قۇتقارۋشىلار باسقالاردى امان الىپ قالۋ ءۇشىن ءوز ومىرلەرىن قاتەرگە تىگىپ, كۇن سايىن ەرلىك جاسايدى. بۇل ماقالادا ءبىزدى رۋحتاندىرىپ, جۇرەككە ماقتانىش سەزىمىن ۇيالاتقان وتاندىق قۇتقارۋشىلاردىڭ ناعىز ەرلىكتەرى تۋرالى باياندايتىن بولامىز.
قۇتقارۋشىلارىمىزدى توتەنشە جاعدايلارعا قارسى كۇرەستىڭ الدىڭعى شەبىندە تۇرعان ناعىز قاھارماندار دەسەك تە ارتىق ەتپەس. سەبەبى ءورت, سۋ تاسقىنى, قار كوشكىنى نەمەسە اپات بولسىن, بۇل ماماندار كەز كەلگەن ۋاقىتتا كومەكتەسۋگە دايىن تۇرادى. ولاردىڭ جۇمىسى تەك فيزيكالىق ەڭبەك عانا ەمەس, سونىمەن بىرگە ۇلكەن پسيحولوگيالىق جاۋاپكەرشىلىك. سەبەبى ولار ەڭ قيىن جاعدايلاردا ادام ءومىرىن ساقتاپ قالۋدا كاسىبيلىك پەن تاباندىلىق تانىتادى.
اباي وبلىسىنداعى ءورت
استانا قالاسى تجد №24 ءموسب بولىمشە كومانديرى ەلدار قانافيانوۆ كۇردەلى ورتتەردى سوندىرۋگە جانە اۆاريالىق-قۇتقارۋ جۇمىستارىن جۇرگىزۋگە قاتىسقان. سولاردىڭ ءبىرى - 2022 جىلى قوستاناي وبلىسىندا ورمان ءورتىن جانە 2023 جىلى اباي وبلىسىندا ورتتەردى سوندىرۋگە بارعان ەلوردالىق ءورت سوندىرۋشىلەر قۇرامىندا بولعان. ال بيىل ەلوردالىق قۇتقارۋشىلار قۇرامىندا الدىمەن قوستاناي وبلىسىندا سۋ تاسقىنىنا قارسى جانە تاسقىننىڭ سالدارىمەن كۇرەسۋ, ءۇي اۋلالارىنان سۋ سورۋ جانە وتكىزۋ جۇمىستارىن جۇرگىزدى. قوستاناي وبلىسىنداعى جۇمىستاردى ءساتتى اياقتاپ, باتىس قازاقستان وبلىسىنداعى سۋ تاقىنىنا قارسى جۇمىستاردى جۇرگىزۋگە قاتىسقان.
ەلدار قانافيانوۆ «رۋحتاستار» جاستار سىيلىعىنىڭ «قايسار جىل ادامى» نوميناتسياسى بويىنشا لاۋرەات اتاندى.
اقمولا وبلىسىنداعى سۋ تاسقىنى
تاراز قالاسىنداعى №20 ءورت ءسوندىرۋ ءبولىمىنىڭ قاراۋىل باستىعى بايداۋلەت دۇيسەنوۆ 2024 جىلى اقمولا وبلىسىندا سۋ تاسقىنى كەزىندە قۇتقارۋ وپەراتسياسىنا قاتىسقان. ونىڭ كومانداسى ادام ءومىرىن ساقتاپ قالۋعا جانە اۆاريالىق-قۇتقارۋ جۇمىستارىن ءتيىمدى جۇرگىزۋگە مۇمكىندىك بەرەتىن جوعارى كاسىبيلىك پەن كوماندالىق جۇمىستى كورسەتتى.
دۇيسەنوۆ بايداۋلەت ارىستانباي ۇلى ءوزىن جوعارى كاسىبي بىلىكتى قۇتقارۋشى رەتىندە كورسەتە ءبىلدى. 2024 جىلى وبلىس قاۋىپسىزدىگىن قامتاماسىز ەتۋگە قوسقان ۇلەسى جانە تابيعي اپاتتار كەزىندەگى ەرلىگى ءۇشىن «اۋليەاتا ۇزدىگى-2024» جاستار سىيلىعىنىڭ لاۋرەاتى اتاندى.
سۋ تاسقىنى زاردابىن جويۋ
قر توتەنشە جاعدايلار مينيسترلىگى قاسىم قايسەنوۆ اتىنداعى 68303 اسكەري ءبولىمىنىڭ ۆزۆود كومانديرى ميرات بەكەتوۆ ءتۇرلى قۇتقارۋ جۇمىستارىندا ەرەكشە كوزگە ءتۇستى. سۋ تاسقىنىنىڭ زارداپتارىن جويۋعا جانە سۋ قويمالارىنداعى ادامداردى قۇتقارۋعا اتسالىسىپ, جوعارى كاسىبي شەبەرلىك پەن جانقيارلىق تانىتقان.
ول سۋ تاسقىنىنىڭ زارداپتارىن جويۋعا قاتىسقانى ءۇشىن «ەرلىگى ءۇشىن» مەدالىمەن ماراپاتتالعان.
تۇتىنگە ورانعان پاتەردەن ءسابيدى قۇتقارىپ قالدى
2024 جىلدىڭ جەلتوقسانىندا ءورت ءسوندىرۋ ءبولىمىنىڭ كومانديرى ازامات قۇرمانيازوۆ اتىراۋ قالاسىندا ورتەنگەن پاتەردەن 2023 جىلى تۋعان ءسابيدى قۇتقارىپ قالدى. پاتەر ەسىگى سىرتىنان ق ۇلىپتاۋلى بولعان. قۇتقارۋشى قويۋ ءتۇتىن مەن قاۋىپكە قاراماستان عيماراتقا تەز كىرىپ, بالانى سىرتقا الىپ شىققان. سابيگە العاشقى مەديتسينالىق كومەك كورسەتىلىپ, امان قالدى. بۇل وقيعا توتەنشە جاعدايلار مينيسترلىگى قىزمەتكەرلەرىنىڭ تيىمدىلىگى مەن ىسكەرلىگىنىڭ جارقىن مىسالى بولدى.
تۇرعىن ۇيدەگى ورتتەن جەتى ادامدى قۇتقاردى
استانا قالاسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى №5 مامانداندىرىلعان ءورت ءسوندىرۋ ءبولىمىنىڭ اعا ءورت ءسوندىرۋشى-قۇتقارۋشىسى نۇرداۋلەت ەسداۋلەتوۆ ادام ءومىرىن ساقتاپ قالۋدا تالاي رەت باتىلدىق پەن كاسىبي شەبەرلىك كورسەتتى.
2024 جىلدىڭ 1 ساۋىرىندە استانادا توعىز قاباتتى تۇرعىن ۇيدە ءورت بولدى. وقيعا ورنىنا جەتكەن نۇرداۋلەت ءۇش اياقتى باسپالداق ورناتىپ, باتىلدىق تانىتىپ, بالانى ءتورتىنشى قاباتتاعى تەرەزەدەن امان الىپ قالدى. سول كۇنى بارلىعى جەتى ادام قۇتقارىلعان.
ءبىرىنشى وقيعادان بىرنەشە كۇن وتكەن سوڭ نۇرداۋلەت قاراساي باتىر كوشەسىندەگى ۇيدەگى ءورتتى سوندىرۋگە قاتىسقان. ەكىنشى قاباتتاعى پاتەردەن قويۋ قارا ءتۇتىن شىعىپ جاتقان. ءورت ءسوندىرۋشى جابىلعان تەمىر ەسىكتى اشىپ, قويۋ ءتۇتىن مەن جوعارى تەمپەراتۋراعا قاراماستان ءۇي-جايدى ارالاپ شىعىپ, ەدەندە جاتقان ەكى قارت ادامدى تاۋىپ الىپ, ولاردى بىرىنەن سوڭ ءبىرى ورتەنىپ جاتقان پاتەردەن الىپ شىققان.
«اقساي» بازارىنداعى ءىرى ءورت
جامبىل وبلىسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ جەدەل كەزەكشىسى ەرتاي رايىمبەكوۆ بىرقاتار اۆاريالىق-قۇتقارۋ جۇمىستارىندا ەرەكشە ەرلىك پەن كاسىبيلىك كورسەتتى.
2023 جىلدىڭ 20 قاڭتارىندا تارازداعى «اقساي» بازارىندا ءىرى ءورت بولدى. ەرتاي رايىمبەكوۆ گاز-تۇتىننەن قورعاۋ قىزمەتىن باسقارىپ, باسىن قاتەرگە تىگىپ, ورتەنىپ جاتقان عيماراتقا كىرىپ كەتكەن. وپەراتسيا بارىسىندا ءورت قۇرساۋىندا قالعان ەكى ايەل مەن ءبىر مۇگەدەكتى ءوزى قۇتقارعان. ونىڭ شەشۋشى ارەكەتتەرى ودان دا اۋىر زارداپتاردىڭ الدىن الىپ, ادامداردىڭ ءومىرىن ساقتاپ قالدى.
ەرتاي رايىمبەكوۆ ەرلىگى ءۇشىن II دارەجەلى «ايبىن» وردەنىمەن ماراپاتتالدى.
قاراعاندى وبلىسى توتەنشە جاعدايلار دەپارتامەنتىنىڭ №18 ءورت ءسوندىرۋ ءبولىمىنىڭ جۇرگىزۋشىسى جەڭىس بولاتوۆ بىرقاتار قۇتقارۋ جۇمىستارىندا ءوزىن كورسەتە ءبىلدى.
اقتوعاي اۋدانىنداعى ىزدەستىرۋ-قۇتقارۋ وپەراتسياسى
قاراعاندى وبلىسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى №18 ءورت ءسوندىرۋ ءبولىمىنىڭ ءورت ءسوندىرۋ اۆتوكولىگىنىڭ جۇرگىزۋشى-قىزمەتكەرى جەڭىس بولاتوۆ پەن نۇرحات ءنۇسىپوۆ 2024 جىلدىڭ 8 اقپانىندا ارىپتەستەرىمەن بىرگە اقتوعاي وڭىرىندە ىزدەۋ-قۇتقارۋ جۇمىستارىنا قاتىستى. جەدەل توپ 7 اقپاندا بەلگىسىز باعىتقا كەتىپ قالعان جانە ايىرتاس اۋىلىنان 6 شاقىرىم باتىسقا قاراي ورنالاسقان ايەل مەن بالانى تاۋىپ الىپ, قۇتقاردى.
جەڭىس بولاتوۆ سۋ تاسقىنىنىڭ زارداپتارىن جويۋعا جانە ادامداردى قۇتقارۋعا بەلسەنە قاتىسقانى ءۇشىن ءىىى دارەجەلى «ايبىن» وردەنىمەن ماراپاتتالدى.
نۇرحات ءنۇسىپوۆ قىستا اۆاريالىق-قۇتقارۋ جانە ىزدەستىرۋ-قۇتقارۋ جۇمىستارىن جۇرگىزۋ كەزىندە كورسەتكەن ەرلىگى ءۇشىن ءىىى دارەجەلى «ايبىن» وردەنىمەن ماراپاتتالعان.
ۋست-تالوۆكاداعى ءورت
شىعىس قازاقستان وبلىسى, شەمونايحا قالاسىنىڭ №28 ءورت ءسوندىرۋ ءبولىمىنىڭ اعا ءورت ءسوندىرۋشى-قۇتقارۋشىسى دۋمان كەنجەبەكوۆ ادامداردى قۇتقارۋدا ەرەكشە ەرلىك پەن كاسىبيلىك كورسەتتى.
2024 جىلدىڭ 1 قازانىندا ۋست-تالوۆكا اۋىلىندا كوپقاباتتى ءۇيدىڭ ءۇشىنشى قاباتىندا ءورت بولدى. دۋمان كەنجەبەكوۆ كۇزەتشىمەن بىرگە وقيعا ورنىنا دەر كەزىندە جەتىپ, 10 ادامدى, ونىڭ ىشىندە 6 بالانى ەۆاكۋاتسيالاعان. ونىڭ شەشۋشى ارەكەتتەرىنىڭ ارقاسىندا ادام شىعىنى مەن اۋىر زارداپتاردىڭ الدىن الدى.
ەرلىگى مەن ادالدىعى ءۇشىن دۋمان كەنجەبەكوۆ شىعىس قازاقستان وبلىسىندا «جىل قاھارمانى» اتاعىنا يە بولدى. سىيلىقتى وعان وبلىس اكىمى ەرمەك كوشەرباەۆ تاپسىرىپ, ونىڭ ازاماتتاردىڭ قاۋىپسىزدىگى مەن قورعالۋىن قامتاماسىز ەتۋگە قوسقان ۇلەسىن اتاپ ءوتتى.
اۆاريالىق-قۇتقارۋ جۇمىستارى
مۇنايلى اۋدانىنىڭ №5 ءوسب باستىعىنىڭ ورىنباسارى ازاماتتىق قورعاۋ كاپيتانى مۇسلىم قۇدايبەرگەن اۆاريالىق-قۇتقارۋ جۇمىستارىنا قاتىسقان كەزدە باتىلدىق پەن كاسىبيلىك تانىتقانى ءۇشىن «ۇزدىك توتەنشە جاعداي قىزمەتى» نوميناتسياسىنا يە بولدى.
جالپى, قۇتقارۋشىلار - ءبىزدىڭ زامانىمىزدىڭ ناعىز قاھارماندارى, ولاردىڭ قايسارلىعى, كاسىبيلىگى مەن ادالدىعى مىڭداعان ادامنىڭ ءومىرىن ساقتاپ, قايعىلى وقيعالاردىڭ الدىن الدى. ولاردىڭ باتىلدىعى جاي عانا مىنەزدىك قاسيەت ەمەس, ەڭ قيىن جاعدايدا ارەكەت ەتۋگە دايىن بولۋدى تالاپ ەتەتىن كاسىپتىڭ نەگىزى.