پرەمەر-مينيستر ولجاس بەكتەنوۆ تۇركىستان وبلىسىندا قۋاتى 1000 مۆت بولاتىن بۋ-گاز قوندىرعىسى (بگق) بازاسىندا سالىنىپ جاتقان ەلەكتر ستانساسىنىڭ قۇرىلىسىن تەكسەردى. مەملەكەت باسشىسىنىڭ تاپسىرماسى بويىنشا جۇزەگە اسىرىلىپ جاتقان جوبا ۇلتتىق ەلەكتر جەلىسىنىڭ تۇراقتى جۇمىس ىستەۋىن قامتاماسىز ەتۋگە باعىتتالعان, دەپ جازادى Egemen.kz.
سايرام اۋدانىندا ولجاس بەكتەنوۆ ەلىمىزدەگى ەڭ ءىرى گاز ەلەكتر ستانساسىنىڭ قۇرىلىسى بويىنشا جۇرگىزىلىپ جاتقان جۇمىستارمەن تانىستى. جوبا جالپى قۋاتى 1000 مۆت بولاتىن 4 گاز تۋربيناسى, 4 كادەگە جاراتۋ قازاندىعى جانە 2 بۋ تۋربيناسىن قامتيدى. قولدانىلىپ وتىرعان بۋ-گاز قوندىرعىسى تەحنولوگياسى پايدالانىلعان گاز جىلۋىن ىسكە اسىرىپ قوسىمشا ەلەكتر ەنەرگياسىن وندىرۋگە مۇمكىندىك بەرەدى جانە زاماناۋي جىلۋ ەنەرگەتيكاسىنداعى ەڭ ءتيىمدى ءارى ەكولوگيالىق تازا تەحنولوگيالاردىڭ ءبىرى سانالادى. ستانسانىڭ ارتىقشىلىعى – ونىڭ جوعارى مانەۆرلى قابىلەتىندە جانە جەلىدە تاپشىلىق تۋىنداعان جاعدايدا جەتىسپەيتىن قۋاتتى جەدەل تۇردە تولىقتىرۋ مۇمكىندىگىندە.
ولجاس بەكتەنوۆ: جاڭا كونستيتۋتسيا مەملەكەت پەن قوعامنىڭ ورنىقتى دامۋىنا بەرىك نەگىز بولادى
«مەملەكەت باسشىسى ۇلتتىق قۇرىلتاي وتىرىسىندا جاڭا قۋات كوزدەرىن ىسكە قوسۋ بۇگىنگىدەي ەنەرگيانى كوپ قاجەت ەتەتىن ەكونوميكانى دامىتۋ ءۇشىن ءتيىستى شارت ەكەنىن اتاپ ءوتتى. تىرشىلىككە قاجەتتى جۇيەلەردىڭ تۇراقتى جۇمىسىن قامتاماسىز ەتۋ جانە ورنىقتى ەنەرگەتيكالىق بازانى قالىپتاستىرۋ – ۇكىمەتتىڭ نەگىزگى مىندەتتەرىنىڭ ءبىرى. تۇركىستان وبلىسىنىڭ قارقىندى دامىپ كەلە جاتقانىن كورىپ وتىرمىز, ءوڭىردىڭ ونەركاسىپتە, اۋىل شارۋاشىلىعىندا الەۋەتى جوعارى. بگق جوباسىن جۇزەگە اسىرۋ وڭتۇستىك وڭىرگە قوسىمشا قۋات رەزەرۆىن قۇرۋعا جانە ەنەرگيا جۇيەسىنىڭ تۇراقتىلىعىن نىعايتۋعا مۇمكىندىك بەرەدى. سالىنىپ جاتقان ستانتسيا ءوڭىردىڭ ودان ءارى الەۋمەتتىك-ەكونوميكالىق دامۋىنىڭ ماڭىزدى ەلەمەنتىنە اينالىپ, جاڭا ينۆەستيتسيالىق جوبالاردى جۇزەگە اسىرۋعا نەگىز بولادى», دەدى ولجاس بەكتەنوۆ.
ولجاس بەكتەنوۆ كوممەرتسيالىق يپوتەكا كولەمىن ارتتىرۋدى تاپسىردى
پرەمەر-مينيسترگە جوبانىڭ قازىرگى جاعدايى تۋرالى باياندالدى. «تۇركىستان بگق» جشس («سامۇرىق-قازىنا» اق-نىڭ ەنشىلەس ۇيىمى) باسقارما توراعاسى ۇلان بۇركىتوۆ نىساندى 2026 جىلدىڭ سوڭىنا دەيىن ىسكە قوسۋ جوسپارلانىپ وتىرعانىن حابارلادى. بۇگىندە نەگىزگى نىسانداردىڭ, ونىڭ ىشىندە باس عيمارات پەن تاراتۋ قۇرىلعىلارىنىڭ ىرگەتاستارى دايىن. باس عيماراتتاعى جوبادا كورسەتىلگەن ورىندارعا گەنەراتورلارى بار ءتورت گاز تۋربيناسى (Siemens Energy) ورناتىلعان.
جوبانىڭ باس مەردىگەرى – قازاقستاندىق جانە وڭتۇستىك كورەيالىق كومپانيالاردان قۇرىلعان كونسورتسيۋم. قۇرىلىس الاڭىندا 1 مىڭنان استام ادام جانە 150 بىرلىك مامانداندىرىلعان تەحنيكا جۇمىلدىرىلعان. تىگىنەن قۇراستىرىلاتىن قۇرىلىس نىساندارى سالىنىپ جاتىر. عيماراتتاردىڭ قاڭقالارى مونتاجدالىپ, مەتالل كونسترۋكتسيالار ورناتىلىپ, قابىرعالار قاپتالىپ جانە تاعى دا باسقا جۇمىستار جۇرگىزىلىپ جاتىر. ەلەكتر ستانساسىنىڭ نەگىزگى تەحنولوگيالىق جابدىقتارى تولىق كولەمدە جەتكىزىلگەن. جوبا ىسكە قوسىلعان سوڭ 600-دەن استام تۇراقتى جۇمىس ورىنى اشىلادى.
قازىرگى ۋاقىتتا تۇركىستان وبلىسى بويىنشا ەلەكتر ەنەرگياسىن تۇتىنۋدىڭ ورتاشا كولەمى 445 مۆت-تى قۇرايدى, ال ىشكى گەنەراتسيا كولەمى 136,5 مۆت دەڭگەيىندە. ستانسانى ىسكە قوسۋ وڭىردەگى قۋات تاپشىلىعىن تولىعىمەن جابۋعا جانە ەڭ جوعارى جۇكتەمەلەر كەزەڭىندە ەنەرگيا جۇيەسىنىڭ تۇراقتىلىعىن قامتاماسىز ەتۋگە مۇمكىندىك بەرەدى.
ولجاس بەكتەنوۆ: اۋىلدىق جەرلەردەگى تۇرعىن ءۇي قۇرىلىسىنا كوڭىل ءبولۋ كەرەك
ەنەرگەتيكا مينيسترلىگىنىڭ دەرەكتەرىنە سايكەس, قازاقستاندا وتكەن جىلى 123,1 ملرد كۆت/ساعات ەلەكتر ەنەرگياسى ءوندىرىلدى (2024 جىلى – 117,9 ملرد كۆت·ساع). «تەكەلى ەنەرگوكەشەنى» جشس-دا ءۇش گاز تۋربينالىق قوندىرعىنىڭ قۇرىلىسىن اياقتاۋ جانە «توپار باستى ەنەرگيا تاراتۋ ستانساسى» جشس-دا ەسكىرگەن تۋربواگرەگاتتى اۋىستىرۋ قوسىمشا 166 مۆت قۋات وندىرۋگە مۇمكىندىك بەردى. بيىل جاڭا گەنەراتسيانى ىسكە قوسۋ ارقىلى 1980 مۆت ەلەكتر ەنەرگياسىن قامتاماسىز ەتۋ جانە الماستىرۋ اياسىندا 683 مۆت قۋات ەنگىزۋ جوسپارلانىپ وتىر.
پرەمەر-مينيستر ەنەرگەتيكا مينيسترلىگىنە «Samruk-Kazyna Construction» اق-مەن بىرلەسىپ, بارلىق ءتورت گاز تۋربيناسىن ىسكە قوسۋ مەرزىمدەرىن ساقتاي وتىرىپ, ەكولوگيالىق تالاپتاردى ورىنداۋدى جانە جەلىلىك ينفراقۇرىلىممەن ۇيلەستىرۋدى قامتاماسىز ەتە وتىرىپ, بۋ-گاز ەلەكتر ستانساسىن سالۋ جوباسىن ۋاقتىلى جۇزەگە اسىرۋدى تاپسىردى.