بۇگىنگى تاڭدا قازاقستان تجم قاتارىندا 61 اتتەستاتتالعان يت قىزمەت ەتەدى. بۇل ءتورت اياقتى قۇتقارۋشىلار اۋماقتىق بولىمشەلەردىڭ جەدەل-قۇتقارۋ جاساقتارىندا, رەسپۋبليكالىق جەدەل-قۇتقارۋ جاساعىندا جانە اسكەري بولىمدەرىندە ماڭىزدى ءرول اتقارادى, دەپ جازادى Egemen.kz.
ولار تاجىريبەلى يت ۇيرەتۋشىلەردىڭ جەتەكشىلىگىمەن جۇمىس ىستەيدى جانە ىزدەۋ-قۇتقارۋ جۇمىستارىنا, سونىڭ ىشىندە ۇيىندىلەر مەن كوشكىندەر استىنداعى ادامداردى ىزدەۋگە بەلسەندى قاتىسادى.
قىزمەتتىك يتتەردى ىڭعايلى ورنالاستىرۋ جانە ۇيرەتۋ ءۇشىن جاساقتاردا ارنايى قورشاۋلار مەن جاتتىعۋ الاڭدارى قۇرىلعان. سونداي-اق وتكەن جىلى قۇتقارۋشىلاردىڭ يەلىگىنە بارلىق جاعدايى جاسالعان «Toyota Hilux» جاڭا زاماناۋي كينولوگيالىق قىزمەت كولىكتەرى بەرىلگەن. كينولوگيالىق ەسەپتوپتاردىڭ دايىندىعىن جوعارى دەڭگەيدە ۇستاپ تۇرۋ ءۇشىن جىلىنا ەكى رەت سەرتيفيكاتتىق سىناقتار وتكىزىلەدى, بۇل كاسىبي داعدىلاردى جەتىلدىرۋگە جانە ىزدەۋ-قۇتقارۋ جۇمىستارىندا تاجىريبە الماسۋعا مۇمكىندىك بەرەدى.
قىزمەتتىك يتتەردىڭ قاتارىندا لابرادور رەتريۆەرى, نەمىس وۆچاركاسى, بەلگيالىق وۆچاركا, بوردەر-كوللي, اق شۆەيتساريالىق وۆچاركا جانە گولدەن رەتريۆەر تۇقىمداستارى بار. بۇل تۇقىمدار كەرەمەت ءيىس سەزۋىمەن جانە قيىن جاعدايلاردا جۇمىس ىستەۋ قابىلەتىمەن تانىمال. 2024 جىلى كينولوگيالىق ەسەپتوپتار 100-دەن استام ىزدەۋ-قۇتقارۋ جۇمىستارىنا قاتىسقان. 2023 جىلى تۇركيا مەن اۋعانستانداعى جويقىن جەر سىلكىنىسى كەزىندە ىزدەستىرۋ-قۇتقارۋ جۇمىستارىندا بەلسەندى قىزمەت كورسەتكەن.
شىعىس قازاقستانداعى كينولوگيالىق قىزمەتتى اتاپ وتەر بولساق, مۇندا جەدەل-قۇتقارۋ جاساعىنىڭ قۇرامىندا تجد قىزمەتكەرلەرىمەن بەس لابرادور مەن اق شۆەيتساريالىق وۆچاركا قىزمەت كورسەتەدى. بۇل ءتورت اياقتى قۇتقارۋشىلار وڭىردە كوپتەگەن جىلدار بويى جۇمىس ىستەپ كەلەدى جانە قۇتقارۋشىلاردىڭ سەنىمىنە يە.
ء «بىزدىڭ يتتەر ىزدەۋ جۇمىستارىندا شەشۋشى ءرول اتقارادى, ويتكەنى ولاردىڭ وتكىر ءيىس سەزۋ قابىلەتى ادام كىرە المايتىن جەرلەردە ادامداردى تابۋعا مۇمكىندىك بەرەدى. قۇتقارۋشىلاردىڭ نازىك سەزىمدەرى ونداعان اسپاپتاردى الماستىرادى جانە ىزدەۋ پروتسەسىن ەداۋىر جىلدامداتادى», دەيدى شىعىس قازاقستان وبلىسى تجد جەدەل-قۇتقارۋ جاساعىنىڭ كينولوگيالىق قىزمەتىنىڭ باسشىسى ناتاليا دروججينا.
لابرادورلار مەيىرىمدى تابيعاتىمەن جانە ءارتۇرلى جۇمىس جاعدايلارىنا تەز بەيىمدەلۋ قابىلەتىمەن بەلگىلى. تجد جاساعىنىڭ باس قۇتقارۋشى-كينولوگى مارينا تسۋكانوۆانىڭ ايتۋىنشا قىزمەتتىك يتتەردى كۇتۋگە كوپ كوڭىل بولىنەدى. ءاربىر جانۋار كاسىبي قۇتقارۋشىلار سياقتى ارنايى كيىممەن جانە اياق كيىممەن قامتاماسىز ەتىلگەن, بۇل ولارعا بارلىق اۋا-رايىندا جۇمىس ىستەۋگە مۇمكىندىك بەرەدى جانە جىلۋ مەن جايلىلىقتى قامتاماسىز ەتەدى.