اۋىل شارۋاشىلىعى ءوندىرىسىنىڭ دامۋ دەڭگەيى وتانداستىرىمىزدىڭ باسىم بولىگىنىڭ ءال-اۋقاتىنا تىكەلەي اسەر ەتەدى. ال بۇگىندە حالىقتىڭ 37%-دان استامى اۋىلدىق جەرلەردە تۇرادى, دەپ جازادى Egemen.kz.
580 ملرد تەڭگە اقتالدى ما؟
پرەزيدەنت تاپسىرمالارىن ورىنداۋ شەڭبەرىندە اگروونەركاسىپ كەشەنىن (اوك) قارجىلاندىرۋدىڭ قولجەتىمدىلىگى قامتاماسىز ەتىلدى. جەڭىلدىكتى قارجىلاندىرۋ كولەمى بيىل العاش رەت رەكوردتىق سوما – 580 ملرد تەڭگەنى قۇراپ, اتالعان سوما – ەگىنشىلەرگە تىكەلەي نەسيە بەرۋگە, پايىزدىق مولشەرلەمەنى تومەندەتىپ, فورۆاردتىق ساتىپ الۋعا باعىتتالدى. وسىلايشا, كوكتەمگى ەگىس جانە كۇزگى جيىن-تەرىم جۇمىستارىن تابىستى جۇرگىزۋگە قاجەتتى بارلىق جاعداي جاسالدى.
ديقاندار ءداندى داقىلداردان رەكوردتىق ءونىم جينادى
رەسپۋبليكا ەگىنشىلەرى ءداندى داقىلدار بويىنشا رەكوردتىق كولەمدە ءونىم جينادى: ورتاشا ونىمدىلىك گەكتارىنا 16,1 تسەنتنەر, 26,7 ملن توننا استىق باستىرىلدى. (سالىستىرۋ ءۇشىن ايتقاندا, 2023 جىلى ورتاشا ونىمدىلىك 10 تس/گا قۇراعان). سونىمەن قاتار 3,2 ملن توننا مايلى داقىل (ونىمدىلىك 10,9 تس/گا), 2,9 ملن توننا كارتوپ, 3,9 ملن توننا كوكونىس جانە 2,6 ملن توننا باقشا داقىلدارى جينالدى. اگروتەحنولوگيالاردى دۇرىس قولدانۋ, ساپالى تۇقىمدار, مينەرالدى تىڭايتقىشتار, وسىمدىكتەردى ءتيىمدى قورعاۋدىڭ ناتيجەسىندە جوعارى ونىمدىلىككە قول جەتكىزىلدى.
داقىلداردى ءارتاراپتاندىرۋ جۇمىسى جالعاسادى
نەگىزگى ارتىقشىلىقتاردىڭ ءبىرى – كەڭ بايتاق اۋماق, حالىق تىعىزدىعىنىڭ تومەندىگى جانە ۇلكەن اۋىل شارۋاشىلىعى جەرلەرىنىڭ بولۋى. رەسپۋبليكادا ءوندىرىستى سۇرانىسقا ساي بولۋىن قامتاماسىز ەتۋ, سونداي-اق وسىرىلەتىن داقىلداردىڭ بيولوگيالىق قاجەتتىلىكتەرىن جەرگىلىكتى اگروكليماتتىق جانە تابيعي جاعدايلارعا نەعۇرلىم كوبىرەك سايكەستەندىرۋگە باعىتتالعان اۋىل شارۋاشىلىعى داقىلدارىن ءارتاراپتاندىرۋ بويىنشا شارالار قابىلدانىپ جاتىر.
ايتا كەتسەك, مەملەكەت باسشىسىنىڭ تاپسىرماسى بويىنشا 2025 جىلعا ارنالعان كوكتەمگى ەگىس جانە كۇزگى جيىن-تەرىم جۇمىستارىن قارجىلاندىرۋ باستالىپ كەتتى.