بايقوڭىر اۋدانى بويىنشا الەۋمەتتىك قىزمەت كورسەتۋ ورتالىعىنىڭ زەينەتكەرلەرى «استانا قالاسىنىڭ مۇگەدەك بالالار قوعامى» قوعامدىق بىرلەستىگىنىڭ تاربيەلەنۋشىلەرىنە ارناپ شىرشا مەرەكەسىن وتكىزدى, دەپ جازادى Egemen.kz.
مەرەكەلىك كەشكە قاتىسقان 15 بالا اياز اتا مەن اقشاقارعا ءان سالىپ, تاقپاق ايتىپ بەردى. ونەرپاز زەينەتكەرلەر بۇلدىرشىندەرمەن بىرگە ءان ايتىپ, مۋلتفيلمدەرىنىڭ كەيىپكەرلەرىنە اينالىپ, كورىنىس كورسەتتى.
جاعىمدى اتموسفەرانى جاڭا جىلدىق سىيلىقتار تولىقتىرىپ, بارلىق بالالارعا تاتتىلەر مەن ويىنشىقتار تاراتىلدى.
مۇمكىندىگى شەكتەۋلى بالالاردى شىرشا مەرەكەسىمەن قۇتتىقتاۋعا كەلگەن «بەلسەندى ۇزاق ءومىر ءسۇرۋ ورتالىعىنىڭ» باسشىلىعىنا, بايقوڭىر اۋدانى اكىمدىگى مەن ارداگەرلەر كەڭەسىنىڭ وكىلدەرىنە جاڭا جىلدىق كەشتىڭ قوناقتارى ريزاشىلىقتارىن ءبىلدىرىپ, العىستارىن ايتتى.