جىلداعى ستاتيستيكاعا جۇگىنسەك, جاڭا جىلدى مەرەكەلەۋ قارساڭىندا ءورت جاعدايلارى جيىلەي تۇسەتىنىن بايقايمىز. وڭىرلىك كوممۋنيكاتسيالار قىزمەتى الاڭىندا جۋرناليستەرمەن جۇزدەسكەن الماتىلىق توتەنشەلىكتەر تۇرعىنداردى سالعىرتتىقتىڭ سالدارىنان بولاتىن وسىنداي اپاتتاردىڭ الدىن الۋعا شاقىردى.
الماتى قالاسى توتەنشە جاعدايلار دەپارتامەنتى باسشىسىنىڭ ورىنباسارى كارىمجان راحماننىڭ ايتۋىنشا, جىل سايىن الماتىدا جاڭا جىلدى مەرەكەلەۋ كەزىندە ورتا ەسەپپەن 11 ءورت وقيعاسى تىركەلەتىن كورىنەدى. وقىس وقيعالاردىڭ باسىم بولىگى پيروتەحنيكالىق بۇيىمدارعا بايلانىستى بولادى. سوڭعى بەس جىلدا وسىنداي سەبەپپەن 57 ءورت تىركەلگەنىن العا تارتقان مامان, مەگاپوليس تۇرعىندارى ساقتىق شارالارىنا سالعىرت قاراماسا دەيدى.
«31 جەلتوقسان وتشاشۋسىز وتپەيتىنى بەلگىلى. الايدا وسى فاكتوردىڭ سەبەبىنەن دەنساۋلىعىنا ءتۇرلى دەڭگەيدە زاقىم كەلتىرىپ, ءتىپتى ءۇيىن نەمەسە كولىگىن ورتكە وراپ الىپ جاتقاندار از ەمەس. بىلتىر مەرەكە كۇنى الماتىدا 18 ادام, ونىڭ ىشىندە 11 بالا پيروتەحنيكانى دۇرىس پايدالانباۋ سالدارىنان العان جاراقاتتارىنا بايلانىستى مەديتسينالىق كومەككە جۇگىندى. ولاردىڭ اراسىندا كورۋ قابىلەتىنە زيان تيگەندەر دە بار. ءبىز بالالارعا وتشاشۋلار مەن پەتاردالاردى ۇشىرۋعا جول بەرمەۋدى ۇسىنار ەدىك. بۇل قايعىلى وقيعالاردى بولدىرماۋعا كومەكتەسەدى», دەيدى قالالىق جەدەل جاردەم قىزمەتى ديرەكتورىنىڭ ورىنباسارى اندرەي لوجكين.
ءتارتىپ ساقشىلارى الماتىدا «پيروتەحنيكا» وپەراتسياسى ءجۇرىپ جاتقانىن حابارلادى. 19 جەلتوقسانداعى جاعداي بويىنشا پيروتەحنيكالىق ونىمدەردىڭ 141 قورابى جانە بىرنەشە رەت اتىلاتىن «VIP ساليۋت» وتشاشۋلارىنىڭ 125 داناسى تاركىلەنگەن. پيروتەحنيكانى زاڭسىز ساتۋدىڭ 22 فاكتىسى انىقتالعان بولسا, تاركىلەنگەن ءونىمنىڭ جالپى سالماعى 365 كگ قۇراعان. پوليتسەيلەر بۇل باعىتتاعى جۇمىس جالعاسا بەرەتىنىن جەتكىزدى.
«زاڭسىز ساۋدا اينالىمى ساپاسىز تاۋارلاردىڭ جاپپاي ساتىلۋىنا اكەلەدى. سالدارىنان ءتۇرلى كەلەڭسىز وقيعالار ورىن الۋى ىقتيمال. وسى سەبەپتى باقىلاۋدى بارىنشا كۇشەيتىپ, ارىپتەستەرىمىز قالانىڭ ءار نۇكتەسىن مۇقيات قاداعالايدى. قالا اۋماعىندا 145 ءموبيلدى توپ جۇمىس ىستەيدى. ءبىزدىڭ مىندەتىمىز — قاۋىپتى ونىمدەردى ساتۋدىڭ الدىن الۋ جانە اسىرەسە كامەلەتكە تولماعاندار اراسىندا جاراقات الۋ قاۋپىن بولدىرماۋ», دەيدى اكىمشىلىك پوليتسيا باسشىسىنىڭ ورىنباسارى تيمۋر سەرىك ۇلى.
جاۋاپتى ماماندار قالاداعى 72 شىرشا مەن 17 مۇز ايدىنى اۋماعىنا تەكسەرىس جۇرگىزىپ, مەنشىك يەلەرىنە ءورت قاۋىپسىزدىگى شارالارىن كۇشەيتۋ بويىنشا ۇسىنىس بەرگەن. قايعىلى جاعدايلاردى بولدىرماۋ ءۇشىن الماتى تۇرعىندارىن جاڭا جىلدى مەرەكەلەۋگە جاۋاپكەرشىلىكپەن قاراۋعا شاقىرعان ماماندار پيروتەحنيكامەن قاۋىپسىز جۇمىس ىستەۋدىڭ نەگىزگى ەرەجەلەرىن ەسكە سالدى. ماماندار كەڭەسىنە ءمان بەرسەك, ونىمدەردى تەك ارنايى دۇكەندەردەن ساتىپ الۋ, قاپتامانىڭ تۇتاستىعىن جانە جارامدىلىق مەرزىمىن تەكسەرۋ, پيروتەحنيكانى جىلۋ مەن ىلعالدان الىس ۇستاۋ, وتشاشۋدى تۇتاتار كەزدە ادامداردان, عيماراتتاردان جانە اعاشتاردان 50 مەتر قاشىقتىقتى ساقتاۋ, ءفيتيلدى تۇتاتۋ كەزىندە ونىمگە ەڭكەيمەۋ, 16 جاسقا دەيىنگى بالالاردىڭ ءوز بەتىنشە تۇتاتۋلارىنا جول بەرمەۋ وقىس وقيعالاردىڭ الدىن الۋعا ىقپالىن تيگىزەدى.
دەگەنمەن كەيىنگى جىلدارى پيروتەحنيكالىق وتشاشۋلاردى تۇتىنۋ دەڭگەيى تومەندەگەن. سوعان سايكەس, زارداپ شەگۋشىلەر سانى دا سيرەگەن. ايتالىق, 2017 جىلى جاڭا جىل تۇنىندە پيروتەحنيكادان زارداپ شەككەن 117 تۇرعىن اۋرۋحاناعا جۇگىنگەن بولسا, 2018 جىلى 120-دان استام الماتىلىق ءتۇرلى دەڭگەيدە جاراقات العان. ولاردىڭ اراسىندا دەنەسىنىڭ 50 پايىزدان استامىن كۇيىك شالىپ, وكىنىشتى جاعدايدا قالعاندار بار.
الماتى