ادىلەت مينيسترلىگى 2025 جىلى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ «Kaspi Bank» اق پوستاماتتارى ارقىلى ازاماتتارعا تۋ تۋرالى كۋالىكتى جەتكىزۋ بويىنشا پيلوتتىق جوبانى ىسكە قوسۋدى جوسپارلاپ وتىر, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
جاڭا پيلوتتىق جوبا اياسىندا, احات ورگاندارى بەرگەن ەلەكتروندى قۇجاتتار بويىنشا – تۋ, قايتىس بولۋ, نەكە قيۋ جانە نەكەنى بۇزۋ تۋرالى كۋالىكتەر مەن انىقتامالار بويىنشا ەلەكتروندىق ءاپوستيلدى قولدانۋدى دامىتۋ جوسپارلانعان. اتالعان وزگەرىستەر ازاماتتارعا اتالعان قۇجاتتاردى الۋعا جانە ولارعا ءبىر ءوتىنىش شەڭبەرىندە اپوستيل قويۋعا مۇمكىندىك بەرەدى. بۇل قىزمەتكە 2025 جىلدىڭ ءتورتىنشى توقسانىندا قول جەتكىزىلەدى.
«سونداي-اق زاڭ كومەگىن كورسەتۋ سالاسىندا ادىلەت مينيسترلىگى 2025 جىلى اتقارۋشىلىق جازبا جاساۋ جونىندەگى پيلوتتىق جوبانى ىسكە قوسۋدى جوسپارلاپ وتىر, ول «بىرىڭعاي نوتارياتتىق اقپاراتتىق جۇيە» اقپاراتتىق جۇيەسىنە تالاپتاردىڭ داۋسىز ەكەندىگى جانە بورىشتى تانۋ, بورىشكەردىڭ جەكە كابينەتى ارقىلى قارسىلىق بەرۋ تۋرالى راستايتىن قۇجاتتاردى سالۋدى, سونداي-اق نوتاريۋستىڭ بورىشكەردىڭ (جەكە نەمەسە زاڭدى تۇلعا) تىركەلگەن جەرى بويىنشا عانا اتقارۋشىلىق جازبا جاساۋىن كوزدەيدى», دەلىنگەن حابارلامادا.
بۇل باستامالار مەملەكەتتىك قىزمەتتەردى تسيفرلاندىرۋ دەڭگەيىن ارتتىرۋعا, بيۋروكراتيالىق راسىمدەردى قىسقارتۋعا جانە ازاماتتارعا قىزمەت كورسەتۋ ساپاسىن جاقسارتۋعا باعىتتالعان.