بۇل تۋرالى جوعارعى سوتتىڭ ءباسپاسوز قىزمەتىنەن ءمالىم بولدى, دەپ حابارلايدى Egemen.kz.
2024 جىلى سوت تورەلىگىن جۇزەگە اسىرۋدىڭ قورىتىندىسى بويىنشا سوت كورپۋسىنىڭ كەڭەيتىلگەن كەڭەسىنە قر پرەزيدەنتىنىڭ قۇقىقتىق ماسەلەلەر جونىندەگى كومەكشىسى ەرجان جيەنباەۆ, جوعارى سوت كەڭەسىنىڭ توراعاسى دميتري مالاحوۆ, پرەزيدەنت اكىمشىلىگىنىڭ مەملەكەتتىك-قۇقىقتىق ءبولىمىنىڭ مەڭگەرۋشىسى ايدار جارىلعانوۆ, جوعارعى سوت پەن وبلىستىق جانە وعان تەڭەستىرىلگەن سوتتار القالارىنىڭ توراعالارى, سوت اكىمشىلىگىنىڭ باسشىلىعى قاتىستى.
ءوز سوزىندە اسلامبەك مەرعاليەۆ مەملەكەت باسشىسىنىڭ ەلىمىزدىڭ سوت جۇيەسىن وزگەرتۋ جونىندە العا قويعان ءبىرىنشى كەزەكتەگى تاپسىرماسىن جۇزەگە اسىرۋعا توقتالدى. 2025 جىلدىڭ 1 شىلدەسىنەن باستاپ جۇمىس ىستەيتىن كاسساتسيالىق سوتتار ازاماتتار ءۇشىن سوت تورەلىگىنىڭ قولجەتىمدىلىگىن ايتارلىقتاي كەڭەيتىپ, ينۆەستيتسيا مەن بيزنەستى جۇرگىزۋ ءۇشىن جاعدايدى جاقسارتادى.
بايانداماشى, سونىمەن قاتار, كەلەسى جىلدىڭ 1 ناۋرىزىنان باستاپ ەنگىزىلەتىن اكىمشىلىك ىستەر بويىنشا تالاپ قويۋشىنىڭ تاڭداۋى بويىنشا ەكساۋماقتىق سوتتىلىقتىڭ ماڭىزدىلىعىن اتاپ ءوتتى. جاڭاشىلدىق جۇمىس كولەمىن ءىشىنارا تەڭەستىرىپ, جەرگىلىكتى سوتتىڭ ادىلدىگىنە قاتىستى كۇماندى جويىپ, سوت تورەلىگىنە دەگەن سەنىمدى ارتتىرۋعا ىقپال ەتەدى.
وسى جىلدىڭ جەلتوقسان ايىندا جوعارعى سوتتىڭ باستاماسىمەن ەنگىزىلگەن ميكروقارجى جونىندەگى ومبۋدسمەن ينستيتۋتى مەرزىمى وتكەن بەرەشەكتەرگە قاتىستى داۋلاردى شەشۋگە تەگىن كومەك كورسەتەدى.
جوعارعى سوت توراعاسى سوتتار قىزمەتىنىڭ ناتيجەلەرى تۋرالى ايتا وتىرىپ, قوعامنىڭ جوعارى ساپالى سوت تورەلىگىنە دەگەن تالاپتارىنىڭ ارتىپ كەلە جاتقانىن اتاپ ءوتتى. بيىل ونى جەرگىلىكتى سوتتار قامتاماسىز ەتىپ وتىر. ىستەردىڭ جالپى سانىنىڭ 19%-عا ارتۋى اياسىندا كۇشى جويىلعان جانە وزگەرتىلگەن سوت اكتىلەرىنىڭ سانى 7%-عا ازايدى. جوعارعى سوت تۇزەتكەن اپەللياتسيالىق شەشىمدەر سانى دا 17%-عا ازايدى.
جالپى العاندا, سوتتار 1,7 ميلليوننان استام سوت اكتىسىن شىعاردى, ونىڭ 98,9 پايىزى زاڭدى جانە نەگىزدەلگەن دەپ تانىلدى.