ەڭبەك جانە حالىقتى الەۋمەتتىك قورعاۋ مينيسترلىگى ەرىكتى قونىس اۋدارۋ قاعيدالارىنا وزگەرىستەر ەنگىزۋدى كوزدەيتىن جاڭا جوبا ازىرلەدى. بۇل باستاما وڭىرلەردەگى ەڭبەك رەسۋرستارىنىڭ موبيلدىگىن ارتتىرۋعا جانە ولاردىڭ تيىمدىلىگىن كۇشەيتۋگە باعىتتالعان, دەپ حابارلايدى Egemen.kz.
سوڭعى جىلدارداعى تاجىريبە كورسەتكەندەي, قونىس اۋدارعان ازاماتتاردىڭ تۇراقتاپ قالماۋى كوبىنە رەسمي جۇمىسقا ورنالاسپاۋمەن بايلانىستى. بۇل ءوز كەزەگىندە قايتا كوشۋگە, الەۋمەتتىك تۇراقسىزدىققا جانە جەرگىلىكتى بيۋدجەتكە تۇسەتىن جۇكتەمەنىڭ ارتۋىنا اكەلگەن. وسىعان بايلانىستى جاڭا وزگەرىستەر قونىس اۋدارۋشىلاردى جاڭا وڭىرلەردە تۇراقتاندىرۋدى كوزدەيدى.
جوباعا سايكەس, ەندى قونىس اۋدارۋشىلار مەن قانداستار ءۇشىن جاڭا تۇرعىلىقتى جەرىندە مىندەتتى تۇردە رەسمي جۇمىسقا ورنالاسۋ تالابى ەنگىزىلەدى. ازاماتتار وزدەرىنىڭ جۇمىسپەن قامتىلعانىن دالەلدەپ, تۇراقتى الەۋمەتتىك اۋدارىمدار جاساپ وتىرۋى ءتيىس. مينيسترلىك وكىلدەرىنىڭ ايتۋىنشا, بۇل شارالار ازاماتتاردىڭ جاڭا ورتادا ورنىعۋىنا عانا ەمەس, سونىمەن قاتار وڭىرلىك ەكونوميكانىڭ دامۋىنا دا وڭ اسەر ەتەدى.
سولتۇستىككە بەتبۇرىس: قونىس اۋدارۋشىلاردى قولداۋدىڭ جاڭا فورماتى قانداي؟
قۇجات «اشىق نقا» پورتالىندا جاريالانىپ, 2026 جىلعى 6 ساۋىرگە دەيىن قوعامدىق تالقىلاۋعا ۇسىنىلدى. وسى ۋاقىت ارالىعىندا بارلىق مۇددەلى تاراپتار ءوز ۇسىنىستارى مەن پىكىرلەرىن بىلدىرە الادى. تالقىلاۋ اياقتالعان سوڭ جوبا تولىقتىرىلىپ, بەكىتۋگە جىبەرىلەدى.
ساراپشىلاردىڭ پىكىرىنشە, مۇنداي تالاپتار قونىس اۋدارۋشىلاردىڭ الەۋمەتتىك جاۋاپكەرشىلىگىن ارتتىرىپ, ولاردىڭ جاڭا ورىنعا بەيىمدەلۋىن جەڭىلدەتەدى. سونىمەن قاتار بۇل باستاما وڭىرلەردىڭ ەكونوميكالىق تۇراقتىلىعىن نىعايتۋعا دا ىقپال ەتۋى مۇمكىن.