كولىك مينيسترلىگى وسى جىلى جۇزەگە اسىراتىن ءىرى جوبالارىمەن ءبولىستى, دەپ جازادى Egemen.kz.
قازاقستاندا اۆياتسيا سالاسىنداعى ماڭىزدى ينفراقۇرىلىمدىق جوبالاردى جۇزەگە اسىرۋ باستالدى.
پرەزيدەنت تاپسىرماسىنا ساي كۋرورتتىق ايماقتار قاتونقاراعاي, زايسان, كەندىرلىدە وسى جىلى اۋەجاي قۇرىلىسى باستالادى.
مينيسترلىك قازىر بۇل نىسانداردىڭ جەر ۋچاسكەلەرىن راسىمدەۋ جانە جوبالاۋ جۇمىستارى جۇرگىزىلىپ جاتقانىن ءمالىم ەتتى.
اۆتوموبيل جولدارى سالاسىندا دا اۋقىمدى جوسپارلار جۇزەگە اسىرۋ جوسپارلانعان. جاڭا اۆتوجولداردىڭ جالپى ۇزىندىعى 4,7 مىڭ شاقىرىم, ونىڭ 3,7 مىڭ شاقىرىمى – ءى ساناتتاعى جولدار بولماق.
«بيىل «دوستىق – مويىنتى» جوباسى بويىنشا تەمىر جول قۇرىلىسى اياقتالادى. بۇل وتكىزۋ قابىلەتىن 5 ەسەگە ارتتىرىپ, تاۋلىگىنە 12-60 پويىز جۇبىنىڭ ۇزدىكسىز قوزعالىسىن قامتاماسىز ەتەدى. سونىمەن قاتار «الماتى اينالما جولى» جوباسى جۇزەگە اسىرىلادى. سونداي-اق «دوستىق – بەسكول» جانە «مويىنتى – بالقاش» ۋچاسكەلەرىندە دە قوزعالىستى اشۋ جوسپارلانعان. بۇل شەشىم ۋچاسكەلەردەگى پويىز قوزعالىسىن جاقسارتۋعا جانە جۇك تاسىمالى ماسەلەلەرىن شەشۋگە كومەكتەسەدى», دەلىنگەن كولىك مينيسترلىگىنىڭ حابارلاماسىندا.
تەڭىز كولىگىن دامىتۋ ماقساتىندا اقتاۋ پورتىندا كونتەينەرلىك حاب سالۋ جۇمىستارى باستالدى. بۇل قازاقستاننىڭ حالىقارالىق لوگيستيكاداعى ورنىن نىعايتىپ, ازەربايجان, گرۋزيا جانە تۇركيا ارقىلى وتەتىن ترانسكاسپي باعىتىنداعى كونتەينەرلەر تاسىمالى كولەمىن ۇلعايتۋعا, سونداي-اق قىتايدان ەۋروپاعا جەتكىزىلەتىن ترانزيتتىك جۇكتەردىڭ ءبىر بولىگىن قايتا باعىتتاۋعا مۇمكىندىك بەرەدى.