اتىراۋ وبلىسىندا ءتورت ت ۇلىكتى ۇرلاۋ ءالى دە سەيىلمەي تۇر. جەرگىلىكتى پوليتسەيلەر جىل باسىنان بەرى جەدەل-ىزدەستىرۋ شارالارى ناتيجەسىندە مال ۇرلىعىنا قاتىستى 27 قىلمىستى اشىپ, 7 ادامنان قۇرالعان 1 قىلمىستىق توپتى ۇستادى. جوعالعان 70 مالدى يەلەرىنە قايتاردى.
ماسەلەن, جىلىوي اۋداندىق پوليتسيا ءبولىمىنىڭ قىزمەتكەرلەرى 25 جاستاعى كۇدىكتىنى ۇستادى. ول اقكيىزتوعاي اۋىلىندا 14 مارتە ۇرلىق جاساپ, 34 ءىرى قارانى جىمقىرعان. كۇدىكتىنىڭ زاڭسىز ارەكەتىنەن مال يەلەرىنە 5 ملن تەڭگە شىعىن كەلگەن.
«جەدەل ىزدەستىرۋ ءىس-شاراسى كەزىندە مال ۇرلىعىنا قاتىسى بار دەگەن كۇدىكتى ۇستادى. كۇدىكتى – قۇلسارى قالاسىنىڭ تۇرعىنى. بۇعان دەيىن ۇرلىق جاساعانى ءۇشىن قىلمىستىق جاۋاپكەرشىلىككە تارتىلعان. ۇستالعان كۇدىكتى ۇرلاعان ءىرى قارانى ساتۋ ءۇشىن الەۋمەتتىك جەلىگە حابارلاندىرۋ جاريالاپ وتىرعان. ۇرلانعان مالدى ساتىپ العان تۇرعىندار دا انىقتالدى», دەپ حابارلادى پوليتسيا دەپارتامەنتىنىڭ ءباسپاسوز قىزمەتى.
ءتىنتۋ جۇرگىزۋ كەزىندە كۇدىكتىنىڭ ءموبيلدى تەلەفونىنان ۇرلانعان مالدىڭ فوتوسۋرەتتەرى مەن ساتىپ الۋشىلار اراسىنداعى جازبالار تابىلدى. كۇدىكتى كىناسىن مويىنداپ وتىر. قازىر كۇدىكتى قاماۋعا الىندى. پوليتسيا قىزمەتكەرلەرى قوسىمشا دالەلدەر جيناۋ ءۇشىن تەلەفون قوڭىراۋلارىنىڭ بيللينگىسىن تەكسەرىپ جاتىر. مال ۇرلىعىنا باسقا دا ادامداردىڭ قاتىسىنىڭ بار-جوعىن تەكسەرۋ قولعا الىندى.
ال قىزىلقوعا اۋداندىق سوتىندا 13 جابىرلەنۋشىنىڭ مالىن ۇرلاپ, 6,9 ملن تەڭگە شىعىن كەلتىرگەن ەر ادامعا قاتىستى ءىس قارالدى. ول دا بوتەننىڭ مالىن جاسىرىن تۇردە بىرنەشە رەت جىمقىرعان. سول سەبەپتەن وعان قىلمىستىق كودەكستىڭ 188-1-بابىنىڭ 3-بولىگىنىڭ 1-تارماعىمەن ايىپ تاعىلعان.
«ايىپتالۋشى ق. ءوزىنىڭ شارۋا قوجالىعىنىڭ اۋماعىندا بوتەننىڭ بىرنەشە سيىرى جايىلىپ جۇرگەنىن كورىپ, پايداكۇنەمدىك نيەتپەن جاسىرىن جىمقىرعان. بۇل ءىسىن بىرنەشە رەت قايتالاعان. ۇرلاعان مالدى ساتىپ, اقشاسىن ءوز قالاۋى بويىنشا جۇمساعان. ونىڭ كىناسى ءوزىنىڭ جانە جابىرلەنۋشىلەردىڭ جاۋاپتارىمەن, قىلمىستىق ءىس ماتەريالدارىمەن دالەلدەندى», دەپ مالىمدەدى اۋداندىق سوتتان.
اتالعان ىستە ءبىر جايتقا نازار اۋدارىلدى. بۇل – سوتتالۋشىنىڭ قىلمىس جاساعان كەزدە بۇرىنعى ۇرلىعى ءۇشىن پروباتسيالىق باقىلاۋدا جۇرگەنى.
وسىعان بايلانىستى پروكۋرور ايىپتالۋشىعا جازا تاعايىنداۋ كەزىندە ەكى باپتى قولدانۋدى ۇسىندى. ءبىرىنشىسى – ايىپ تاعىلعان باپپەن مۇلكىن تاركىلەۋسىز, 6 جىلعا باس بوستاندىعىنان ايىرۋ. ال ەكىنشىسى – قىلمىستىق كودەكستىڭ 60-بابىنىڭ 1-بولىگى نەگىزىندە بۇرىنعى ۇكىم بويىنشا جازاسىنىڭ وتەلمەگەن بولىگىن ءىشىنارا قوسۋ ارقىلى تۇپكىلىكتى 7 جىل مەرزىمگە باس بوستاندىعىنان ايىرۋ جازاسىن تاعايىنداۋ.
ءمۇيىزدى ءىرى قاراسى ۇرلانعان جابىرلەنۋشىلەردىڭ بىرقاتارى قاتاڭ جازا تاعايىنداۋدى سۇرادى. كەيبىرى جازا تاعايىنداۋ ماسەلەسىن سوتتىڭ قۇزىرىنا قالدىردى.
جازا تاعايىنداۋ كەزىندە بىرنەشە جايت ەسكەرىلدى. بىرىنشىدەن, سوتتالۋشى كىناسىن مويىنداپ, وكىنىشىن بىلدىرگەن. ەكىنشىدەن, ونىڭ جاس بالالارى بار. مىنە, وسىنداي سەبەپتەر جازانى جەڭىلدەتەتىن ءمان-جايلار رەتىندە قارالدى. الايدا سوتتالۋشى توتەنشە جاعداي كەزىندە قىلمىستىق قۇقىق بۇزۋشىلىق جاساعانى ەسكەرۋسىز قالمادى. ال بۇل – جازانى اۋىرلاتاتىن ءمان-جاي.
«سوت ۇكىمىمەن ايىپتالۋشى ق. قىلمىستىق كودەكسىنىڭ 188-1-بابىنىڭ 3-بولىگىنىڭ 1-تارماعىمەن كىنالى دەپ تانىلدى. وعان 60-باپتىڭ 1-بولىگىمەن تۇپكىلىكتى 7 جىل مەرزىمگە باس بوستاندىعىنان ايىرۋ جازاسى تاعايىندالدى», دەپ مالىمدەدى اۋداندىق سوتتان.
اتىراۋ وبلىسى