ۇكىمەتتە پرەمەر-ءمينيستردىڭ ورىنباسارى تامارا دۇيسەنوۆانىڭ توراعالىعىمەن جۇمىسشى ماماندىقتارى جىلىن وتكىزۋ جونىندەگى رەسپۋبليكالىق كوميسسيانىڭ ءبىرىنشى وتىرىسى ءوتتى. رەسپۋبليكالىق جانە وڭىرلىك دەڭگەيدەگى ءىس-شارالار جوسپارى قارالدى.
جالپى, جوسپار 70 قادامنان تۇراتىن 7 نەگىزگى باعىتتى قامتيدى. ونىڭ نەگىزىندە 20 ايماقتىق باستاما بەلگىلەندى. ولاردىڭ اياسىندا جۇمىسشى ماماندىقتاردى دايارلاۋ جۇيەسىن جەتىلدىرۋ, مەكتەپ وقۋشىلارىنا كاسىپتىك باعدار بەرۋ, جۇمىس بەرۋشىلەردى ورتاق ىسكە قاتىستىرۋ سەكىلدى ارەكەتتەر قاراستىرىلعان.
وقۋ-اعارتۋ ۆيتسە-ءمينيسترى ەدىل وسپان بيىل ەلىمىزدە 12 ءىرى رەسپۋبليكالىق جانە حالىقارالىق شارا ۇيىمداستىرىلاتىنىن باياندادى. ولاردىڭ العاشقىسى اقپان ايىندا ەلوردادا وتپەك. «EXPO» كورمە ورتالىعىندا «جۇمىسشى ماماندىقتارى قالاسى» اتتى بىرەگەي فەستيۆال جوسپارلانعان. 5 كۇندىك ءىس-شارادا بولاشاق ماماندىقتار, يننوۆاتسيالىق تەحنولوگيالاردى كورسەتە وتىرىپ, جۇمىسشى ماماندىقتاردىڭ الەۋەتىن پاش ەتۋ كوزدەلگەن. فەستيۆالدە ەكونوميكانىڭ ناقتى سەكتورىنداعى سۇرانىسقا يە باعىتتارعا ارنالعان پاۆيلوندار جۇمىس ىستەمەك. وعان بارلىق وڭىردەگى ءىرى كاسىپورىندار, سالالىق وداقتار جۇمىلدىرىلادى.
سونداي-اق وتىرىستا «سامۇرىق-قازىنا» ۇلتتىق ءال-اۋقات قورىنىڭ جۇمىسشى ماماندىقتارى جىلى اياسىندا اتقاراتىن شارالارى مەن الداعى جوسپارلارى قاراستىرىلدى. وعان تيەسىلى كومپانيالار توبىندا 255 مىڭنان اسا ادام قىزمەت اتقارادى, ولاردىڭ 190 مىڭعا جۋىعى – جۇمىسشى ماماندىق وكىلدەرى. ءالى دە 5 مىڭ مامانعا سۇرانىس بار. سوندىقتان وقۋ ورىندارىمەن دۋالدى وقىتۋ جونىندەگى كەلىسىمدەر, بوس ورىندار جارمەڭكەلەرى, جاس مامانداردى دامىتۋ بويىنشا باعدارلامالاردى جۇزەگە اسىرۋ كوزدەلىپ وتىر.
«سامۇرىق-قازىنا» اق 2032 جىلعا دەيىن 46 ءىرى ينۆەستيتسيالىق جوبانى جۇزەگە اسىرۋدى جوسپارلاپ وتىر. ونىڭ اياسىندا جالپى سانى 64 مىڭنان اسا جۇمىس ورنى قۇرىلادى. اكتسيونەرلىك قوعام جۇمىسشى مامانداردى ازىرلەۋگە اتسالىسۋعا مۇددەلى.
سالالىق مينيسترلىكتىڭ ۇسىنعان شارالار تىزبەگىندە ورتالىق ازيا ەلدەرى وكىلدەرىنىڭ قاتىسۋىمەن ءىس3 حالىقارالىق فورۋمى, رەسپۋبليكالىق Innovation حاكاتونى, سونداي-اق العاش رەت اقتاۋ قالاسىندا TURKICSKILLS كاسىپتىك شەبەرلىك چەمپيوناتى دا بار.
سونىمەن قاتار كوميسسيا نازارىنا ءىرى كاسىپورىنداردىڭ جۇمىسشى ماماندىقتارى جىلى اياسىندا جوسپارلاعان ءىس-شارالارى دا ۇسىنىلدى. ERG, Allur Group كومپانيالارىنىڭ وكىلدەرى سالالىق وقۋ ورىندارىمەن ارىپتەستىك قارىم-قاتىناسى, جۇمىسشىلارعا كورسەتىلەتىن الەۋمەتتىك قولداۋ شارالارى, الداعى ۋاقىتتاعى جوسپارلارى تۋرالى باياندادى.
«ەڭ نەگىزگى ماقسات – جۇمىسشى مامانداردىڭ مارتەبەسى مەن بەدەلىن كوتەرۋ ەكەنىن ۇمىتپاعان ءجون. بۇل رەتتە بارلىق مۇددەلى مەملەكەتتىك ورگاندار, جەرگىلىكتى اكىمدىكتەر, كاسىپورىندار مەن مامان دايارلايتىن وقۋ ورىندارىنىڭ ۇيلەسىمدى جۇمىسى ماڭىزدى. سوندىقتان جوسپاردا كورسەتىلگەن شارالاردىڭ مەرزىمىندە ءارى ساپالى ورىندالۋىن قامتاماسىز ەتۋدى تاپسىرامىن», دەدى ت.دۇيسەنوۆا.
ۆيتسە-پرەمەر جۇمىسشى مامانداردىڭ مارتەبەسى مەن بەدەلىن كوتەرۋ ءىسى تەك ءبىر جىلمەن شەكتەلمەيتىنىنە باسا ءمان بەرىپ, بۇل باعىتتاعى جۇمىس تۇراقتى تۇردە جۇرگىزىلەتىنىن ايتتى.
كوميسسيانىڭ كەزەكتى وتىرىستارى كوشپەلى فورماتتا اي سايىن وتكىزىلمەك. وندا جوسپارعا سايكەس اتقارىلعان شارالار سارالانىپ, ءتيىستى ناتيجە شىعارىلىپ وتىرادى.