وتاندىق كومپانيالاردىڭ ۇشاق پاركى جىل سايىن 10-15 ۇشاققا تولىقتىرىلىپ جاتىر. بۇگىندە اۋە كەمەلەرىنىڭ سانى 102 ۇشاققا جەتكەن, دەپ جازادى Egemen.kz.
قازاقستان حالىقارالىق اۋە قاتىناسىن 31 ەلمەن (رەسەي, قىرعىزستان, وزبەكستان, تاجىكستان, گرۋزيا, بەلارۋس, ءازىربايجان, ءباا, ساۋد ارابياسى, كاتار, يران, ومان, ەگيپەت, كۋۆەيت, وڭتۇستىك كورەيا, قىتاي, ءۇندىستان, ۆەتنام, تايلاند, موڭعوليا, كامبودجا, مالايزيا, مالديۆ ارالدارى, شري-لانكا, تۇركيا, ۇلىبريتانيا, گەرمانيا, يتاليا, نيدەرلاندى, پولشا, چەحيا) اپتاسىنا 582 رەيس جيىلىگىمەن 117 باعىت بويىنشا ورناتقان.
ەل اۋەجايلارىندا ەرەكشە قاجەتتىلىكتەرى بار ازاماتتار ءۇشىن بارلىق جاعداي جاسالعان. ماماندار العاشقى مەديتسينالىق كومەك كورسەتۋ, ونىڭ ىشىندە ەرەكشە قاجەتتىلىكتەرى بار ازاماتتاردى سۇيەمەلدەۋ بويىنشا تۇراقتى ارنايى وقۋدان وتەدى. امبۋلاتورلىق كوتەرگىشتەر, مۇگەدەكتەر اربالارى, كورۋ مۇمكىندىگى شەكتەۋلى ازاماتتارعا ارنالعان تاكتيلدى پليتكالار مەن دىبىستىق ناۆيگاتسيا جۇيەلەرى دە بار.
ەلىمىزدىڭ حالىقارالىق اۋەجايلارىندا انا مەن بالاعا ارنالعان بولمەلەر, ۆاليۋتا ايىرباستاۋ پۋنكتتەرى, پوشتا بايلانىسى, سىمسىز ينتەرنەت جاساقتالعان. سونداي-اق ونلاين تىركەۋ پروتسەسىن جىلدامداتۋ ءۇشىن بىرقاتار اۋە كومپانيالارى ءموبيلدى قوسىمشالاردى ەنگىزگەن.
قازاقستاندا اۆياتسيا سالاسىن دامىتۋدى حالىقارالىق تانۋ ۇشۋ قاۋىپسىزدىگىنە بايلانىستى.
كولىك مينيسترلىگىنىڭ مالىمەتىنشە, ەلىمىزدەگى ۇشۋ قاۋىپسىزدىگىنىڭ حالىقارالىق ستاندارتتارعا سايكەستىك دەڭگەيى 82% قۇرايدى. بۇل تمد ەلدەرى اراسىنداعى ەڭ جوعارى كورسەتكىش ءارى دانيا مەن پولشا سياقتى ەۋروپا وداعى ەلدەرىنىڭ دەڭگەيىمەن سالىستىرۋعا تۇرارلىق.