ءماجىلىس دەپۋتاتتارىنىڭ حالىقپەن كەزدەسۋى اياسىندا دەپۋتات داۋلەت تۇرلىحانوۆ استانا قالاسىنداعى بىرنەشە الەۋمەتتىك جانە ينفراقۇرىلىمدىق نىسانداردى ارالاپ, تۇرعىنداردىڭ جاي-كۇيىمەن تانىستى.
وسىنداي كەزدەسۋلەردىڭ ءبىرى الماتى اۋدانىنداعى «قازاقستان» سپورت كەشەنىنىڭ جاعدايىن زەردەلەۋگە ارنالدى. بۇل كەزدەسۋ تۇرعىنداردىڭ ءوتىنىشى بويىنشا ۇيىمداستىرىلدى.
ايتا كەتۋ كەرەك, «قازاقستان» سپورت كەشەنى العاش رەت 2001 جىلى ناۋرىز ايىندا اشىلعان. 2007 جىلى بۇل كەشەن «بارىس» حوككەي كلۋبىنىڭ قۇرلىقتىق حوككەي ليگاسىنا (قحل) قاتىسۋىنا بايلانىستى قايتا جوندەۋدەن ءوتتى جانە «بارىس» حك-نىڭ نەگىزگى ارەناسى رەتىندە پايدالانىلدى. الايدا, 2018 جىلدىڭ تامىزىندا كەشەندەگى باسسەين جوندەۋگە جابىلىپ, 2019 جىلدىڭ ساۋىرىندە سپورت نىسانى تولىعىمەن جۇمىسىن توقتاتقان.
تولىق تەحنيكالىق تەكسەرىستىڭ ناتيجەسىندە عيمارات اپاتتى جاعدايدا دەپ تانىلعان. وسىعان وراي, سپورت كەشەنىن قالپىنا كەلتىرۋ قاجەتتىگى تۋىنداپ وتىر.
«استانا قالاسىنىڭ قۇرىلىس باسقارماسى» مەملەكەتتىك مەكەمەسىنىڭ باسشىسى تولەگەن قۇلۇشەۆتىڭ مالىمەتىنشە, سپورت كەشەنىنە قاتىستى جوبالىق-سمەتالىق قۇجاتتاما 2025 جىلدىڭ ناۋرىز-ءساۋىر ايلارىندا دايىن بولماق. وسىدان كەيىن قۇرىلىس-مونتاجداۋ جۇمىستارى باستالادى دەپ جوسپارلانىپ وتىر. تولىق قايتا جاڭارتۋ جۇمىستارى 2026 جىلى اياقتالادى.
داۋلەت تۇرلىحانوۆ ءوز سوزىندە بۇل سپورت كەشەنىن قالپىنا كەلتىرۋدىڭ استانا قالاسى ءۇشىن ماڭىزدى ەكەنىن اتاپ ءوتتى.
«بۇل سپورت كەشەنىن قايتا جاڭارتۋ تۇرعىنداردىڭ بەلسەندى ءومىر سالتىنا جانە قالانىڭ سپورتتىق ينفراقۇرىلىمىن دامىتۋعا وڭ ىقپال ەتەدى. بۇل – تەك سپورتشىلار ءۇشىن عانا ەمەس, بۇكىل قالا تۇرعىندارى ءۇشىن ماڭىزدى نىسان. سپورت كەشەنىن قالپىنا كەلتىرۋ جۇمىستارى استانا قالاسىنىڭ سپورتتىق الەۋەتىن ارتتىرۋعا جانە تۇرعىنداردىڭ دەنساۋلىعىن جاقسارتۋعا باعىتتالعان ماڭىزدى جوبا بولماق. حالىقتىڭ ۇسىنىس-تىلەكتەرى مەن دەپۋتاتتاردىڭ باقىلاۋى بۇل جۇمىستىڭ ساپالى ورىندالۋىنا ىقپال ەتەدى», دەدى دەپۋتات.