اتىراۋداعى №37 ورتا مەكتەپتە اعىلشىن ءتىلى ءپانىنىڭ مۇعالىمى پەداگوگيكالىق كەڭەستە ءوزىنىڭ تاراپىنا ايتىلعان بالاعات سوزدەن كەيىن سۋيتسيد جاساماق بولعان. وقۋ-اعارتۋ مينيسترلىگى بۇل جاعدايعا قاتىستى تۇسىنىكتەمە بەردى, دەپ حابارلايدى Egemen.kz.
الەۋمەتتىك جەلىدە جاريالانعان اقپارات بويىنشا, پەداگوگيكالىق كەڭەس بارىسىندا ۇستازعا بالاعات ءسوز ايتىلىپ, الاياقتىق جاسادى دەگەن ايىپ تاعىلعان.
وقۋ-اعارتۋ مينيسترلىگىنە قاراستى ءبىلىم ساپاسىن قامتاماسىز ەتۋ كوميتەتىنىڭ ءباسپاسوز قىزمەتى وقيعاعا قاتىستى تۇسىنىكتەمە بەردى. ۆەدومستۆو مالىمەتىنشە, جاعداي كوميتەتتىڭ باقىلاۋىنا الىنعان.
«جاعدايدى انىقتاۋ ءۇشىن قالالىق باسقارمانىڭ, اتىراۋ وبلىسى اكىمدىگىنىڭ ءبىلىم باسقارماسىنىڭ جانە وقۋ-اعارتۋ مينيسترلىگىنىڭ ءبىلىم ساپاسىن قامتاماسىز ەتۋ اۋماقتىق دەپارتامەنتىنىڭ وكىلدەرىنەن تۇراتىن ارنايى كوميسسيا قۇرىلدى», دەلىنگەن حابارلامادا.
بۇگىندە ءمان-جايدى جان-جاقتى زەرتتەۋ ءۇشىن تەرگەۋ امالدارى باستالىپ كەتكەن.
«مينيسترلىكتىڭ اۋماقتىق دەپارتامەنتى پەداگوگيكالىق ادەپ ماسەلەلەرى بويىنشا جوسپاردان تىس وڭىرلىك كەڭەس وتكىزەدى, ونىڭ قورىتىندىسى بويىنشا ءتيىستى شارالار قابىلدانادى», دەپ اتاپ ءوتتى ۆەدومستۆو وكىلدەرى.
كوميتەتتىڭ ءباسپاسوز قىزمەتى ۇستازدىڭ جاعدايى تۇراقتى ەكەنىن حابارلادى.
«ۇستازدىڭ جاعدايى جاقسى, قاجەتتى پسيحولوگيالىق كومەك كورسەتىلەدى», دەلىنگەن حابارلامادا.