بويى بەس مەترگە جۋىق قارت جانۋار قالاداعى زووباقتا 25 جىل ءومىر ءسۇردى (ادام ومىرىمەن ەسەپتەگەندە بۇل 95 جاسقا تەڭ). جالپى جابايى تابيعاتتا كەرىكتەر شامامەن 20 جىل ءومىر سۇرەدى جانە بۇل جاستان اساتىندارى سيرەك كەزدەسەدى, دەپ حابارلايدى Egemen.kz.
حان الماتى حايۋاناتتار باعىنا وڭتۇستىك افريكا رەسپۋبليكاسىنان اكەلىنگەن. ول جەرگىلىكتى اۋا-رايىنا, وسىنداعى ورتاعا تەز بەيىمدەلىپ, كەلۋشىلەردىڭ سۇيىكتى جانۋارىنا اينالدى.
شيرەك عاسىر ىشىندە الماتى زووباعىندا حاننىڭ 12 ۇرپاعى دۇنيەگە كەلدى.
- قازىر حاننان تۋعان باتىر, حانزادا جانە سۇلتان اتتى كىشكەنتاي كەرىكتەر زووباق قىزمەتكەرلەرىنىڭ قامقورلىعىندا جانە كەلۋشىلەردى قۋانتىپ ءجۇر. ال حاننىڭ باسقا ق ۇلىندارى ماسكەۋ, كراسنودار ولكەسى, شىمكەنت, تاشكەنت, اقتوبە, فەرعانا حايۋاناتتار باعىنا بەرىلگەن. حان – جاعىمدى ءارى جۇمساق مىنەزىمەن, ەرەكشە كوركىمەن ەڭ تانىمال جانە سۇيكىمدى جانۋارلارىمىزدىڭ ءبىرى بولدى, سونداي-اق زووباق قىزمەتكەرلەرىنىڭ جانە بارشا كەلۋشىلەردىڭ ەسىندە قالادى, - دەلىنگەن حابارلامادا.
زووباقتىڭ مالىمەتىنشە, حان سوڭعى كەزدەرى ءوزىن سەرگەك سەزىنگەن, تابەتى دە جاقسى بولعان. جەم-ءشوبىن دە تولىق جەپ تاۋىسىپ جۇرگەن. الايدا قارتتىعىنا بايلانىستى ازداپ بۋىندارى اۋىرعان.
- حان كەشكىسىن وتە بەلسەندى بولدى. وزىنە بەرىلگەن جەم-ءشوبىن تاۋىسىپ جەدى. ازداپ اقساپ جۇرەتىن. تاڭعا جۋىق ول جەرگە جاتىپ قالدى. ادەتتە, كەرىكتەر تولىق دەنەسىمەن جەرگە جاتپايدى. كەرىك ءۇشىن 25 جاس – ادامنىڭ 95 جاسىنداي بولادى. ءبىز ونى ءبارىمىز جاقسى كوردىك, كەلۋشىلەر دە ونى جاقسى كورەتىن. ۇزاق جىلدار بويى حانعا قامقورلىق كورسەتىپ, كۇتىم جاساعان بارلىق قىزمەتكەرلەرگە العىس ايتامىز, – دەدى, "تۇياقتى جانۋارلار" سەكتسياسىنىڭ مەڭگەرۋشىسى بالابەك ماحاتوۆ.
تاۋەلسىز پاتولوگواناتوم مامان, قازاق ۇلتتىق اگرارلىق زەرتتەۋ ۋنيۆەرسيتەتىنىڭ پروفەسسورى امانگەلدى ماۋلانوۆ حاننىڭ جالپى جاعدايى جاقسى بولعان, ونىڭ بويىندا ينفەكتسيالىق جانە باقسا دا قاتەرلى دەرت بولماعانىن ايتتى.
- كەرىكتىڭ ءولىمىنىڭ سەبەبى – قارتايعان جاسقا بايلانىستى قايتىمسىز وزگەرىستەر ياعني بيولوگيالىق قارتايۋ, - دەدى ول.