك باعدارلامالار ىسكە قوسىلدى. كيىم ۇلگىلەرىن جوبالاۋ جۇيەسى ەنگىزىلدى. «Astana يۋتاريا ltd» جشس مۇندا جۇمىسكەرلەرگە ارنالعان كيىمدەردەن باستاپ بيزنەس وكىلدەرىنە دە جاراسىمدى كيىم ۇلگىلەرىن ۇسىندى. اسكەري كيىمدەر تىگۋگە دە مەملەكەت تاپسىرىسىن جەڭىپ الدى.

200 ملن تەڭگە ينۆەستيتسيا جۇمساپ ۇيىم­داستىرىلعان كولىك-لوگيس­تي­كا­لىق ورتالىعىنىڭ اۋماعى 4 600 شارشى مەتردى قۇرايدى. جۇكتىڭ دەر كەزىندە جەتكىزىلۋىن قاداعالاپ, قامتاماسىز ەتۋ ماقساتىندا ورتالىق­تان­دىرىلعان ديسپەچەرلىك قىزمەت قۇرىلدى. ورتالىق عيماراتى كۇر­دەلى جوندەۋدەن وتكىزىلدى, جاڭاشا جاب­دىق­تالدى. ورتالىقتا 47 جۇك كولىگى تۇراقتى تاسىمالمەن اينالىسادى, بۇعان قوسا تەمىرجول قىزمەتى دە پايدالانىلادى.

2022 جىلى 2 500 شارشى مەتر اۋماقتى الىپ جاتقان كوتەرمە-تارا­تۋ ورتالىعىن ۇيىمداستىردى. بۇعان جۇمسالعان 802 ملن تەڭگە ينۆەستيتسيا ءوزىنىڭ تيىمدىلىگىن بايقاتقان سوڭ, كومپانيا قازىر 150 ملن تەڭگە قاراجات قاراستىرىپ, وسىنداي تاعى ءبىر ورتالىق ۇيىمداستىرىپ جاتىر. بىلتىر جەل­توق­ساندا كومپانيا قولداۋىمەن جەز­قازعان قالاسىندا «Ulytau Creative Hab» اشىلدى. ۇلىتاۋ وبلىسىندا كرەاتيۆتى يندۋستريانى دامىتۋعا ىق­­پال ەتەتىن مادەني مۇرا مەن زاماناۋي تەحنولوگيالاردى بىرىكتىرەتىن حاب جاڭا جو­بالاردى ىسكە اسىراتىن ستارتاپتار مەن شاعىن جانە ورتا بيزنەسكە قولداۋ كورسەتەدى. وڭىردەگى كرەاتيۆتى يندۋستريانى دامىتۋدى ماقسات ەتكەن حاب ەلەكتروندى جانە كەڭسە جابدىقتارىمەن, كىتاپحانامەن, جيھازبەن جابدىقتالدى. مۇندا قازىر 3D fashionLab – ياعني, كيىمدى مودەلدەۋ بويىنشا زD زەرتحاناسى, سونداي-اق, زەرگەرلىك, لازەرلىك, قولونەرشىلەر, دومبىرا مەن قوبىز شەبەرحانالارى, Kazakh Ou Lab, Steppe Art Lab, Qazaq Heritage Lab, Steppe Tradition Lab, e library, Qazaq Style Lab, Palette Lab, digital Lab ورنالاسقان. حابتىڭ جۇمىس ىستەۋىنە جايلى جاعداي تۋعىزۋ ءۇشىن «يۋتاريا» 15 ملن تەڭگە جۇمسادى جانە 400 شارشى مەتر اۋماقتى تەگىن ۇسىندى. ماقسات – ايماقتاعى كاسىپ­كەرلەردىڭ كرەاتيۆتى جوبالارىن جۇ­زەگە اسىرۋعا جاردەمدەسۋ. ناتي­جە­سىن­دە, جاڭادان 50 جۇمىس ورنى پايدا بولدى.

«نارىق الەمىنە ەنگەنىمىزگە شيرەك عاسىرعا جۋىقتادى. ۋاقىتپەن بىرگە وستىك, وركەندەدىك. شاعىن جانە ورتا كاسىپكەرلىكتى دامىتۋعا مەملەكەت تاراپىنان جاسالعان قامقورلىقتىڭ كوپ شاراپاتى ءتيدى. كاسىپكەرلىك جولىن كەزىندە قانداي قيىندىقپەن باس­­­تا­عانىمىز ەسىمنەن كەتپەيدى. بۇگىندە «يۋتاريا» قۇرامىندا 700-دەن اسا جۇمىسكەرى بار ءىرى وندىرىستىك ين­نوۆاتسيالىق كومپانياعا اينالدى. بىزدەگى ورتاشا جالاقى 323 مىڭ تەڭگەنى قۇرايدى. كومپانيا 2021-2024 جىلدارى بيۋدجەتكە 3 325 256 مىڭ تەڭگە سالىق تولەگەن ەكەن. بۇل بىزدەگى ءوندىرىستىڭ دەڭگەيىن كورسەتەدى. ءبىز الەۋمەتتىك باعىت ۇستانامىز. كوپتەگەن قايىرىمدىلىق شاراسىنا قاتىسامىز, دەمەۋشىلىك كورسەتەمىز. كومپانيا قىزمەتكەرلەرى مەن جۇمىسكەرلەرى دە نەگىزىنەن قاراعاندى جانە ۇلىتاۋ وبلىسىنان شىققان جەرگىلىكتى ماماندار», دەيدى ساۋلە باقىتجانقىزى.

ۇلىتاۋ وبلىسى