تىڭعىلىقتى دايىندالعان قىزمەتتىك يتتەردىڭ مۇمكىندىكتەرىن ەشبىر زاماناۋي قۇرىلعى الماستىرعان ەمەس, دەپ حابارلايدى Egemen.kz.
پاۆلودار وبلىسى پوليتسيا دەپارتامەنتىنىڭ وكىلدەرىنىڭ ايتۋىنشا كينولوگيالىق قىزمەتتە 20 قىزمەتتىك يت بار, ولار – ناعىز كاسىپقويلار, ولاردىڭ قىزمەتى جوعارى كونتسەنتراتسيا مەن فيزيكالىق توزىمدىلىكتى تالاپ ەتەدى. يتتەر – زاتتاردى ىزدەۋدەن باستاپ قىلمىسكەرلەردى ۇستاۋعا دەيىنگى تاپسىرمالاردى بۇلجىتپاي ورىندايدى. الايدا, بۇعان دەيىن ۇزاق ءارى قاجىرلى دايىندىق جۇمىستارىنان وتەدى.
بۇگىندە پاۆلودار پوليتسياسىنىڭ كينولوگتارىنىڭ قاراماعىندا وقۋ-جاتتىعۋ سىنىپتارى, ۇلكەن جاتتىعۋ الاڭى جانە زاماناۋي وقشاۋلانعان جىلى ۆولەرلەردەن تۇراتىن ارنايى كەشەن بار. ورتالىقتاعى ءار ءيتتىڭ جەكە ۆولەرى, تەڭدەستىرىلگەن تاماعى جانە جۇمىسقا قاجەتتى ەنەرگيا بەرەتىن دارۋمەندەر كەشەنى قاراستىرىلعان. مۇنداي جان-جاقتى قامقورلىق يتتەردىڭ جوعارى تيىمدىلىكپەن جۇمىس ىستەۋىن قامتاماسىز ەتەدى.
Polisia.kz-ءتىڭ حابارلاۋىنشا پاۆلودار وبلىسىندا 2024 جىلدىڭ وزىندە قىزمەتتىك يتتەردىڭ كومەگىمەن 258 قىلمىس اشىلعان. ولار ەسىرتكى ىزدەۋ بويىنشا 446 رەت قولدانىلىپ, شامامەن 40 كەلى ەسىرتكى زاتىن انىقتاۋعا جانە تاركىلەۋگە مۇمكىندىك بەرگەن.