سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسى ءوتتى. وندا 26 جەلتوقساندا وتەتىن سەنات وتىرىسىنىڭ كۇن ءتارتىبى بەكىتىلدى جانە دەپۋتاتتاردىڭ وڭىرلەرگە باراتىن ساپارلارىنا قاتىستى ماسەلەلەر تالقىلاندى.
ءىس-شارا بارىسىندا ماۋلەن اشىمباەۆ جاقىن كۇندەرى سەناتورلاردىڭ وڭىرلەرگە ساپارى باستالاتىنىن اتاپ ءوتتى. وسىعان بايلانىستى ول بارلىق مۇددەلى تاراپتىڭ كەشەندى كوزقاراسىن تالاپ ەتەتىن جۇمىستىڭ نەگىزگى باعىتتارى مەن مىندەتتەرىنە توقتالدى.
«دەپۋتاتتاردىڭ وڭىرلەرگە ساپارىنىڭ باستى ماقساتى – ازاماتتاردى الاڭداتىپ وتىرعان وزەكتى ماسەلەلەرگە باسا نازار اۋدارۋ جانە سول پروبلەمالاردىڭ وڭ شەشىلۋىنە اتسالىسۋ. ساپار كەزىندە شالعاي ەلدى مەكەندەردىڭ تۇرعىندارىمەن, قاراپايىم ەڭبەك ادامدارىمەن جانە شارۋالارمەن كەزدەسكەن ابزال. كەزدەسۋلەر بارىسىندا ەلىمىزدە جۇرگىزىلىپ جاتقان رەفورمالاردىڭ ماڭىزىن جانە پارلامەنت قابىلداعان زاڭداردىڭ نەگىزگى ەرەجەلەرىن دە جان-جاقتى ءتۇسىندىرۋ قاجەت», دەدى سەنات توراعاسى.
سونداي-اق دەپۋتاتتار سەنات وتىرىسىنىڭ كۇن ءتارتىبىن بەكىتتى. سوعان سايكەس الداعى بەيسەنبىدە بولاتىن جىلدىڭ قورىتىندى وتىرىسىندا سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قارايدى. سونىمەن قاتار «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ دا قارالادى. زاڭ ارقىلى قوعامدىق جۇمىستارعا تارتۋ تۇرىندە اكىمشىلىك جازا ەنگىزىلەدى جانە ونى ورىنداۋ تەتىگى ايقىندالادى.
بۇعان قوسا بيۋرودا ماجىلىستەن كەلىپ تۇسكەن زاڭدار جۇمىس ءۇشىن سەناتتىڭ تۇراقتى كوميتەتتەرىنە ءبولىنىپ بەرىلدى.