«اعايىندى بليۋز», «ون وسيەت» جانە «حانىم ءبليۋزدى ايتادى» فيلمدەرىندە قوسىمشا رولدەردى سومداعان امەريكالىق اكتريسا دەليس كارري لوس-اندجەلەستەگى ورتتەن كوز جۇمدى. ونىڭ سۇيەگى ۇيىنەن تابىلعان, دەپ حابارلايدى Egemen.kz جەرگىلىكتى ABC7 تەلارناسىنا سىلتەمە جاساپ.
وتكەن سەيسەنبىدە, وقيعادان ءبىر كۇن بۇرىن اكتريسانىڭ نەمەرەسى كەللي كۇنى بويى اۋرۋحانادا بولعان سوڭ ونى ۇيىنە اپارىپ, ءوزى كەتىپ قالعان كورىنەدى. كەيىن كەللي اجەسىنىڭ ۇيىندە ەلەكتر قۋاتىن سونگەنى تۋرالى حابارلامادان ويانىپ, دەرەۋ التاديناعا بەت العان. وندا پوليتسيا قىزمەتكەرلەرى وعان ءۇي ورتەنىپ كەتكەنىن جەتكىزگەن.
ايتا كەتەيىك, قىزىل جالىن كوك ءتۇستى Cadillac-تان باسقا بارلىق م ۇلىكتەردى شارپىعان. سول تۇننەن بەرى كارري جوعالىپ كەتكەن.
«جوعالىپ كەتكەن 95 جاستاعى اجەيدىڭ سۇيەگى Eaton Fire ورتىنەن كەيىن قيراعان التاديندەگى ۇيىنەن تابىلدى», دەلىنگەن حابارلامادا.
بيلىكتىڭ مالىمەتىنشە, ءورتتىڭ جالپى اۋدانى 16 مىڭ گەكتاردان اسقان. كاليفورنيانىڭ وڭتۇستىگىن شارپىعان ورتتەن كەمىندە 24 ادام قازا تاۋىپ, 12 300-دەن استام عيمارات, سونىڭ ىشىندە اتاقتى تۇلعالاردىڭ ۇيلەرىنە زاقىم كەلگەن. مەتەورولوگتار ءورتتىڭ تەز تارالۋىنا قۇرعاق جانە جەلدى اۋا رايى سەبەپ بولعانىن اتاپ وتكەن.