جاقىندا استانا قالاسىنداعى ۇلتتىق اكادەميالىق كىتاپحانادا ەلىمىزدە ەڭ العاش قۇرىلعان ارنايى جاساق بولىمدەرىنىڭ نەگىزىن قالاۋشى جانە العاشقى كومانديرى, ءىىم-ءنىڭ ەڭبەك سىڭىرگەن قىزمەتكەرى, قۇرمەتتى ارداگەرى, قويان-قولتىق ۇرىستان الەم چەمپيونى داۋلەت تەمىرحانوۆتىڭ ۇزاق جىلعى ەڭبەك جولىن باياندايتىن, ءۇش بولىمنەن تۇراتىن «بۇگىلمەس بولات, سىنباس سەمسەر» جانە ورىس تىلىندەگى «نەسبيگامايا ستال, نەرۋچيمىي مەچ» اتتى عۇمىرباياندىق قوس كىتابىنىڭ تۇساۋكەسەرى ءوتتى.
قوس كىتاپتىڭ تۇساۋكەسەرىن بەلگىلى جۋرناليست قۇرمانالى قالماحان ۇلى جۇرگىزدى. ول اۆتوردىڭ ۇزاق جىلعى قاۋىپتى دە جاۋاپتى سالادا اتقارعان قىزمەتى تۋرالى كەڭىنەن اڭگىمەلەپ, اراسىندا دەرەكتى فيلمدەردى كورسەتىپ وتىردى. گەنەرال-لەيتەنانت اباي تاسبولاتوۆ, قوعام قايراتكەرلەرى ءاليحان بايمەنوۆ, ەرسۇلتان بەكتۇرعانوۆ, گەنەرالدار اسەت ءادىلحان, داۋلەت سالحانوۆ, مۇحتار ايۋباەۆ, ەلگە ەسىمى كەڭىنەن تانىس ەلسيار قاناعاتوۆ, تاستانبەك ەسەنتاەۆ, نەسىپ جۇنىسباەۆ ءسوز الىپ, بۇل جيناقتىڭ جاستار ءۇشىن ەرەكشە ەكەنىن, پاتريوتتىق تاربيە بەرۋدە ماڭىزدى ەكەنىن اتاپ ءوتتى.
ءۇش بولىمنەن تۇراتىن بۇل قوس كىتاپتا 1990 جىلدارداعى قىلمىسقا قارسى كۇرەس, كەپىلگە العانداردى بوساتۋ, قارۋلى قىلمىستىق توپتاردى جويۋ, ەكسترەميزم مەن تەرروريزم اكتىلەرىن وقشاۋلاۋ سياقتى ارنايى جاساقتىڭ ەرەن ەڭبەكتەرى مەن ەرلىكتەرى دەتەكتيۆ جەلىسىندە باياندالادى. ءبىرىنشى بولىمدەگى «سىعان قىزىن بوساتۋ», ء«بىر وزەننىڭ قوس جاعاسى نەمەسە رىجي المازدى ۇستاۋ», «كەپىلگە الىنعان كاسىپكەردى بوساتۋ», «جۇرتتى ۇرەيلەندىرىلگەن «چەتىرە براتيا», «اسقار جامبۋلسكي وقيعاسى» اتتى تاقىرىپتاردا اۆتوردىڭ كوزبەن كورىپ, قىلمىستى ءوز ءبولىمىنىڭ ساربازدارى قۇرىقتاعان وقيعالارى اسا تارتىمدى سۋرەتتەلگەن. ال كىتاپتىڭ ەكىنشى بولىمىندەگى «كوك ساۋىتتى ارلاندار», «وتان ءۇشىن وتقا ءتۇس, كۇيمەيسىڭ», «ەكسترەميزمگە قارسى كۇرەس», «ۇرلانعان بالا تۋرالى وقيعا», «شۇبار» ەليتالىق اۋدانىندا بولعان وقيعا» اتتى جازبالارى وقىرماننىڭ بىردەن نازارىن اۋدارىپ, ءبىر دەمدە وقىپ شىعاسىز.
ال كىتاپتىڭ ءۇشىنشى بولىمىندە اۆتوردىڭ سپورتتىڭ ءبىر ءتۇرى قويان-قولتىق ۇرىسىنىڭ ەلىمىزدە قالاي دامىعانى, «دينامو» سپورت قوعامى سايىپقىراندارىنىڭ ەل ابىرويىن اسقاقتاتۋداعى جەڭىستى جولدارى تۋرالى ايتىلادى. «سپورت – ماڭگىلىك سەرىگىم» اتتى ماقالاسىندا «ادامدى جەتىستىككە جەتكىزەتىن تاباندىلىق پەن توزىمدىلىك» دەيدى دە, وزىمەن بىرگە قىزمەتتەس بولعان ارىپتەستەرى جونىندە باياندايدى.
وڭداسىن ەلۋباي,
جۋرناليست