بۇل تۋرالى توتەنشە جاعدايلار مينيسترلىگى ءمالىم قىلدى, دەپ حابارلايدى Egemen.kz.
وتكەن ەكى تاۋلىكتە اۋا-رايىنىڭ ناشارلاپ, بورانعا, كوكتايعاققا, قاتتى جەلگە ۇلاسۋىنا بايلانىستى 15 ءوڭىردىڭ اۋماعىندا رەسپۋبليكالىق ماڭىزى بار اۆتوجولداردىڭ 62 ۋچاسكەسىندە جانە وبلىستىق ماڭىزى بار 65-تەن استام ۋچاسكەدە قوزعالىسقا شەكتەۋ ەنگىزىلدى.
تجم قىزمەتكەرلەرى جەرگىلىكتى اتقارۋشى ورگاندارمەن, جول جانە مەديتسينالىق قىزمەتتەرمەن, ۆولونتەرلەرمەن بىرلەسىپ, حالىققا كومەك كورسەتۋ جۇمىستارىن ۇيىمداستىردى. كولىك كەپتەلەسى بولعان ورىنداردا ادامدار جىلىتىلاتىن شاتىرلارعا ورنالاستىرىلىپ, ىستىق تاماق بەرىلدى.
تجم كۇشتەرىمەن 337 شىعۋ, ىزدەستىرۋ جانە اۆاريالىق-قۇتقارۋ جۇمىستارى جاسالدى. وپەراتسيا بارىسىندا 685 ادام, ونىڭ ىشىندە 40 بالا قۇتقارىلىپ, ەۆاكۋاتسيالاندى. سونداي-اق 60-تان استام كولىك قار قۇرساۋىنان شىعارىلعان.
ايتا كەتەيىك, ەلىمىزدىڭ 18 وڭىرىندە جەدەل شتابتار اشىلىپ, جەدەل جەلى تەلەفوندارى جۇمىس ىستەپ تۇر.