بۇگىن «وتانداستار» قورىنىڭ قابىرعاسىندا جۋرناليست جۇلدىز جۇماقاننىڭ «ەمىلدەن ەسىلگە دەيىن...» اتتى كىتابىنىڭ تانىستىرىلىمى ءوتتى. ءىس-شاراعا بەلگىلى اقىن-جازۋشىلار, سونداي-اق اۆتوردىڭ جاقىندارى مەن ارىپتەستەرى قاتىستى, دەپ جازادى Egemen.kz.
ءىس-شارانى تىزگىندەگەن جۋرناليست ءنازىر سۇلەيمەن بۇل كىتاپتىڭ ارقالايتىن جۇگى سونشالىقتى ءبىر قاندى-تراگەديا بولماسا دا, ءار بۋىننىڭ باسىنا تۇسكەن سالماعىنىڭ وسى كىتاپقا ارقاۋ بولعانىن اتاپ ءوتتى.
«وسىندا كەلگەلى بەرى جۇلدىز بۇگىن قوعامدا جىراۋلاردىڭ جوقشىسى بولىپ, ادىلەتتىڭ ادۆوكاتى بولىپ ءبارىمىزدىڭ جۇمىسىمىزدى شاۋىپ الىپ ءجۇر. مىنە, بۇگىن كىتابىنىڭ تانىستىرىلىمى ءوتىپ جاتىر. جالپى, كىتاپ دەگەنىمىز ءوزى ءبىر كەرەمەت قازىنا عوي. بۇل قازىنا تەك جۇلدىزدىڭ عانا قازىناسى ەمەس, اۆتوردىڭ باسىنداعى ازىن-اۋلاق ءتاجى سياقتى كورىنىپ تۇرعانىمەن بۇل حالىقتىڭ قازىناسى. سوندىقتان مىنا كىتابى حالقىنا يگىلىكتى بولسىن. كوپتىڭ الدىندا وسىنداي عيبراتتى كىتاپ جازىپ شىققانىنا ءىشىم جىلىپ, كوڭىلىم ريزا بولىپ قالدى», دەدى العاش ءسوز العان فيلولوگ, 40 جىل ءبىلىم سالاسىندا قىزمەت ەتكەن ارداگەر ۇستاز پارمەنبەك جۇماباي ۇلى.
اتالمىش تۋىندى ءاربىر قانداستىڭ باسىنان وتكەن, بولماسا اتامەكەنىنە ساعىنا ورالعان ازاماتتاردىڭ سان-قيلى تاعدىرىنا تولى. سونداي-اق كىتاپتا قايشىلىق ەكى تاعدىر ءسوز ەتىلگەن. ءبىرى, اجەسىنىڭ تۋعان توپىراعىنا ورالۋى جانە ەكىنشى بۋىننىڭ تۋعان توپىراعىن تاستاپ اتامەكەنگە قونىس اۋدارعان الۋان ءتۇرلى تاعدىر تارقاتىلىپ جازىلعان.
«كەشەگى كۇنى كىتاپ قولىما تيگەن ساتتە عانا ارقامنان ءبىر ۇلكەن جۇك تۇسكەنىن سەزدىم. شىنىمەن دە جازۋ بولەك, قولىڭا قاعازدى ۇستاپ وقۋ بولەك ەكەن. ءوزىم دە وقىپ شىعىپ, جازىپ شىققانىما تاڭقالدىم جانە سول ساتتەردى ەسكە الىپ قاعاز بەتىنە ءتۇسىرۋ وڭاي دا, قيىن دا بولدى دەپ ايتپايمىن. بىراق وقىعان كەزدە قايتادان سول ءوزىمنىڭ 11 جاستاعى بالا بەينەم كوز الدىما ەلەستەدى», دەيدى كىتاپ اۆتورى جۇلدىز جۇماقان.
ءوز كەزەگىندە تانىستىرىلىمعا كەلگەن قوناقتار كىتاپتىڭ جاقسى جازىلعانىن العا تارتىپ, جيناققا جوعارى باعا بەرىپ ءوتتى. اتالعان جيناق ءىرى كىتاپ دۇكەندەرىندە ساتىلىمعا ءتۇسىپ, قىزىعۋشىلىق تانىتۋشى وقىرمان شوعىرى دا قالىڭ بولارى ءسوزسىز.