شالقار قالاسىنداعى وقۋشىلار سارايى قولونەر ۇيىرمەسىنىڭ جەتەكشىسى اسىلان تورەتاەۆ اۋدان ورتالىعىنداعى جۇبانوۆتار كوشەسى بويىنان بيىكتىگى – 3, ديامەترى 2,5 مەتر جىلان ءمۇسىنىن تۇرعىزدى.
مول جاۋعان اپپاق قاردى كادەگە جاراتۋ تۋرالى وي جاس ۇستازعا قار كۇرەپ جۇرگەندە كەلگەن. قىسقى كانيكۋل كۇندەرى بالالار اسىر سالىپ وينايتىن جەر دە كەرەك. اسىلاننىڭ اسقان ىجداعاتتىلىقپەن كىرىسكەن شارۋاسىنا باسىندا ۇلكەندەر تاڭدانىسپەن قاراسا, بالالار ءماز-مەيرام بولىپ, كومەككە كەلدى. كوپ جىلدان بەرى اۋدان حالقى مۇنداي مول ءارى اپپاق بولىپ جاۋعان قاردى كورگەن ەمەس. اسىلان بىرنەشە كۇندە يرەلەڭدەگەن دەنەسىنىڭ ورتاسىنان قاقشيعان باسى, ايىر ءتىلى شىعىپ تۇرعان جىلاننىڭ بەينەسىن ورناتتى. مۇز بولىپ قاتقان ءمۇسىندى جاسىل تۇسكە بويادى. سودان بەرى مۇز جىلان بالالار ويىن الاڭىنداعى باستى بەينەگە اينالدى. كانيكۋل كۇندەرى وسى جەردە سىرعاناق تەۋىپ, اسىر سالادى. كومپيۋتەرگە كوگەندەلگەندىكتەن, ۇيدەن شىعارا المايتىن ۇل-قىزدارىن اتا-انالارى ەندى كۇن باتقانشا كىرگىزە الماي الەككە ءتۇسىپ ءجۇر. ۇلكەندەر كوشەنىڭ كوركىن كەلتىرگەن جاس ۇستازدىڭ ەڭبەگىنە ريزا بولىپ باتالارىن بەردى. بۇل كۇندەرى قالا تۇرعىندارى مەن قوناقتارى جىلان ءمۇسىنى جانىندا سۋرەتكە ءتۇسىپ, تاماشالاۋدى ادەتكە اينالدىردى.
اسىلان 2009 جىلى ق.جۇبانوۆ اتىنداعى اقتوبە وڭىرلىك ۋنيۆەرسيتەتىن بىتىرگەن. شىعارماشىلىقتى سۇيەتىن جاس ۇستاز تۋعان قالاسىن كوركەيتۋگە ىقىلاستى. وتكەن ناۋرىز مەرەكەسى قارساڭىندا وقۋشىلار سارايىنىڭ الدىنا ۇلتتىق كيىم كيگەن قازاقتىڭ قىز-جىگىتىنىڭ ءمۇسىنىن ورناتتى. تاعى ءبىر كوشەنىڭ بويىندا اسىلاننىڭ قولىنان شىققان ساۋكەلە, قوبىز, اسىق مۇسىندەرى تۇر. تسەحانوۆيچ اتىنداعى سپورت كەشەنىنىڭ الدىنداعى ەكى پالۋاننىڭ بەينەسىن جاساپ شىعاردى. ەرەكشە اق ساز بەن بالشىق, گيپستى پايدالانا وتىرىپ, وسىنداي تۋىندىلاردى دۇنيەگە اكەلەتىن ويلى جاستىڭ تۋعان جەرگە دەگەن سۇيىسپەنشىلىگى ماقتاۋعا تۇرارلىق.
اقتوبە وبلىسى