وسى اپتانىڭ باسىنان قاڭتار ايىندا وتەتىن ۇلتتىق بىرىڭعاي تەستىلەۋ (ۇبت) باستالدى, بۇل 10 اقپانعا دەيىن جالعاسادى. عىلىم جانە جوعارى ءبىلىم مينيسترلىگىنىڭ اقپاراتىنا سۇيەنسەك, 167 مىڭعا جۋىق ادام ۇبت-عا قاتىسۋعا ءوتىنىش بەردى. ولاردىڭ 76,7%-ى قازاق تىلىندە, 23,2%-ى ورىس تىلىندە, 142 ادام اعىلشىن تىلىندە تەستىلەۋدەن وتۋگە نيەت ءبىلدىردى.
قاڭتار ۇبت-سىن وتكىزۋدىڭ ءبىرىنشى كۇنى عىلىم جانە جوعارى ءبىلىم ءمينيسترى ساياسات نۇربەك استانا قالاسىنداعى تەستىلەۋ ورتالىقتارىنىڭ بىرىندە بولدى. ول ۇبت-نىڭ ءوتۋ بارىسىمەن تانىسىپ, بولاشاق ستۋدەنتتەرگە ساتتىلىك تىلەدى.
«تالاپكەرلەر ءوتىنىش بەرۋ بارىسىندا تەستىلەۋ كۇنىن, ۋاقىتىن جانە پۋنكتىن وزدەرى تاڭدادى. تەستىلەۋدىڭ ءبىرىنشى كۇنى ەلىمىز بويىنشا 2277 ادام, ونىڭ ىشىندە ەلوردادا 155 تالاپكەر ۇبت تاپسىرادى. ەڭ كوپ تاڭدالاتىن بەيىندى پاندەر كومبيناتسياسى بىرنەشە جىل قاتارىنان وزگەرىسسىز قالىپ وتىر. تالاپكەرلەردىڭ 17,5%-ى «ماتەماتيكا-فيزيكا» كومبيناتسياسىن تاڭداعان. ياعني بۇل – بولاشاق ينجەنەرلەر, مەحانيكتەر, مۇعالىمدەر, تەحنيكتەر مەن تەحنولوگتار, ەنەرگەتيكتەر, قۇرىلىسشىلار. ال 17,3%-ى «بيولوگيا-حيميا», 10,3%-ى «ماتەماتيكا-ينفورماتيكا» پاندەرىن تاڭدادى. ولار – ەرتەڭگى مەديتسينا قىزمەتكەرلەرى مەن IT ماماندارى», دەدى مينيستر س.نۇربەك.
ۇبت-داعى پاندەردىڭ سانى وزگەرمەدى, ياعني ۇشەۋى مىندەتتى جانە ەكەۋى تاڭداۋ بويىنشا پاندەر. ۇبت تاپسىرمالار سانى – 120. ونىڭ ىشىندە «قازاقستان تاريحىنان» 20 تاپسىرما, «وقۋ ساۋاتتىلىعىنان» 10 تاپسىرما, «ماتەماتيكالىق ساۋاتتىلىقتان» 10 تاپسىرما جانە ەكى بەيىندىك ءپان بويىنشا 40 تاپسىرمادان. ەڭ جوعارى بالل – 140.
تەستىلەۋ ۋاقىتى – 4 ساعات (240 مينۋت). بۇل رەتتە ەرەكشە ءبىلىم بەرۋ قاجەتتىلىكتەرى بار بالالار ءۇشىن ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك.
ەستەرىڭىزگە سالا كەتسەك, قاڭتارداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعان, جازعى ۇبت ناتيجەلەرى بويىنشا شەكتى بالل جيناماعاندار, شىعارماشىلىق ببت-دان باسقا دايىندىق باعىتتارىنا, پەداگوگيكالىق باعىتقا اقىلى نەگىزدە اۋىسقىسى كەلەتىندەر, سونداي-اق مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسادى.