جىل سوڭىنا دەيىن ەرتىس-بايان ءوڭىرىنىڭ اۋىلدارىندا جاڭادان 30 ەمدەۋ مەكەمەسى ىسكە قوسىلادى. ناتيجەسىندە, 15 مىڭنان اسا ادام ساپالى مەديتسينالىق قىزمەتكە قول جەتكىزەدى.
جاقىندا ماي, اقتوعاي اۋداندارىندا ەمدەۋ مەكەمەلەرى اشىلدى. بۇل – «اۋىلدىق دەنساۋلىق ساقتاۋ سالاسىن جاڭعىرتۋ» جالپىۇلتتىق جوباسىن, پرەزيدەنت قاسىم-جومارت توقاەۆتىڭ سايلاۋالدى باعدارلاماسىن جۇزەگە اسىرۋ اياسىندا بوي كوتەرگەن جاڭا مەديتسينالىق مەكەمەلەر.
– ماي اۋدانىنىڭ اقجار اۋىلىنداعى فەلدشەرلىك پۋنكتكە 500-دەن اسا ادام قارالا الادى. جاڭا قۇرال-جابدىقتاردىڭ ارقاسىندا مەديتسينالىق قىزمەت كورسەتۋ اياسى كەڭەيدى. مەكەمەگە ەكگ جازۋعا ارنالعان تەلەكارديوگراف, دەفيبريللياتور, تىنىس الۋ جولدارىنىڭ اسپيراتسياسىنا ارنالعان ەلەكتر سورعىش قۇرىلعى, كوكتامىرىشىلىك ينفۋزياعا ارنالعان ءشپريتستى ينفۋزيالىق سورعىلار ساتىپ الىندى. بۇعان قوسا فيزيوەمدەۋدە قولدانىلاتىن نەبۋلايزەر, جوعارعى تىنىس جولدارىن, قۇلاق قۋىسىن ەمدەۋگە ارنالعان ۋلتراكۇلگىن ساۋلەلەندىرگىش, بتل ماگنيتتىك تەراپيا اپپاراتى دا جاڭارتىلدى. مۇندا ەم-شارا, فيزيوتەراپيا, پاتسيەنتتەردى قابىلداۋعا, دارىحاناعا ارنالعان ءتورت كابينەت, كۇندىزگى ستاتسيونار بار, – دەپ حابارلادى وڭىرلىك دەنساۋلىق ساقتاۋ باسقارماسىنان.
اقجارداعى ەسكى مەديتسينالىق پۋنكت 1985 جىلى سالىنعان. عيماراتى ابدەن ەسكىرىپ كەتكەنى سەبەپتى ەمدەۋ نىسانىن جاڭادان تۇرعىزۋعا شەشىم قابىلدانعان. قۇرىلىسىنا 137 ملن تەڭگە جۇمسالدى. مۇنداي مۇمكىندىككە وبلىستاعى ەڭ شالعاي اۋىلدىڭ ءبىرى – شۇعا ەلدى مەكەنىنىڭ حالقى دا يە بولدى. جاڭا مەكەمە 144 ادامعا قىزمەت كورسەتەدى. قۇرىلىسىنا شامامەن 138 ملن تەڭگە جۇمسالعان.
– مەردىگەر «Bays Group» جشس نىساندى ۋاقتىلى سالىپ شىقتى. «اۋىلدىق دەنساۋلىق ساقتاۋدى جاڭعىرتۋ» ۇلتتىق باعدارلاماسى اياسىندا مۇنداي مەديتسينالىق پۋنكت شىلىكتى اۋىلىندا دا تۇرعىزىلىپ جاتىر. شۇعادا مۇنىڭ الدىنداعى مەديتسينالىق پۋنكت جالدامالى عيماراتتا ورنالاسقان ەدى. جەرگىلىكتى تۇرعىندارعا ساپالى قىزمەت كورسەتۋگە قاجەت دەفيبريللياتور, ەكگ اپپاراتى, فيزيو جابدىعى, باسقا دا قاجەتتى قۇرال-جابدىقتار جەتكىزىلدى. سونىمەن قاتار ەم-شارا, ەكپە سالۋ كابينەتتەرى جۇمىس ىستەيدى, – دەيدى اقتوعاي اۋداندىق ىشكى ساياسات جانە تىلدەردى دامىتۋ ءبولىمىنىڭ باسشىسى دارحان رامازانوۆ.
بيىل اقتوعاي اۋدانىنا 5 دارىگەر, 10 ورتا بۋىندى مەديتسينالىق قىزمەتكەر كەلدى. ولار جەرگىلىكتى مەديتسينانىڭ كادرلىق الەۋەتىن كۇشەيتىپ, دەنساۋلىق ساقتاۋ سالاسىنداعى ساپانى جاقسارتا تۇسەدى دەگەن سەنىم زور.
پاۆلودار وبلىسى