قاسكەلەڭنەن الماتىعا اپاراتىن جول 8 جولاققا دەيىن كەڭەيتىلىپ, بەس ارنايى كولىك ەستاكاداسى سالىنادى. بۇل تۋرالى الماتىعا جۇمىس ساپارىمەن بارعان كولىك ءمينيسترى مارات قاراباەۆ ايتتى, دەپ جازادى Egemen.kz.
جۇمىس مەملەكەت باسشىسىنىڭ الماتى اگلومەراتسياسىن دامىتۋ جونىندەگى تاپسىرماسى اياسىندا جۇزەگە اسادى.
قۇرىلىس ەكى كەزەڭدە جۇرگىزىلمەك. ءبىرىنشى كەزەڭدە ۇلكەن الماتى اينالما اۆتوموبيل جولىنان قاسكەلەڭ وتكەلىنە دەيىنگى, ەكىنشى كەزەڭدە قاسكەلەڭ وتكەلىنەن ايتەي اۋىلىنا بۇرىلىسقا دەيىنگى ۋچاسكە قامتىلماق. جوبالاۋ جۇمىستارى باستالدى.
اتالعان شارا كولىك قاتىناسىن جاقسارتۋعا جانە جول ءجۇرۋ ۋاقىتىن ەداۋىر قىسقارتۋعا مۇمكىندىك بەرەدى دەپ كۇتىلۋدە. ءسوز ەتىلگەن ۋچاسكەدەگى وتكىزۋ قابىلەتى تاۋلىگىنە 60 مىڭنان 90 مىڭ كولىككە دەيىن ۇلعايادى.
جولدىڭ كەڭەيۋى كەپتەلىستىڭ تومەندەۋىنە اكەلەدى دەپ كۇتىلۋدە. اۆتوكولىك جۇرگىزۋشىلەرى مەن جاياۋ جۇرگىنشىلەر ءۇشىن قوزعالىس قاۋىپسىزدىگىن قامتاماسىز ەتۋ ماقساتىندا ماماندار 12 جەر ءۇستى جاياۋ جۇرگىنشىلەر وتكەلىن سالادى.