«Ana tili» باسىلىمىنا بەرگەن سۇحباتىندا قاسىم-جومارت توقاەۆ وتكەن جىلدى قورىتىندىلاپ, مەملەكەتتىك قۇرىلىس ستراتەگياسىنىڭ نەگىزىندە جاتقان باسىم قاعيداتتاردى اتاپ ءوتتى. سىرتقى ساياسات ۇلتتىق ستراتەگيادا نەگىزگى ورىندى الادى. ول ەلدىڭ گەوساياسي مۇددەلەرىن, ايماقتا جانە جالپى الەمدە بەيبىتشىلىك پەن تۇراقتىلىقتى ساقتاۋعا دەگەن ۇمتىلىسىن دا كورسەتەدى.
ەلىمىزدىڭ سىرتقى ساياساتىنىڭ ماڭىزدى قاعيداتتارىنىڭ ءبىرى – كوپۆەكتورلىلىق, بۇل رەسەي, قىتاي, اقش, ەۋروپالىق وداق جانە باسقا دا ءارتۇرلى جاھاندىق ويىنشىلاردىڭ مۇددەسى اراسىنداعى تەڭگەرىمدى تابۋعا, تاۋەكەلدەردى بارىنشا ازايتۋعا, تيىمدىلىكتى بارىنشا ارتتىرۋعا مۇمكىندىك بەرەدى. ءبىزدىڭ ستراتەگيالىق ارىپتەستەرىمىزبەن قارىم-قاتىناستى تەرەڭدەتۋ – تۇراقتىلىق كەپىلى.
ەلىمىزدىڭ ستراتەگيالىق مۇددەسى – ايماقتى تۇراقتاندىرۋ, ەكونوميكالىق بايلانىس پەن قاۋىپسىزدىكتى نىعايتۋ. قازاقستان ءتۇرلى پلاتفورما ارقىلى ايماقتىق ىنتىماقتاستىق يدەيالارىن بەلسەندى تۇردە العا جىلجىتىپ كەلەدى. سىرتقى ساياسات پەن تۇراقتى دامۋ ەكونوميكالىق, الەۋمەتتىك جانە ەكولوگيالىق تۇراقتىلىقتى ساقتاۋعا باعىتتالعان ستراتەگيالار ارقىلى ءوزارا بايلانىستى. بۇل ىشكى جانە حالىقارالىق دەڭگەيدە ماڭىزدى ەكەنىن اتاپ وتكەن ءجون. تۇراقتى دامۋعا ۇمتىلاتىن ەلدەر وسى سالالارداعى ۇزاق مەرزىمدى ماقساتتارعا قول جەتكىزۋ ءۇشىن سىرتقى ساياساتىنىڭ ءارتۇرلى اسپەكتىسىن بىرىكتىرەدى.
ەكولوگيا, كليماتتىڭ وزگەرۋى, ەنەرگەتيكالىق قاۋىپسىزدىك جانە تسيفرلىق ترانسفورماتسيا ماسەلەلەرى دە ماڭىزدى سالا بولىپ قالا بەرمەك. قازاقستان ورتا دەرجاۆا جانە پراگماتيكالىق سىرتقى ساياساتى بار مەملەكەت رەتىندە تۇراقتى دامۋعا مۇددەلى جانە حالىقارالىق ۇيىمدار اياسىندا سەرىكتەستەرمەن بەلسەندى ىنتىماقتاسادى. سونداي-اق كليماتتىڭ وزگەرۋىمەن كۇرەسۋگە, بيوارتۇرلىلىكتى ساقتاۋعا, ازىق-ت ۇلىك قاۋىپسىزدىگىنە قول جەتكىزۋگە باعىتتالعان تاعى باسقا جاھاندىق باستامالارعا قاتىسادى. حالىقارالىق الاڭدارعا اتسالىسۋ ەلگە سۋ رەسۋرستارى, ەكولوگيا جانە كوشى-قونعا قاتىستى ماسەلەلەردى شەشۋگە, سونداي-اق وڭىرلىك قاۋىپسىزدىكتى نىعايتۋعا جول اشادى.
جىلدام وزگەرمەلى حالىقارالىق تارتىپتە بىرقاتار ەلمەن, حالىقارالىق ۇيىمدارمەن ءتيىمدى سەرىكتەستىك ورناتۋعا ۇمتىلىپ, تەڭگەرىمدى, پراگماتيكالىق جانە كوپۆەكتورلى سىرتقى ساياساتتى جالعاستىرىپ كەلەمىز. ءبىزدىڭ كوپۆەكتورلى سىرتقى ساياساتىمىزدىڭ تاعى ءبىر ماڭىزدى تۇسى مەن پايداسى – تازا تەحنولوگيالاردى پايدالانۋعا, جاڭارتىلعان ەنەرگيا كوزدەرىن دامىتۋعا, ينفراقۇرىلىمدى جاڭعىرتۋعا باعىتتالعان جوبالارعا شەتەلدىك ينۆەستيتسيالاردى تارتۋ ءۇشىن جاعداي جاساۋ. بۇل ينۆەستيتسيالار تۇراقتى ەكونوميكاعا كوشۋدى جەتەلدەتۋگە كومەكتەسەدى.
حالىقارالىق ارەناداعى پراگماتيكالىق ارەكەتتەردىڭ ارقاسىندا ەلىمىز 15,7 ملرد دوللار تارتا الدى. بۇل سولتۇستىك جانە ورتالىق ازيا ايماعىنداعى ەڭ جوعارعى ناتيجەنى كورسەتتى. وسىلايشا, ەلىمىز ءوزىنىڭ سىرتقى ساياساتىن جۇزەگە اسىرۋدا قالىپتاسقان كوزقاراستى ۇستانا وتىرىپ, ورنىقتى دامۋعا تىكەلەي اسەر ەتەتىن ساياسي تۇراقتىلىقتى قامتاماسىز ەتۋدى جالعاستىرىپ كەلەدى.
بەكجان سادىقوۆ,
پرەزيدەنت جانىنداعى قسزي ەۋروپا جانە امەريكالىق زەرتتەۋلەر ءبولىمىنىڭ باسشىسى