استانادا 27 جەلتوقساندا كۇندىزگى اۋىسىمعا 1 500-گە جۋىق ارنايى تەحنيكا مەن 2,6 مىڭنان استام كوممۋنالدىق قىزمەتكەر قار كۇرەۋگە شىقتى, دەپ حابارلايدى Egemen.kz.
قالا اكىمدىگىنىڭ مالىمەتىنشە, استانادان وتكەن تۇندە 2 765 رەيسپەن 37 968 تەكشە مەتر قار شىعارىلعان. قىس مەزگىلىنىڭ باسىنان باستاپ پوليگوندارعا 138 644 رەيس ارقىلى 1 780 577 تەكشە مەتردەن استام قار شىعارىلدى.
«ەڭ الدىمەن, ەرەجەگە سايكەس, جولداردا كەپتەلىس بولماس ءۇشىن قوزعالىسى وتە قارقىندى ورىندار تازارتىلادى. سونداي-اق قارقىندىلىعى ورتاشا ۋچاسكەلەر – الاڭدار, ۆوكزال ماڭى اۋماقتارى, تروتۋارلار, الەۋمەتتىك نىساندارعا كىرمە جولدار جانە ت.ب. تازارتىلادى. ورتالىق كوشەلەردى, جولاۋشىلار كولىگى مارشرۋتتارى جۇرەتىن ورىنداردى, ايالدامالار مەن تروتۋارلاردا تازالاۋ دا باسىمدىققا يە», دەلىنگەن حابارلامادا.
ايتا كەتەيىك, قالادا بىرنەشە جابدىقتالعان قار پوليگونى بار. ولار ساموسۆال تەحنيكاسىنىڭ نومىرلىك بەلگىلەرىن وقۋ جۇيەسىمەن جابدىقتالعان, مۇندا بەينەباقىلاۋ كامەرالارى ورناتىلىپ, جارىقتاندىرۋ قوسىلعان.